ṛṇatrayamocanatīrthamāhātmyavarṇanam
śrīmārkaṇḍeya uvāca
tato gacchenmahīpāla tīrthaṃ paramaśobhanam |
sthāpitaṃ munisaṅghairyadbrahmavaṃśasamudbhavaiḥ
||1||ततो गच्छेन्महीपाल तीर्थं परमशोभनम् ।
स्थापितं मुनिसङ्घैर्यद्ब्रह्मवंशसमुद्भवैः
ṛṇamocanamityākhyaṃ revātaṭasamāśritam |
ṣaṇmāsaṃ manujo bhaktyā tarpayan pitṛdevatāḥ
||2||ऋणमोचनमित्याख्यं रेवातटसमाश्रितम् ।
षण्मासं मनुजो भक्त्या तर्पयन् पितृदेवताः
devaiḥ pitṛmanuṣyaiśca ṛṇamātmakṛtaṃ ca yat |
mucyate tatkṣaṇānmartyaḥ snāto vai narmadājale
||3||देवैः पितृमनुष्यैश्च ऋणमात्मकृतं च यत् ।
मुच्यते तत्क्षणान्मर्त्यः स्नातो वै नर्मदाजले
pratyakṣaṃ duritaṃ tatra dṛśyate phalarūpataḥ |
tatra tīrthe tu yo rājannekacitto jitendriyaḥ
||4||प्रत्यक्षं दुरितं तत्र दृश्यते फलरूपतः ।
तत्र तीर्थे तु यो राजन्नेकचित्तो जितेन्द्रियः
snātvā dānaṃ ca vai dadyādarcayedgirijāpatim |
ṛṇatrayavinirmukto nāke dīpyati devavat
||5||स्नात्वा दानं च वै दद्यादर्चयेद्गिरिजापतिम् ।
ऋणत्रयविनिर्मुक्तो नाके दीप्यति देववत्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ṛṇatrayamocanatīrthamāhātmyavarṇanaṃ nāma saptāśītitamo'dhyāyaḥ ||