yatra siddhā mahāsarpāstapastaptvā yudhiṣṭhira
śrīmārkaṇḍeya uvāca
tato gacchenmahārāja sarpatīrthamanuttamam |
yatra siddhā mahāsarpāstapastaptvā yudhiṣṭhira
||1||ततो गच्छेन्महाराज सर्पतीर्थमनुत्तमम् ।
यत्र सिद्धा महासर्पास्तपस्तप्त्वा युधिष्ठिर
vāsukistakṣako ghoraḥ sārpa airāvatastathā |
kāliyaśca mahābhāgaḥ karkoṭakadhanaṃjayau
||2||वासुकिस्तक्षको घोरः सार्प ऐरावतस्तथा ।
कालियश्च महाभागः कर्कोटकधनंजयौ
śaṅkhacūḍo mahātejā dhṛtarāṣṭro vṛkodaraḥ |
kuliko vāmanaścaiva teṣāṃ ye putrapautriṇaḥ
||3||शङ्खचूडो महातेजा धृतराष्ट्रो वृकोदरः ।
कुलिको वामनश्चैव तेषां ये पुत्रपौत्रिणः
tatra tīrthe mahāpuṇye tapastaptvā suduṣkaram |
bhuñjanti vividhānbhogānkrīḍanti ca yathāsukham
||4||तत्र तीर्थे महापुण्ये तपस्तप्त्वा सुदुष्करम् ।
भुञ्जन्ति विविधान्भोगान्क्रीडन्ति च यथासुखम्
tatra tīrthe tu yaḥ snātvā tarpayetpitṛdevatāḥ |
vājapeyaphalaṃ tasya purā provāca śaṅkaraḥ
||5||तत्र तीर्थे तु यः स्नात्वा तर्पयेत्पितृदेवताः ।
वाजपेयफलं तस्य पुरा प्रोवाच शङ्करः
snātānāṃ sarpatīrthe tu narāṇāṃ bhuvi bhārata |
sarpavṛścikajātibhyo na bhayaṃ vidyate kvacit
||6||स्नातानां सर्पतीर्थे तु नराणां भुवि भारत ।
सर्पवृश्चिकजातिभ्यो न भयं विद्यते क्वचित्
mṛto bhogavatīṃ gatvā pūjyamāno mahoragaiḥ |
nāgakanyāparivṛto mahābhogapatirbhavet
||7||मृतो भोगवतीं गत्वा पूज्यमानो महोरगैः ।
नागकन्यापरिवृतो महाभोगपतिर्भवेत्
mārgaśīrṣasya māsasya kṛṣṇapakṣe ca yāṣṭamī |
sopavāsaḥ śucirbhūtvā liṅgaṃ sampūrayettilaiḥ |
yathāvibhavasāreṇa gandhapuṣpaiḥ samarcayet
||8||मार्गशीर्षस्य मासस्य कृष्णपक्षे च याष्टमी ।
सोपवासः शुचिर्भूत्वा लिङ्गं सम्पूरयेत्तिलैः ।
यथाविभवसारेण गन्धपुष्पैः समर्चयेत्
evaṃ vidhāya vidhivatpraṇipatya kṣamāpayet |
tasya yatphalamuddiṣṭaṃ tacchṛṇuṣva nareśvara
||9||एवं विधाय विधिवत्प्रणिपत्य क्षमापयेत् ।
तस्य यत्फलमुद्दिष्टं तच्छृणुष्व नरेश्वर
tilāstatra ca yatsaṃkhyāḥ patrapuṣpaphalāni ca |
tāvatsvargapure rājanmodate kālamīpsitam
||10||तिलास्तत्र च यत्संख्याः पत्रपुष्पफलानि च ।
तावत्स्वर्गपुरे राजन्मोदते कालमीप्सितम्
tataḥ svargātparibhraṣṭo jāyate vimale kule |
surūpaḥ subhagaścaiva dhanakoṭipatirbhavet
||11||ततः स्वर्गात्परिभ्रष्टो जायते विमले कुले ।
सुरूपः सुभगश्चैव धनकोटिपतिर्भवेत्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe sarpatīrthamāhātmyavarṇanaṃ nāmaikaṣaṣṭyuttaraśatatamo'dhyāyaḥ ||