gopeśvaratīrthamāhātmyavarṇanam
śrīmārkaṇḍeya uvāca
gopeśvaraṃ tato gaccheduttare narmadātaṭe |
yatra snānena caikena mucyante pātakairnarāḥ
||1||गोपेश्वरं ततो गच्छेदुत्तरे नर्मदातटे ।
यत्र स्नानेन चैकेन मुच्यन्ते पातकैर्नराः
tatra tīrthe tu yaḥ snātvā kurute prāṇasaṃkṣayam |
barhiyuktena yānena sa gacchecchivamandire
||2||तत्र तीर्थे तु यः स्नात्वा कुरुते प्राणसंक्षयम् ।
बर्हियुक्तेन यानेन स गच्छेच्छिवमन्दिरे
krīḍitvā suciraṃ kālaṃ śivaloke narādhipa |
iha mānuṣyatāṃ prāpya rājā bhavati vīryavān
||3||क्रीडित्वा सुचिरं कालं शिवलोके नराधिप ।
इह मानुष्यतां प्राप्य राजा भवति वीर्यवान्
hastyaśvarathasampanno dāsīdāsasamanvitaḥ |
pūjyamāno narendraiśca jīvedvarṣaśataṃ naraḥ
||4||हस्त्यश्वरथसम्पन्नो दासीदाससमन्वितः ।
पूज्यमानो नरेन्द्रैश्च जीवेद्वर्षशतं नरः
samprāpte kārttike māsi navamyāṃ śuklapakṣataḥ |
sopavāsaḥ śucirbhūtvā dīpakāṃstatra dāpayet
||5||सम्प्राप्ते कार्त्तिके मासि नवम्यां शुक्लपक्षतः ।
सोपवासः शुचिर्भूत्वा दीपकांस्तत्र दापयेत्
gandhapuṣpaiḥ samabhyarcya rātrau kurvīta jāgaram |
tasya yatphalamuddiṣṭaṃ tacchṛṇuṣva narādhipa
||6||गन्धपुष्पैः समभ्यर्च्य रात्रौ कुर्वीत जागरम् ।
तस्य यत्फलमुद्दिष्टं तच्छृणुष्व नराधिप
yāvatpuṇyaṃ phalaṃ saṃkhyā dīpakānāṃ tathaiva ca |
tāvadyugasahasrāṇi śivaloke mahīyate
||7||यावत्पुण्यं फलं संख्या दीपकानां तथैव च ।
तावद्युगसहस्राणि शिवलोके महीयते
tasmiṃstīrthe tu rājendra liṅgapūraṇakaṃ vidhim |
tathaiva padmakaiścaiva dadhibhaktaistathaiva ca
||8||तस्मिंस्तीर्थे तु राजेन्द्र लिङ्गपूरणकं विधिम् ।
तथैव पद्मकैश्चैव दधिभक्तैस्तथैव च
yastu kuryānnaraśreṣṭha tasya puṇyaphalaṃ śṛṇu |
yāvanti tilasaṃkhyāni dadhibhaktaṃ tathaiva ca
||9||यस्तु कुर्यान्नरश्रेष्ठ तस्य पुण्यफलं शृणु ।
यावन्ति तिलसंख्यानि दधिभक्तं तथैव च
padmasaṃkhyā śive loke modate kālamīpsitam |
tasmiṃstīrthe tu rājendra yatkiṃciddīyate nṛpa
||10||पद्मसंख्या शिवे लोके मोदते कालमीप्सितम् ।
तस्मिंस्तीर्थे तु राजेन्द्र यत्किंचिद्दीयते नृप
sarvaṃ koṭiguṇaṃ tasya saṃkhyātuṃ vā na śakyate |
evaṃ te kathitaṃ sarvaṃ sarvatīrthamanuttamam
||11||सर्वं कोटिगुणं तस्य संख्यातुं वा न शक्यते ।
एवं ते कथितं सर्वं सर्वतीर्थमनुत्तमम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gopeśvaratīrthamāhātmyavarṇanaṃ nāma catuḥsaptatyuttaraśatatamo'dhyāyaḥ ||