ānandeśvaratīrthamāhātmyavarṇanam
śrīmārkaṇḍeya uvāca
tato gacchettu rājendra ānandeśvaramuttamam |
tattīrthaṃ kathayiṣyāmi sarvapāpakṣayaṃkaram
||1||ततो गच्छेत्तु राजेन्द्र आनन्देश्वरमुत्तमम् ।
तत्तीर्थं कथयिष्यामि सर्वपापक्षयंकरम्
yudhiṣṭhira uvāca
ānandaścaiva saṃjāto rudrasya dvijasattama |
kathyatāṃ me ca tatsarvaṃ saṃkṣepātsaha bāndhavaiḥ
||2||आनन्दश्चैव संजातो रुद्रस्य द्विजसत्तम ।
कथ्यतां मे च तत्सर्वं संक्षेपात्सह बान्धवैः
śrīmārkaṇḍeya uvāca
kathayāmi nṛpaśreṣṭha ānandeśvaramuttamam |
dānavānāṃ vadhaṃ kṛtvā devadevo maheśvaraḥ
||3||कथयामि नृपश्रेष्ठ आनन्देश्वरमुत्तमम् ।
दानवानां वधं कृत्वा देवदेवो महेश्वरः
pūjito daivataiḥ sarvaiḥ kinnarairyakṣapannagaiḥ |
ānandasaṃyuto devo nanarta vṛṣavāhanaḥ
||4||पूजितो दैवतैः सर्वैः किन्नरैर्यक्षपन्नगैः ।
आनन्दसंयुतो देवो ननर्त वृषवाहनः
bhairavaṃ rūpamāsthāya gauryā cārddhāṅgasaṃsthitaḥ |
bhūtavetālakaṅkālairbhairavairbhairavo vṛtaḥ
||5||भैरवं रूपमास्थाय गौर्या चार्द्धाङ्गसंस्थितः ।
भूतवेतालकङ्कालैर्भैरवैर्भैरवो वृतः
nanarta narmadātīre dakṣiṇe pāṇḍunandana |
tuṣṭairmarudgaṇaiḥ sarvaiḥ sthāpitaḥ kamalāsanaḥ
||6||ननर्त नर्मदातीरे दक्षिणे पाण्डुनन्दन ।
तुष्टैर्मरुद्गणैः सर्वैः स्थापितः कमलासनः
tadāprabhṛti tattīrthamānandeśvaramucyate |
aṣṭamyāṃ ca caturdaśyāṃ paurṇamāsyāṃ narādhipa
||7||तदाप्रभृति तत्तीर्थमानन्देश्वरमुच्यते ।
अष्टम्यां च चतुर्दश्यां पौर्णमास्यां नराधिप
vidhivaccārcayeddevaṃ sugandhena vilepayet |
brāhmaṇānpūjayettatra yathāśaktyā yudhiṣṭhira
||8||विधिवच्चार्चयेद्देवं सुगन्धेन विलेपयेत् ।
ब्राह्मणान्पूजयेत्तत्र यथाशक्त्या युधिष्ठिर
godānaṃ tatra kartavyaṃ vastradānaṃ śubhāvaham |
vasantasya trayodaśyāṃ śrāddhaṃ tatraiva kārayet
||9||गोदानं तत्र कर्तव्यं वस्त्रदानं शुभावहम् ।
वसन्तस्य त्रयोदश्यां श्राद्धं तत्रैव कारयेत्
iṅgudairbadarairbilvairakṣataiśca jalena vā |
pretānāṃ kārayecchrāddhamānandeśvara uttame
||10||इङ्गुदैर्बदरैर्बिल्वैरक्षतैश्च जलेन वा ।
प्रेतानां कारयेच्छ्राद्धमानन्देश्वर उत्तमे
ānanditā bhaveyuste yāvadābhūtasamplavam |
santatervai na vicchedaḥ saptajanmasu jāyate |
ānando hi bhavatteṣāṃ pratijanmani bhārata
||11||आनन्दिता भवेयुस्ते यावदाभूतसम्प्लवम् ।
सन्ततेर्वै न विच्छेदः सप्तजन्मसु जायते ।
आनन्दो हि भवत्तेषां प्रतिजन्मनि भारत
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ānandeśvaratīrthamāhātmyavarṇanaṃ nāma pañcaṣaṣṭitamo'dhyāyaḥ ||