śuddheśvaratīrthamāhātmyavarṇanam
śrīmārkaṇḍeya uvāca
tato gacchettu rājendra tīrthaṃ paramaśobhanam |
narmadādakṣiṇe kūle sarvapāpapraṇāśanam
||1||ततो गच्छेत्तु राजेन्द्र तीर्थं परमशोभनम् ।
नर्मदादक्षिणे कूले सर्वपापप्रणाशनम्
siddheśvaramiti khyātaṃ mahāpātakanāśanam |
yatra śuddhiṃ parāṃ prāpto devadevo maheśvaraḥ |
purā hatyāyutaḥ pārtha devadevastriśūladhṛk
||2||सिद्धेश्वरमिति ख्यातं महापातकनाशनम् ।
यत्र शुद्धिं परां प्राप्तो देवदेवो महेश्वरः ।
पुरा हत्यायुतः पार्थ देवदेवस्त्रिशूलधृक्
purā pañcaśirā āsīdbrahmā lokapitāmahaḥ |
tenānṛtaṃ vacaścoktaṃ kasmiṃścitkāraṇāntare
||3||पुरा पञ्चशिरा आसीद्ब्रह्मा लोकपितामहः ।
तेनानृतं वचश्चोक्तं कस्मिंश्चित्कारणान्तरे
tacchrutvā sahasā tasmai cukopa parameśvaraḥ |
chedayāmāsa bhagavānmūrdhānaṃ karajaistadā
||4||तच्छ्रुत्वा सहसा तस्मै चुकोप परमेश्वरः ।
छेदयामास भगवान्मूर्धानं करजैस्तदा
tasya tatkarasaṃlagnaṃ cyavate na kadācana |
tato hi devadeveśaḥ paryaṭan pṛthivīmimām
||5||तस्य तत्करसंलग्नं च्यवते न कदाचन ।
ततो हि देवदेवेशः पर्यटन् पृथिवीमिमाम्
tato vārāṇasīṃ prāptastasyāṃ tadapatacchiraḥ |
patite tu kapāle ca brahmahatyā na muñcati
||6||ततो वाराणसीं प्राप्तस्तस्यां तदपतच्छिरः ।
पतिते तु कपाले च ब्रह्महत्या न मुञ्चति
tatastu sāgare gatvā pūrve ca dakṣiṇe tathā |
paścime cottare pārtha devadevo maheśvaraḥ
||7||ततस्तु सागरे गत्वा पूर्वे च दक्षिणे तथा ।
पश्चिमे चोत्तरे पार्थ देवदेवो महेश्वरः
paryaṭansarvatīrtheṣu brahmahatyā na muñcati |
narmadādakṣiṇe kūle sutīrthaṃ prāptavān prabhuḥ
||8||पर्यटन्सर्वतीर्थेषु ब्रह्महत्या न मुञ्चति ।
नर्मदादक्षिणे कूले सुतीर्थं प्राप्तवान् प्रभुः
kulakoṭiṃ samāsādya prārthayāmāsa cātmavān |
prāyaścittaṃ tataḥ kṛtvā babhūva gatakalmaṣaḥ
||9||कुलकोटिं समासाद्य प्रार्थयामास चात्मवान् ।
प्रायश्चित्तं ततः कृत्वा बभूव गतकल्मषः
tato niṣkalmaṣo jāto devadevo maheśvaraḥ |
hatvā surebhyastatsthānaṃ tataścāntardadhe prabhuḥ
||10||ततो निष्कल्मषो जातो देवदेवो महेश्वरः ।
हत्वा सुरेभ्यस्तत्स्थानं ततश्चान्तर्दधे प्रभुः
tadāprabhṛti tattīrthaṃ śuddharudreti kīrtitam |
vikhyātaṃ triṣu loke brahmahatyāharaṃ param
||11||तदाप्रभृति तत्तीर्थं शुद्धरुद्रेति कीर्तितम् ।
विख्यातं त्रिषु लोके ब्रह्महत्याहरं परम्
māse māse site pakṣe'māvāsyāyāṃ yudhiṣṭhira |
snātvā tatra vidhānena tarpayetpitṛdevatāḥ
||12||मासे मासे सिते पक्षेऽमावास्यायां युधिष्ठिर ।
स्नात्वा तत्र विधानेन तर्पयेत्पितृदेवताः
dadyātpiṇḍaṃ pitḥṇāṃ tu bhāvitenāntarātmanā |
tasya te dvādaśābdāni sutṛptāḥ pitaro nṛpa
||13||दद्यात्पिण्डं पित्ःणां तु भावितेनान्तरात्मना ।
तस्य ते द्वादशाब्दानि सुतृप्ताः पितरो नृप
gandhadhūpapradīpādyairabhyarcya parameśvaram |
śuddheśvarābhidhānaṃ tu śivaloke mahīyate
||14||गन्धधूपप्रदीपाद्यैरभ्यर्च्य परमेश्वरम् ।
शुद्धेश्वराभिधानं तु शिवलोके महीयते
etatte kathitaṃ rājañchuddharudramanuttamam |
mayā śrutaṃ yathā devasakāśācchūlapāṇinaḥ |
mucyate sarvapāpebhyo rudralokaṃ sa gacchati
||15||एतत्ते कथितं राजञ्छुद्धरुद्रमनुत्तमम् ।
मया श्रुतं यथा देवसकाशाच्छूलपाणिनः ।
मुच्यते सर्वपापेभ्यो रुद्रलोकं स गच्छति
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śuddheśvaratīrthamāhātmyavarṇanaṃ nāma trisaptatyuttaraśatatamo'dhyāyaḥ ||