revākhaṇḍe'gnirasatīrthamāhātmyavarṇanam
śrīmārkaṇḍeya uvāca
tato gacchettu rājendra tīrthamāṅgirasasya tu |
uttare narmadākūle sarvapāpavināśanam
||1||ततो गच्छेत्तु राजेन्द्र तीर्थमाङ्गिरसस्य तु ।
उत्तरे नर्मदाकूले सर्वपापविनाशनम्
purāsīdaṅgirānāma brāhmaṇo vedapāragaḥ |
putrahetoryugasyādau cacāra vipulaṃ tapaḥ
||2||पुरासीदङ्गिरानाम ब्राह्मणो वेदपारगः ।
पुत्रहेतोर्युगस्यादौ चचार विपुलं तपः
nityaṃ triṣavaṇasnāyī japandevaṃ sanātanam |
pūjayaṃśca mahādevaṃ kṛcchracāndrāyaṇādibhiḥ
||3||नित्यं त्रिषवणस्नायी जपन्देवं सनातनम् ।
पूजयंश्च महादेवं कृच्छ्रचान्द्रायणादिभिः
dvādaśābde tataḥ pūrṇe tutoṣa parameśvaraḥ |
vareṇa chandayāmāsa dvijamāṅgirasaṃ varam
||4||द्वादशाब्दे ततः पूर्णे तुतोष परमेश्वरः ।
वरेण छन्दयामास द्विजमाङ्गिरसं वरम्
vavre sa tu mahādevaṃ putraṃ putravatāṃ varam |
vedavidyāvratasnātaṃ sarvaśāstraviśāradam
||5||वव्रे स तु महादेवं पुत्रं पुत्रवतां वरम् ।
वेदविद्याव्रतस्नातं सर्वशास्त्रविशारदम्
devānāṃ mantriṇaṃ rājan sarvalokeṣu pūjitam |
brahmalakṣmyāḥ sadāvāsamakṣayaṃ cāvyayaṃ sutam
||6||देवानां मन्त्रिणं राजन् सर्वलोकेषु पूजितम् ।
ब्रह्मलक्ष्म्याः सदावासमक्षयं चाव्ययं सुतम्
tathābhilaṣitaḥ putraḥ sarvavidyāviśāradaḥ |
bhaviṣyati na sandehaścaivamuktvā yayau haraḥ
||7||तथाभिलषितः पुत्रः सर्वविद्याविशारदः ।
भविष्यति न सन्देहश्चैवमुक्त्वा ययौ हरः
varairaṅgirasaścāpi bṛhaspatirajāyata |
yathābhilaṣitaḥ putro vedavedāṅgapāragaḥ
||8||वरैरङ्गिरसश्चापि बृहस्पतिरजायत ।
यथाभिलषितः पुत्रो वेदवेदाङ्गपारगः
jāte putre'ṅgirāstatra sthāpayāmāsa śaṅkaram |
hṛṣṭatuṣṭamanā bhūtvā jagāmottaraparvatam
||9||जाते पुत्रेऽङ्गिरास्तत्र स्थापयामास शङ्करम् ।
हृष्टतुष्टमना भूत्वा जगामोत्तरपर्वतम्
tatra cāṅgirase tīrthe yaḥ snātvā pūjayecchivam |
sarvapāpavinirmukto rudralokaṃ sa gacchati
||10||तत्र चाङ्गिरसे तीर्थे यः स्नात्वा पूजयेच्छिवम् ।
सर्वपापविनिर्मुक्तो रुद्रलोकं स गच्छति
aputro labhate putramadhano dhanamāpnuyāt |
icchate yaśca yaṃ kāmaṃ sa taṃ labhati mānavaḥ
||11||अपुत्रो लभते पुत्रमधनो धनमाप्नुयात् ।
इच्छते यश्च यं कामं स तं लभति मानवः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe'gnirasatīrthamāhātmyavarṇanaṃ nāma dvādaśādhikaśatatamo'dhyāyaḥ ||