mārkaṇḍeśvaratīrthamāhātmyavarṇanam
yudhiṣṭhira uvāca
narmadādakṣiṇe kūle tvaccihnenopalakṣitam |
tīrthametanmamākhyāhi sambhavaṃ ca mahāmune
||1||नर्मदादक्षिणे कूले त्वच्चिह्नेनोपलक्षितम् ।
तीर्थमेतन्ममाख्याहि सम्भवं च महामुने
mārkaṇḍeya uvāca
purā kṛtayugasyādau dakṣiṇe girimuttamam |
vindhyaṃ sarvaguṇopetaṃ niyato niyatāśanaḥ
||2||पुरा कृतयुगस्यादौ दक्षिणे गिरिमुत्तमम् ।
विन्ध्यं सर्वगुणोपेतं नियतो नियताशनः
ṛṣisaṅghaiḥ kṛtātithyo daṇḍake nyavasaṃ ciram |
uṣitvā suciraṃ kālaṃ varṣāṇāmayutaṃ sukhī
||3||ऋषिसङ्घैः कृतातिथ्यो दण्डके न्यवसं चिरम् ।
उषित्वा सुचिरं कालं वर्षाणामयुतं सुखी
tānṛṣīn samanujñāpya śiṣyairanugatastataḥ |
nivṛttaḥ sumahābhāga narmadākūlamāgataḥ
||4||तानृषीन् समनुज्ञाप्य शिष्यैरनुगतस्ततः ।
निवृत्तः सुमहाभाग नर्मदाकूलमागतः
puṇyaṃ ca ramaṇīyaṃ ca sarvapāpavināśanam |
kṛtvāhamāspadaṃ tatra dvijasaṃghasamāyutaḥ
||5||पुण्यं च रमणीयं च सर्वपापविनाशनम् ।
कृत्वाहमास्पदं तत्र द्विजसंघसमायुतः
brahmacāribhirākīrṇaṃ gārhasthye supratiṣṭhitaiḥ |
vānaprasthaiśca yatibhiryatāhārairyatātmabhiḥ
||6||ब्रह्मचारिभिराकीर्णं गार्हस्थ्ये सुप्रतिष्ठितैः ।
वानप्रस्थैश्च यतिभिर्यताहारैर्यतात्मभिः
tapasvibhirmahābhāgaiḥ kāmakrodhavivarjitaiḥ |
tatrāhaṃ varṣamayutaṃ tapaḥ kṛtvā sudāruṇam
||7||तपस्विभिर्महाभागैः कामक्रोधविवर्जितैः ।
तत्राहं वर्षमयुतं तपः कृत्वा सुदारुणम्
ārādhayaṃ vāsudevaṃ prabhuṃ kartāramīśvaram |
japaṃstapobhirniyamairnarmadākūlamāśritaḥ
||8||आराधयं वासुदेवं प्रभुं कर्तारमीश्वरम् ।
जपंस्तपोभिर्नियमैर्नर्मदाकूलमाश्रितः
tatastau varadau devau samāyātau yudhiṣṭhira |
pratyakṣau bhāskarau rājannumāśrībhyāṃ vibhūṣitau
||9||ततस्तौ वरदौ देवौ समायातौ युधिष्ठिर ।
प्रत्यक्षौ भास्करौ राजन्नुमाश्रीभ्यां विभूषितौ
praṇamyāhaṃ tato devau bhaktiyukto vaco'bruvam |
bhavantau prārthayāmi sma varārhau varadau śivau
||10||प्रणम्याहं ततो देवौ भक्तियुक्तो वचोऽब्रुवम् ।
भवन्तौ प्रार्थयामि स्म वरार्हौ वरदौ शिवौ
dharmasthitiṃ mahābhāgau bhaktiṃ vānuttamāṃ yuvām |
ajaro vyādhirahitaḥ pañcaviṃśativarṣavat |
asminsthāne sadā stheyaṃ saha devairasaṃśayam
||11||धर्मस्थितिं महाभागौ भक्तिं वानुत्तमां युवाम् ।
अजरो व्याधिरहितः पञ्चविंशतिवर्षवत् ।
अस्मिन्स्थाने सदा स्थेयं सह देवैरसंशयम्
evamuktau mayā pārtha tau devau kṛṣṇaśaṅkarau |
māmūcatuḥ prahṛṣṭau tau nivāsārthaṃ yudhiṣṭhira
||12||एवमुक्तौ मया पार्थ तौ देवौ कृष्णशङ्करौ ।
मामूचतुः प्रहृष्टौ तौ निवासार्थं युधिष्ठिर
devāvūcatuḥ
asminsthāne sthitau viddhi saha devaiḥ savāsavaiḥ |
evamuktvā tato devau tatraivāntaradhīyatām
||13||अस्मिन्स्थाने स्थितौ विद्धि सह देवैः सवासवैः ।
एवमुक्त्वा ततो देवौ तत्रैवान्तरधीयताम्
ahaṃ ca sthāpayitvā tau śaṅkaraṃ kṛṣṇamavyayam |
kṛtakṛtyastato jātaḥ sampūjya susamāhitaḥ
||14||अहं च स्थापयित्वा तौ शङ्करं कृष्णमव्ययम् ।
कृतकृत्यस्ततो जातः सम्पूज्य सुसमाहितः
tasmiṃstīrthe naraḥ snātvā pūjayetparameśvaram |
mārkaṇḍeśvaranāmnā vai viṣṇuṃ tribhuvaneśvaram
||15||तस्मिंस्तीर्थे नरः स्नात्वा पूजयेत्परमेश्वरम् ।
मार्कण्डेश्वरनाम्ना वै विष्णुं त्रिभुवनेश्वरम्
sa gacchetparamaṃ sthānaṃ vaiṣṇavaṃ śaivameva ca |
ghṛtena payasā vātha dadhnā ca madhunā tathā
||16||स गच्छेत्परमं स्थानं वैष्णवं शैवमेव च ।
घृतेन पयसा वाथ दध्ना च मधुना तथा
nārmadenodakenātha gandhadhūpaiḥ suśobhanaiḥ |
puṣpopahāraiśca tathā naivedyairniyatātmavān
||17||नार्मदेनोदकेनाथ गन्धधूपैः सुशोभनैः ।
पुष्पोपहारैश्च तथा नैवेद्यैर्नियतात्मवान्
evaṃ viṣṇoḥ prakurvīta jāgaraṃ bhaktitatparaḥ |
snānādīni tathā rājanprayataḥ śucimānasaḥ
||18||एवं विष्णोः प्रकुर्वीत जागरं भक्तितत्परः ।
स्नानादीनि तथा राजन्प्रयतः शुचिमानसः
jyeṣṭhe māsi site pakṣe caturdaśyāmupoṣitaḥ |
dvādaśyāṃ kārayeddevapūjanaṃ vaiṣṇavo naraḥ
||19||ज्येष्ठे मासि सिते पक्षे चतुर्दश्यामुपोषितः ।
द्वादश्यां कारयेद्देवपूजनं वैष्णवो नरः
evaṃ kṛtvā caturdaśyāmekādaśyāṃ narottama |
vaiṣṇavaṃ lokamāpnoti viṣṇutulyo bhavennaraḥ
||20||एवं कृत्वा चतुर्दश्यामेकादश्यां नरोत्तम ।
वैष्णवं लोकमाप्नोति विष्णुतुल्यो भवेन्नरः
māheśvare ca rājendra gaṇavanmodate pure |
śrāddhaṃ ca kurute tatra pitṝnuddiśya susthiraḥ
||21||माहेश्वरे च राजेन्द्र गणवन्मोदते पुरे ।
श्राद्धं च कुरुते तत्र पितॄनुद्दिश्य सुस्थिरः
tasya te hyakṣayāṃ tṛptiṃ prāpnuvanti na saṃśayaḥ |
narmadāyāṃ dvijaḥ snātvā maunī niyatamānasaḥ
||22||तस्य ते ह्यक्षयां तृप्तिं प्राप्नुवन्ति न संशयः ।
नर्मदायां द्विजः स्नात्वा मौनी नियतमानसः
upāsya sandhyāṃ tatrastho japaṃ kṛtvā suśobhanam |
tarpayitvā pitṝndevānmanuṣyāṃśca yathāvidhi
||23||उपास्य सन्ध्यां तत्रस्थो जपं कृत्वा सुशोभनम् ।
तर्पयित्वा पितॄन्देवान्मनुष्यांश्च यथाविधि
kṛṣṇasya purataḥ sthitvā mārkaṇḍeśasya vā punaḥ |
ṛgyajuḥsāmamantrāṃśca japedatra prayatnataḥ
||24||कृष्णस्य पुरतः स्थित्वा मार्कण्डेशस्य वा पुनः ।
ऋग्यजुःसाममन्त्रांश्च जपेदत्र प्रयत्नतः
ṛcamekāṃ japedyastu ṛgvedasya phalaṃ labhet |
yajurvedasya yajuṣā sāmnā sāmaphalaṃ labhet
||25||ऋचमेकां जपेद्यस्तु ऋग्वेदस्य फलं लभेत् ।
यजुर्वेदस्य यजुषा साम्ना सामफलं लभेत्
ekasminbhojite vipre koṭirbhavati bhojitā |
mṛtaprajā tu yā nārī vandhyā strījananī tathā
||26||एकस्मिन्भोजिते विप्रे कोटिर्भवति भोजिता ।
मृतप्रजा तु या नारी वन्ध्या स्त्रीजननी तथा
rudrāṃstu vidhivajjaptvā brāhmaṇo vedatattvavit |
liṅgasya dakṣiṇe pārśve sthāpayetkalaśaṃ śivam
||27||रुद्रांस्तु विधिवज्जप्त्वा ब्राह्मणो वेदतत्त्ववित् ।
लिङ्गस्य दक्षिणे पार्श्वे स्थापयेत्कलशं शिवम्
rudraikādaśabhirmantraiḥ snāpayetkalaśāmbhasā |
putramāpnoti rājendra dīrghāyuṣamakalmaṣam
||28||रुद्रैकादशभिर्मन्त्रैः स्नापयेत्कलशाम्भसा ।
पुत्रमाप्नोति राजेन्द्र दीर्घायुषमकल्मषम्
mārkaṇḍeśvaravṛkṣānyo dūrasthānapi paśyati |
brahmahatyādipāpebhyo mucyate śaṅkaro'bravīt
||29||मार्कण्डेश्वरवृक्षान्यो दूरस्थानपि पश्यति ।
ब्रह्महत्यादिपापेभ्यो मुच्यते शङ्करोऽब्रवीत्
ya idaṃ śṛṇuyādbhaktyā paṭhedvā nṛpasattama |
sarvapāpaviśuddhātmā jāyate nātra saṃśayaḥ
||30||य इदं शृणुयाद्भक्त्या पठेद्वा नृपसत्तम ।
सर्वपापविशुद्धात्मा जायते नात्र संशयः
idaṃ yaśasyamāyuṣyaṃ dhanyaṃ duḥkhapraṇāśanam |
paṭhatāṃ śṛṇvatāṃ vāpi sarvapāpapramocanam
||31||इदं यशस्यमायुष्यं धन्यं दुःखप्रणाशनम् ।
पठतां शृण्वतां वापि सर्वपापप्रमोचनम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe mārkaṇḍeśvaratīrthamāhātmyavarṇanaṃ nāma saptaṣaṣṭyuttaraśatatamo'dhyāyaḥ ||