aṅgārakatīrthamāhātmyavarṇanam
śrīmārkaṇḍeya uvāca
tato gacchenmahārāja tīrthamaṅgārakaṃ param |
rūpadaṃ sarvalokānāṃ viśrutaṃ narmadātaṭe
||1||ततो गच्छेन्महाराज तीर्थमङ्गारकं परम् ।
रूपदं सर्वलोकानां विश्रुतं नर्मदातटे
aṅgārakeṇa rājendra purā taptaṃ tapaḥ kila |
arbudaṃ ca nikharvaṃ ca prayutaṃ varṣasaṃkhyayā
||2||अङ्गारकेण राजेन्द्र पुरा तप्तं तपः किल ।
अर्बुदं च निखर्वं च प्रयुतं वर्षसंख्यया
tatastuṣṭo mahādevaḥ parayā kṛpayā nṛpa |
pratyakṣadarśī bhagavānuvāca kṣitinandanam
||3||ततस्तुष्टो महादेवः परया कृपया नृप ।
प्रत्यक्षदर्शी भगवानुवाच क्षितिनन्दनम्
varado'smi mahābhāga durlabhaṃ tridaśairapi |
varaṃ dāsyāmyahaṃ vatsa brūhi yatte vivakṣitam
||4||वरदोऽस्मि महाभाग दुर्लभं त्रिदशैरपि ।
वरं दास्याम्यहं वत्स ब्रूहि यत्ते विवक्षितम्
aṅgāraka uvāca
tava prasādāddeveśa sarvalokamaheśvara |
grahamadhyagato nityaṃ vicarāmi nabhastale
||5||तव प्रसादाद्देवेश सर्वलोकमहेश्वर ।
ग्रहमध्यगतो नित्यं विचरामि नभस्तले
yāvaddharādharo loke yāvaccandradivākarau |
nadyo nadāḥ samudrāśca varo me cākṣayo bhavet
||6||यावद्धराधरो लोके यावच्चन्द्रदिवाकरौ ।
नद्यो नदाः समुद्राश्च वरो मे चाक्षयो भवेत्
evamastviti deveśo dattvā varamanuttamam |
jagāmākāśamāviśya vandyamānaḥ surāsuraiḥ
||7||एवमस्त्विति देवेशो दत्त्वा वरमनुत्तमम् ।
जगामाकाशमाविश्य वन्द्यमानः सुरासुरैः
bhūmiputrastatastasminsthāpayāmāsa śaṅkaram |
gataḥ surālaye loke grahabhāve niveśitaḥ
||8||भूमिपुत्रस्ततस्तस्मिन्स्थापयामास शङ्करम् ।
गतः सुरालये लोके ग्रहभावे निवेशितः
tatra tīrthe tu yaḥ snātvā pūjayetparameśvaram |
hutahomo jitakrodhaḥ so'śvamedhaphalaṃ labhet
||9||तत्र तीर्थे तु यः स्नात्वा पूजयेत्परमेश्वरम् ।
हुतहोमो जितक्रोधः सोऽश्वमेधफलं लभेत्
caturthyaṅgārake yastu snātvā cābhyarcayedgraham |
aṅgārakaṃ vidhānena saptajanmāni bhārata
||10||चतुर्थ्यङ्गारके यस्तु स्नात्वा चाभ्यर्चयेद्ग्रहम् ।
अङ्गारकं विधानेन सप्तजन्मानि भारत
daśayojanavistīrṇe maṇḍale rūpavān bhavet |
tatraiva tā mṛto jantuḥ kāmato'kāmato'pi vā |
rudrasyānucaro bhūtvā tenaiva saha modate
||11||दशयोजनविस्तीर्णे मण्डले रूपवान् भवेत् ।
तत्रैव ता मृतो जन्तुः कामतोऽकामतोऽपि वा ।
रुद्रस्यानुचरो भूत्वा तेनैव सह मोदते
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe aṅgārakatīrthamāhātmyavarṇanaṃ nāma pañcadaśottaraśatatamo'dhyāyaḥ ||