gautameśvaratīrthamāhātmyavarṇanam
śrīmārkaṇḍeya uvāca
revāyā uttare kūle tīrthaṃ paramaśobhanam |
sarvapāpaharaṃ martye nāmnā vai gautameśvaram
||1||रेवाया उत्तरे कूले तीर्थं परमशोभनम् ।
सर्वपापहरं मर्त्ये नाम्ना वै गौतमेश्वरम्
sthāpitaṃ gautamenaiva lokānāṃ hitakāmyayā |
svargasopānarūpaṃ tu tīrthaṃ puṃsāṃ yudhiṣṭhira
||2||स्थापितं गौतमेनैव लोकानां हितकाम्यया ।
स्वर्गसोपानरूपं तु तीर्थं पुंसां युधिष्ठिर
tatra gaccha paraṃ bhaktyā yatra devo jagadguruḥ |
pātakasya vināśārthaṃ svargavāsapradastathā
||3||तत्र गच्छ परं भक्त्या यत्र देवो जगद्गुरुः ।
पातकस्य विनाशार्थं स्वर्गवासप्रदस्तथा
saubhāgyavarddhanaṃ tīrthaṃ jayadaṃ duḥkhanāśanam |
piṇḍadānena caikena kulānāmuddharettrayam
||4||सौभाग्यवर्द्धनं तीर्थं जयदं दुःखनाशनम् ।
पिण्डदानेन चैकेन कुलानामुद्धरेत्त्रयम्
yatkiṃciddīyate bhaktyā svalpaṃ vā yadi vā bahu |
tatsarvaṃ śatasāhasramājñayā gautamasya hi
||5||यत्किंचिद्दीयते भक्त्या स्वल्पं वा यदि वा बहु ।
तत्सर्वं शतसाहस्रमाज्ञया गौतमस्य हि
tīrthānāṃ paramaṃ tīrthaṃ svayaṃ rudreṇa bhāṣitam
||6||तीर्थानां परमं तीर्थं स्वयं रुद्रेण भाषितम्
iti śrīskānde mahāpurāṇa ekāśītisāhasryāṃ saṃhitāyāṃ pañcamāvantyakhaṇḍe revākhaṇḍe gautameśvaratīrthamāhātmyavarṇanaṃ nāma catuḥsaptatitamo'dhyāyaḥ ||