yatra siddho mahābhāgo bhṛguḥ paramakopanaḥ
mārkaṇḍeya uvāca
tato gacchettu rājendra bhṛkuṭeśvaramuttamam |
yatra siddho mahābhāgo bhṛguḥ paramakopanaḥ
||1||ततो गच्छेत्तु राजेन्द्र भृकुटेश्वरमुत्तमम् ।
यत्र सिद्धो महाभागो भृगुः परमकोपनः
tena varṣaśataṃ sāgraṃ tapaścīrṇaṃ purānagha |
putrārthaṃ varayāmāsa putraṃ putravatāṃ varaḥ
||2||तेन वर्षशतं साग्रं तपश्चीर्णं पुरानघ ।
पुत्रार्थं वरयामास पुत्रं पुत्रवतां वरः
varo datto mahābhāga devenāndhakaghātinā |
tatra tīrthe tu yaḥ snātvā pūjayetparameśvaram
||3||वरो दत्तो महाभाग देवेनान्धकघातिना ।
तत्र तीर्थे तु यः स्नात्वा पूजयेत्परमेश्वरम्
agniṣṭomasya yajñasya phalamaṣṭaguṇaṃ labhet |
bhṛkuṭeśaṃ tu yaḥ kaścidghṛtena madhunā saha
||4||अग्निष्टोमस्य यज्ञस्य फलमष्टगुणं लभेत् ।
भृकुटेशं तु यः कश्चिद्घृतेन मधुना सह
putrārthī snāpayedbhaktyā sa labhetputramīpsitam |
tatra tīrthe tu yaḥ snātvā dadyādviprāya kāñcanam
||5||पुत्रार्थी स्नापयेद्भक्त्या स लभेत्पुत्रमीप्सितम् ।
तत्र तीर्थे तु यः स्नात्वा दद्याद्विप्राय काञ्चनम्
godānaṃ vā mahīṃ vāpi tasya puṇyaphalaṃ śṛṇu
||6||गोदानं वा महीं वापि तस्य पुण्यफलं शृणु
sasamudraguhā tena saśailavanakānanā |
dattā pṛthvī na sandehastena sarvā nṛpottama
||7||ससमुद्रगुहा तेन सशैलवनकानना ।
दत्ता पृथ्वी न सन्देहस्तेन सर्वा नृपोत्तम
tena dānena sa svarge krīḍayitvā yathāsukham |
martye bhavati rājendro brāhmaṇo vā supūjitaḥ
||8||तेन दानेन स स्वर्गे क्रीडयित्वा यथासुखम् ।
मर्त्ये भवति राजेन्द्रो ब्राह्मणो वा सुपूजितः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe bhṛkuṭeśvaratīrthamāhātmyavarṇanaṃ nāmāṣṭāviṃśatyuttaraśatatamo'dhyāyaḥ ||