yatra siddho mahānandī tatte sarvaṃ vadāmyaham
śrīmārkaṇḍeya uvāca
tato gacchettu rājendra nandikeśvaramuttamam |
yatra siddho mahānandī tatte sarvaṃ vadāmyaham
||1||ततो गच्छेत्तु राजेन्द्र नन्दिकेश्वरमुत्तमम् ।
यत्र सिद्धो महानन्दी तत्ते सर्वं वदाम्यहम्
revāyāṃ purataḥ kṛtvā purā nandī gaṇeśvaraḥ |
tapastapañjayaṃ kurvaṃstīrthāttīrthaṃ jagāma ha
||2||रेवायां पुरतः कृत्वा पुरा नन्दी गणेश्वरः ।
तपस्तपञ्जयं कुर्वंस्तीर्थात्तीर्थं जगाम ह
dadhiskandaṃ madhuskandaṃ yāvattyaktvā tu gacchati |
tāvattuṣṭo mahādevo nandināthamuvāca ha
||3||दधिस्कन्दं मधुस्कन्दं यावत्त्यक्त्वा तु गच्छति ।
तावत्तुष्टो महादेवो नन्दिनाथमुवाच ह
īśvara uvāca
bhobhoḥ prasanno nandīśa varaṃ vṛṇu yathepsitam |
tapasā tena tuṣṭo'haṃ tīrthayātrākṛtena te
||4||भोभोः प्रसन्नो नन्दीश वरं वृणु यथेप्सितम् ।
तपसा तेन तुष्टोऽहं तीर्थयात्राकृतेन ते
nandīśvara uvāca
na cāhaṃ kāmaye vittaṃ na cāhaṃ kulasantatim |
muktvā na kāmaye kāmaṃ tava pādāmbujātparam
||5||न चाहं कामये वित्तं न चाहं कुलसन्ततिम् ।
मुक्त्वा न कामये कामं तव पादाम्बुजात्परम्
kṛmikīṭapataṅgeṣu tiryagyoniṃ gatasya vā |
janma janmāntare'pyastu bhaktistvayi mamācalā
||6||कृमिकीटपतङ्गेषु तिर्यग्योनिं गतस्य वा ।
जन्म जन्मान्तरेऽप्यस्तु भक्तिस्त्वयि ममाचला
tathetyuktvā mahādevaḥ parayā kṛpayā nṛpa |
gṛhītvā taṃ kare siddhaṃ jagāma nilayaṃ haraḥ
||7||तथेत्युक्त्वा महादेवः परया कृपया नृप ।
गृहीत्वा तं करे सिद्धं जगाम निलयं हरः
tasmiṃstīrthe tu yaḥ snātvā bhaktyā tryakṣaṃ prapūjayet |
agniṣṭomasya yajñasya phalaṃ prāpnoti mānavaḥ
||8||तस्मिंस्तीर्थे तु यः स्नात्वा भक्त्या त्र्यक्षं प्रपूजयेत् ।
अग्निष्टोमस्य यज्ञस्य फलं प्राप्नोति मानवः
tatra tīrthe tu yaḥ snātvā prāṇatyāgaṃ karoti cet |
śivasyānucaro bhūtvā modate kalpamakṣayam
||9||तत्र तीर्थे तु यः स्नात्वा प्राणत्यागं करोति चेत् ।
शिवस्यानुचरो भूत्वा मोदते कल्पमक्षयम्
tataḥ kālena mahatā jāyate vimale kule |
vedavedāṅgatattvajño jīvecca śaradāṃ śatam
||10||ततः कालेन महता जायते विमले कुले ।
वेदवेदाङ्गतत्त्वज्ञो जीवेच्च शरदां शतम्
etatte kathitaṃ tāta tīrthamāhātmyamuttamam |
durlabhaṃ martyasaṃjñasya sarvapāpakṣayaṃkaram
||11||एतत्ते कथितं तात तीर्थमाहात्म्यमुत्तमम् ।
दुर्लभं मर्त्यसंज्ञस्य सर्वपापक्षयंकरम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nandikeśvaratīrthamāhātmyavarṇanaṃ nāmāśītitamo'dhyāyaḥ ||