śrīpativivāhavarṇanam
śrīmārkaṇḍeya uvāca
tacchrutvānāntadevena viśvarūpamudāhṛtam |
devarājastathā devāḥ paraṃ vismayamāgatāḥ
||1||तच्छ्रुत्वानान्तदेवेन विश्वरूपमुदाहृतम् ।
देवराजस्तथा देवाः परं विस्मयमागताः
dṛṣṭvā cāpsarasaṃ puṇyāmurvaśīṃ kamalānanām |
saṃtrasto vismitaścābhūdindro rājaśriyā vṛtaḥ
||2||दृष्ट्वा चाप्सरसं पुण्यामुर्वशीं कमलाननाम् ।
संत्रस्तो विस्मितश्चाभूदिन्द्रो राजश्रिया वृतः
na kiṃciduttaraṃ vākyamuktavāñjoṣamāsthitaḥ |
iti vṛttāntabhūtaṃ hi nārāyaṇaviceṣṭitam
||3||न किंचिदुत्तरं वाक्यमुक्तवाञ्जोषमास्थितः ।
इति वृत्तान्तभूतं हि नारायणविचेष्टितम्
bhṛgoḥ khātyāṃ(?) samutpannā lakṣmīḥ śrutvā tu vai nṛpa |
vaiśvarūpaṃ paraṃ rūpaṃ vismitācintayattadā
||4||भृगोः खात्यां(?) समुत्पन्ना लक्ष्मीः श्रुत्वा तु वै नृप ।
वैश्वरूपं परं रूपं विस्मिताचिन्तयत्तदा
kenopāyena sa syānme bhartā nārāyaṇaḥ prabhuḥ |
vratena tapasā vāpi dānena niyamena ca
||5||केनोपायेन स स्यान्मे भर्ता नारायणः प्रभुः ।
व्रतेन तपसा वापि दानेन नियमेन च
vṛddhānāṃ sevanenātha devatārādhanena vā |
iti cintāparāṃ kanyāṃ satī jñātvā yudhiṣṭhira
||6||वृद्धानां सेवनेनाथ देवताराधनेन वा ।
इति चिन्तापरां कन्यां सती ज्ञात्वा युधिष्ठिर
prāha prāpto mayā bhartā śaṅkarastapasā kila |
prajāpatiśca gāyatryā hyanyābhirabhivāñchitāḥ
||7||प्राह प्राप्तो मया भर्ता शङ्करस्तपसा किल ।
प्रजापतिश्च गायत्र्या ह्यन्याभिरभिवाञ्छिताः
tapasaiva hi te prāpyastasmāttaccara suvrate |
tapastvaṃ hi mahaccograṃ sarvavāñchitadāyakam
||8||तपसैव हि ते प्राप्यस्तस्मात्तच्चर सुव्रते ।
तपस्त्वं हि महच्चोग्रं सर्ववाञ्छितदायकम्
mārkaṇḍeya uvāca
sāgarāntaṃ samāsādya lakṣmīḥ parapuraṃjaya |
cacāra vipulaṃ kālaṃ tapaḥ paramaduścaram
||9||सागरान्तं समासाद्य लक्ष्मीः परपुरंजय ।
चचार विपुलं कालं तपः परमदुश्चरम्
sthāṇuvatsaṃsthitā sābhūddivyaṃ varṣasahasrakam |
tata indrādayo devāḥ śaṅkhacakragadādharāḥ
||10||स्थाणुवत्संस्थिता साभूद्दिव्यं वर्षसहस्रकम् ।
तत इन्द्रादयो देवाः शङ्खचक्रगदाधराः
bhūtvā jagmustadarthaṃ te sā tu pṛṣṭavatī surān |
viśvarūpaṃ vaiṣṇavaṃ yattaddarśayata māciram
||11||भूत्वा जग्मुस्तदर्थं ते सा तु पृष्टवती सुरान् ।
विश्वरूपं वैष्णवं यत्तद्दर्शयत माचिरम्
vilakṣā vrīḍitā devā gatvā nārāyaṇaṃ tadā |
abruvan vaiśvarūpaṃ no śaktā darśayituṃ vayam
||12||विलक्षा व्रीडिता देवा गत्वा नारायणं तदा ।
अब्रुवन् वैश्वरूपं नो शक्ता दर्शयितुं वयम्
tato yatheṣṭaṃ te jagmuḥ sa ca viṣṇuracintayat |
ugrarūpā sthitā devī dehaṃ dahati bhārgavī
||13||ततो यथेष्टं ते जग्मुः स च विष्णुरचिन्तयत् ।
उग्ररूपा स्थिता देवी देहं दहति भार्गवी
tāṃ tasmāttatra gatvāhaṃ varaṃ dattvā tu vāñchitam |
punastapaḥ kariṣyāmi darśayiṣyāmi vā punaḥ |
vaiṣṇavaṃ viśvarūpaṃ yaddurdaśyaṃ devadānavaiḥ
||14||तां तस्मात्तत्र गत्वाहं वरं दत्त्वा तु वाञ्छितम् ।
पुनस्तपः करिष्यामि दर्शयिष्यामि वा पुनः ।
वैष्णवं विश्वरूपं यद्दुर्दश्यं देवदानवैः
mārkaṇḍeya uvāca
tato gatvā hṛṣīkeśaḥ sāgarāntasthitāṃ śriyam |
prāha tuṣṭo'smi te devi varaṃ vṛṇu yathepsitam
||15||ततो गत्वा हृषीकेशः सागरान्तस्थितां श्रियम् ।
प्राह तुष्टोऽस्मि ते देवि वरं वृणु यथेप्सितम्
śrīruvāca
yadi tuṣṭo'si me deva prapannāyā janārdana |
tadā darśaya yaddṛṣṭamapsarobhistavānagha
||16||यदि तुष्टोऽसि मे देव प्रपन्नाया जनार्दन ।
तदा दर्शय यद्दृष्टमप्सरोभिस्तवानघ
viśvarūpamanantaṃ ca bhūtabhāvana keśava |
gandhamādanamāsādya kṛtaṃ yacca tapastvayā
||17||विश्वरूपमनन्तं च भूतभावन केशव ।
गन्धमादनमासाद्य कृतं यच्च तपस्त्वया
tadvadasva vibho viṣṇo na mithyā yadi keśava |
śraddadhāmi na caivāhaṃ rūpasyāsya kathaṃcana
||18||तद्वदस्व विभो विष्णो न मिथ्या यदि केशव ।
श्रद्दधामि न चैवाहं रूपस्यास्य कथंचन
bahubhiryakṣarakṣobhirmāyācāripracāribhiḥ |
chanditā mama jānadbhirbhāvamantargataṃ harau
||19||बहुभिर्यक्षरक्षोभिर्मायाचारिप्रचारिभिः ।
छन्दिता मम जानद्भिर्भावमन्तर्गतं हरौ
bhūtvā viṣṇusvarūpāste cakriṇaśca caturbhujāḥ |
suvrīḍitā gatāḥ sarve viśvarūpo sahāyataḥ
||20||भूत्वा विष्णुस्वरूपास्ते चक्रिणश्च चतुर्भुजाः ।
सुव्रीडिता गताः सर्वे विश्वरूपो सहायतः
mārkaṇḍeya uvāca
nārāyaṇo'tha bhagavāñchaṅkhacakragadābhṛtam |
tayā tathoktastadrūpaṃ muktvā vai surapūjitam
||21||नारायणोऽथ भगवाञ्छङ्खचक्रगदाभृतम् ।
तया तथोक्तस्तद्रूपं मुक्त्वा वै सुरपूजितम्
rūpaṃ paraṃ yathoktaṃ vai viśvarūpamadarśayat |
darśayitvā vacaḥ prāha pañcarātravidhānataḥ
||22||रूपं परं यथोक्तं वै विश्वरूपमदर्शयत् ।
दर्शयित्वा वचः प्राह पञ्चरात्रविधानतः
yo'rcayiṣyati māṃ nityaṃ sa pūjyaḥ sa ca pūjitaḥ |
dhanadhānyasamāyuktaḥ sarvabhogasamanvitaḥ
||23||योऽर्चयिष्यति मां नित्यं स पूज्यः स च पूजितः ।
धनधान्यसमायुक्तः सर्वभोगसमन्वितः
mūlaṃ hi sarvadharmāṇāṃ brahmacaryaṃ paraṃ tapaḥ |
tenāhaṃ tatra sthāsyāmi mūlaśrīpatisaṃjñitaḥ
||24||मूलं हि सर्वधर्माणां ब्रह्मचर्यं परं तपः ।
तेनाहं तत्र स्थास्यामि मूलश्रीपतिसंज्ञितः
mūlaśrīḥ procyate brāhmī brahmacaryasvarūpiṇī |
sarvayogamayī puṇyā sarvapāpaharī śubhā
||25||मूलश्रीः प्रोच्यते ब्राह्मी ब्रह्मचर्यस्वरूपिणी ।
सर्वयोगमयी पुण्या सर्वपापहरी शुभा
patistasyāḥ prabhurahaṃ varadaḥ prāṇināṃ priye |
revājale naraḥ snātvā yo'rcayenmāṃ yatavrataḥ
||26||पतिस्तस्याः प्रभुरहं वरदः प्राणिनां प्रिये ।
रेवाजले नरः स्नात्वा योऽर्चयेन्मां यतव्रतः
mūlaśrīpatināmānaṃ vāñchite prāpnuyātphalam |
dānāni tatra yo dadyānmahādānāni ca priye
||27||मूलश्रीपतिनामानं वाञ्छिते प्राप्नुयात्फलम् ।
दानानि तत्र यो दद्यान्महादानानि च प्रिये
sahasraguṇitaṃ puṇyamanyasthānādavāpyate |
dṛṣṭaṃ tvayā tatra deśe samyakcaivāvadhāritam |
tadarcitvā parān kāmānāpsyasi tvaṃ na saṃśayaḥ
||28||सहस्रगुणितं पुण्यमन्यस्थानादवाप्यते ।
दृष्टं त्वया तत्र देशे सम्यक्चैवावधारितम् ।
तदर्चित्वा परान् कामानाप्स्यसि त्वं न संशयः
varaṃ vṛṇīṣva deveśi vāñchitaṃ durlabhaṃ suraiḥ |
durgasaṃsārakāntārapatitaiḥ parameśvari
||29||वरं वृणीष्व देवेशि वाञ्छितं दुर्लभं सुरैः ।
दुर्गसंसारकान्तारपतितैः परमेश्वरि
śrīruvāca
nārāyaṇa jagaddhātarnārāyaṇa jagatpate |
nārāyaṇa parabrahma nārāyaṇaparāyaṇa
||30||नारायण जगद्धातर्नारायण जगत्पते ।
नारायण परब्रह्म नारायणपरायण
prasīda pāhi māṃ bhaktyā samyaksarge niyojaya |
priyo hyasi priyāhaṃ te yathā syāṃ tattathā kuru
||31||प्रसीद पाहि मां भक्त्या सम्यक्सर्गे नियोजय ।
प्रियो ह्यसि प्रियाहं ते यथा स्यां तत्तथा कुरु
gṛhaṃ dharmārthakāmānāṃ kāraṇaṃ deva saṃmatam |
tadāsthāyāśramaṃ puṇyaṃ māṃ śreyasi niyojaya
||32||गृहं धर्मार्थकामानां कारणं देव संमतम् ।
तदास्थायाश्रमं पुण्यं मां श्रेयसि नियोजय
nārāyaṇa uvāca
nārāyaṇagirā devi vijñapto'smi yatastvayā |
nārāyaṇagirirnāma tena me'tra bhaviṣyati
||33||नारायणगिरा देवि विज्ञप्तोऽस्मि यतस्त्वया ।
नारायणगिरिर्नाम तेन मेऽत्र भविष्यति
nārāyaṇasmṛtau yāti duritaṃ janmakoṭijam |
yasmādgirati tasmācca girirityeva śabditam
||34||नारायणस्मृतौ याति दुरितं जन्मकोटिजम् ।
यस्माद्गिरति तस्माच्च गिरिरित्येव शब्दितम्
tasmātsarvāśrayo devi giriḥ parvatarāṅbhavet |
surāsuramanuṣyāṇāṃ yathāhamapi cāśrayaḥ
||35||तस्मात्सर्वाश्रयो देवि गिरिः पर्वतराङ्भवेत् ।
सुरासुरमनुष्याणां यथाहमपि चाश्रयः
ya etatpūjayiṣyanti maṇḍalasthaṃ paraṃ mama |
nārāyaṇagirirnāma devarūpaṃ śubhekṣaṇe
||36||य एतत्पूजयिष्यन्ति मण्डलस्थं परं मम ।
नारायणगिरिर्नाम देवरूपं शुभेक्षणे
te divyajñānasampannā divyadehaviceṣṭitāḥ |
divyaṃ lokamavāpsyanti divyabhogasamanvitāḥ
||37||ते दिव्यज्ञानसम्पन्ना दिव्यदेहविचेष्टिताः ।
दिव्यं लोकमवाप्स्यन्ति दिव्यभोगसमन्विताः
mārkaṇḍeya uvāca
tayorevaṃ saṃvadatordevā indrapurogamāḥ |
samāgatā vanoddeśaṃ sāgarānte maharṣayaḥ
||38||तयोरेवं संवदतोर्देवा इन्द्रपुरोगमाः ।
समागता वनोद्देशं सागरान्ते महर्षयः
tato bhṛguṃ devarājo nārāyaṇavicintitam |
vavre jñātvā tu tatkanyāṃ dharmātmā sa dadau ca tām
||39||ततो भृगुं देवराजो नारायणविचिन्तितम् ।
वव्रे ज्ञात्वा तु तत्कन्यां धर्मात्मा स ददौ च ताम्
dharmo'pi vidhivadvatsa vivāhaṃ samakārayat |
devadevasya rājarṣe devatārthe samāhitaḥ
||40||धर्मोऽपि विधिवद्वत्स विवाहं समकारयत् ।
देवदेवस्य राजर्षे देवतार्थे समाहितः
yudhiṣṭhira uvāca
dharmo vivāhamakarodvidhivadyattvayoditam |
ko vidhistatra kā dattā dakṣiṇā bhṛguṇāpi ca
||41||धर्मो विवाहमकरोद्विधिवद्यत्त्वयोदितम् ।
को विधिस्तत्र का दत्ता दक्षिणा भृगुणापि च
vivāhayajñe samabhūtsruksruvagrahaṇe ca kaḥ |
ṛtvijaḥ ke sadasyāśca tasyāsan dvijasattama
||42||विवाहयज्ञे समभूत्स्रुक्स्रुवग्रहणे च कः ।
ऋत्विजः के सदस्याश्च तस्यासन् द्विजसत्तम
kiṃ tasyāvabhṛthaṃ tvāsīttatsarvaṃ vada vistarāt |
tvadvākyāmṛtapānena tṛptirmama na vidyate
||43||किं तस्यावभृथं त्वासीत्तत्सर्वं वद विस्तरात् ।
त्वद्वाक्यामृतपानेन तृप्तिर्मम न विद्यते
mārkaṇḍeya uvāca
nārāyaṇavivāhasya yajñasya ca yudhiṣṭhira |
tapasastasya devasya samyagācaraṇasya ca
||44||नारायणविवाहस्य यज्ञस्य च युधिष्ठिर ।
तपसस्तस्य देवस्य सम्यगाचरणस्य च
vaktuṃ samartho na guṇānbrahmāpi parameśvaraḥ |
tathāpyuddeśato vacmi śṛṇu bhūtvā samāhitaḥ
||45||वक्तुं समर्थो न गुणान्ब्रह्मापि परमेश्वरः ।
तथाप्युद्देशतो वच्मि शृणु भूत्वा समाहितः
brahmā saptarṣayastatra sruksruvagrahaṇe ratāḥ |
agnīñjuhuvire rājanvedirdhātrī sasāgarā
||46||ब्रह्मा सप्तर्षयस्तत्र स्रुक्स्रुवग्रहणे रताः ।
अग्नीञ्जुहुविरे राजन्वेदिर्धात्री ससागरा
daduḥ samudrā ratnāni brahmarṣibhyo nṛpottama |
dhanado'pi dadau vittaṃ sarvabrāhmaṇavāñchitam
||47||ददुः समुद्रा रत्नानि ब्रह्मर्षिभ्यो नृपोत्तम ।
धनदोऽपि ददौ वित्तं सर्वब्राह्मणवाञ्छितम्
viśvakarmā'pi devānāṃ brahmarṣīṇāṃ paraṃtapa |
veśmāni suvicitrāṇi sarvaratnamayāni ca
||48||विश्वकर्माऽपि देवानां ब्रह्मर्षीणां परंतप ।
वेश्मानि सुविचित्राणि सर्वरत्नमयानि च
kṛtvā pradarśayāmāsa devendrāya yaśasvine |
śatakratustato viprānkāpiṣṭhalapurogamān
||49||कृत्वा प्रदर्शयामास देवेन्द्राय यशस्विने ।
शतक्रतुस्ततो विप्रान्कापिष्ठलपुरोगमान्
śaunakādīṃśca papraccha baṣkalāñchāgalānapi |
ātreyānapi rājendra vṛṇudhvamabhivāñchitam
||50||शौनकादींश्च पप्रच्छ बष्कलाञ्छागलानपि ।
आत्रेयानपि राजेन्द्र वृणुध्वमभिवाञ्छितम्
dṛṣṭvā te citraratnāni prāhuḥ sarveśvareśvaram |
devānāṃ ca ṛṣīṇāṃ ca saṅgamo'yaṃ supuṇyakṛt
||51||दृष्ट्वा ते चित्ररत्नानि प्राहुः सर्वेश्वरेश्वरम् ।
देवानां च ऋषीणां च सङ्गमोऽयं सुपुण्यकृत्
asminpuṇye sureśāna vastuṃ vāñchāmahe sadā |
śatakratuḥ prāha punarvāso vātra bhaviṣyati |
satyadharmaratā yūyaṃ yāvatkālaṃ bhaviṣyatha
||52||अस्मिन्पुण्ये सुरेशान वस्तुं वाञ्छामहे सदा ।
शतक्रतुः प्राह पुनर्वासो वात्र भविष्यति ।
सत्यधर्मरता यूयं यावत्कालं भविष्यथ
mārkaṇḍeya uvāca
pṛṣṭaṃ yadrājaśārdūla ke makhe hotriṇo'bhavan |
tatprocyamānamadhunā śṛṇu bhūtvā samāhitaḥ
||53||पृष्टं यद्राजशार्दूल के मखे होत्रिणोऽभवन् ।
तत्प्रोच्यमानमधुना शृणु भूत्वा समाहितः
sanatkumārapramukhāḥ sadasyāstasya cābhavan |
audgātramatryaṅgirasau marīciśca cakāra ha
||54||सनत्कुमारप्रमुखाः सदस्यास्तस्य चाभवन् ।
औद्गात्रमत्र्यङ्गिरसौ मरीचिश्च चकार ह
hautraṃ dharmavasiṣṭhau ca brahmatvaṃ sanako muniḥ |
ṣaṭtriṃśadgrāmasāhasraṃ prādāttebhyaḥ śatakratuḥ
||55||हौत्रं धर्मवसिष्ठौ च ब्रह्मत्वं सनको मुनिः ।
षट्त्रिंशद्ग्रामसाहस्रं प्रादात्तेभ्यः शतक्रतुः
lakṣmīrbhartrā ca saṃyuktābhavattatkṛtavānprabhuḥ |
brahmaṇo juhvato vahniṃ yāvaddeśasthitaiḥ suraiḥ
||56||लक्ष्मीर्भर्त्रा च संयुक्ताभवत्तत्कृतवान्प्रभुः ।
ब्रह्मणो जुह्वतो वह्निं यावद्देशस्थितैः सुरैः
dṛṣṭaṃ lalāṭaṃ deśo'sau lalāṭa iti saṃjñitaḥ |
sa deśaḥ śrīpateḥ kṣetrapuṇyaṃ devarṣisevitam
||57||दृष्टं ललाटं देशोऽसौ ललाट इति संज्ञितः ।
स देशः श्रीपतेः क्षेत्रपुण्यं देवर्षिसेवितम्
sarvāścaryamayaṃ divyaṃ divyasiddhisamanvitam |
brāhmaṇānāṃ tataḥ paṅktiṃ niveśayitumudyatā
||58||सर्वाश्चर्यमयं दिव्यं दिव्यसिद्धिसमन्वितम् ।
ब्राह्मणानां ततः पङ्क्तिं निवेशयितुमुद्यता
lakṣmīḥ śrīpatināmānamāha devaṃ vacastadā |
śrīruvāca - ya ete brāhmaṇāḥ śiṣyā bhṛgvādīnāṃ yatavratāḥ
||59||लक्ष्मीः श्रीपतिनामानमाह देवं वचस्तदा ।
श्रीरुवाच - य एते ब्राह्मणाः शिष्या भृग्वादीनां यतव्रताः
tānniveśayitumicchāmi tvatprasādādadhokṣaja |
marīcyādayaḥ surendreṇa sthāpitā garuḍadhvaja
||60||तान्निवेशयितुमिच्छामि त्वत्प्रसादादधोक्षज ।
मरीच्यादयः सुरेन्द्रेण स्थापिता गरुडध्वज
naiṣṭhikavratino viprā bahavo'tra yatavratāḥ |
prājāpatye vrate brāhme kecidatra vyavasthitāḥ |
tānahaṃ sthāpayiṣyāmi tvatprasādādadhokṣaja
||61||नैष्ठिकव्रतिनो विप्रा बहवोऽत्र यतव्रताः ।
प्राजापत्ये व्रते ब्राह्मे केचिदत्र व्यवस्थिताः ।
तानहं स्थापयिष्यामि त्वत्प्रसादादधोक्षज
mārkaṇḍeya uvāca
tataḥ kautūhaladharo bhagavānvṛṣabhadhvajaḥ |
papraccha vratinaḥ sarvānvṛttibhede vyavasthitān
||62||ततः कौतूहलधरो भगवान्वृषभध्वजः ।
पप्रच्छ व्रतिनः सर्वान्वृत्तिभेदे व्यवस्थितान्
nārado'pi mahādevamupetya ca satīpatim |
prāha kṛṣṇājinadharo naiṣṭhikā brāhmaṇā hyamī
||63||नारदोऽपि महादेवमुपेत्य च सतीपतिम् ।
प्राह कृष्णाजिनधरो नैष्ठिका ब्राह्मणा ह्यमी
amī kāryāḥ suvastreṇa channaguhyā dvijottamāḥ |
prājāpatyāścaturviṃśasahasrāṇi nareśvara
||64||अमी कार्याः सुवस्त्रेण छन्नगुह्या द्विजोत्तमाः ।
प्राजापत्याश्चतुर्विंशसहस्राणि नरेश्वर
brahmacaryavratasthānāṃ vratabrahmavicāriṇām |
dvādaśaiṣāṃ sahasrāṇi santi vai vṛṣabhadhvaja
||65||ब्रह्मचर्यव्रतस्थानां व्रतब्रह्मविचारिणाम् ।
द्वादशैषां सहस्राणि सन्ति वै वृषभध्वज
nāradasya vacaḥ śrutvā devā devarṣayo'pi ca |
sādhu sādhvityamanyanta nocuḥ kecana kiṃcana
||66||नारदस्य वचः श्रुत्वा देवा देवर्षयोऽपि च ।
साधु साध्वित्यमन्यन्त नोचुः केचन किंचन
samāhvayattato lakṣmīstān viprān bhaktisaṃyutā |
uvāca caraṇāngṛhya prasādaḥ kriyatāṃ mayi
||67||समाह्वयत्ततो लक्ष्मीस्तान् विप्रान् भक्तिसंयुता ।
उवाच चरणान्गृह्य प्रसादः क्रियतां मयि
ṣaṭtriṃśacca sahasrāṇi veśmanāmatra saṃsthitiḥ |
viśvakarmakṛtānāṃ tu teṣu tiṣṭhantu vo'khilāḥ
||68||षट्त्रिंशच्च सहस्राणि वेश्मनामत्र संस्थितिः ।
विश्वकर्मकृतानां तु तेषु तिष्ठन्तु वोऽखिलाः
te tatheti pratijñāya sthitāḥ saṃprītamānasāḥ |
dhanadhānyasamṛddhāśca vāñchitaprāptilakṣaṇāḥ |
sarvakāmasamṛddhāśca hyanārambheṣu karmaṇām
||69||ते तथेति प्रतिज्ञाय स्थिताः संप्रीतमानसाः ।
धनधान्यसमृद्धाश्च वाञ्छितप्राप्तिलक्षणाः ।
सर्वकामसमृद्धाश्च ह्यनारम्भेषु कर्मणाम्
iti saṃsthāpya tān viprān sā sthitā paryapālayat |
caturdhā tu sthito viṣṇuḥ śriyā devyāḥ priye rataḥ
||70||इति संस्थाप्य तान् विप्रान् सा स्थिता पर्यपालयत् ।
चतुर्धा तु स्थितो विष्णुः श्रिया देव्याः प्रिये रतः
evaṃ vaivāhikamakhe nivṛtte ṛṣayastu tam |
ūcuścāvabhṛthasnānaṃ kutra kurmo janārdana
||71||एवं वैवाहिकमखे निवृत्ते ऋषयस्तु तम् ।
ऊचुश्चावभृथस्नानं कुत्र कुर्मो जनार्दन
iti śrutvā tu vacanaṃ śrīpatiḥ pādapaṅkajāt |
mumoca jāhnavītoyaṃ revāmadhyagamaṃ śuci
||72||इति श्रुत्वा तु वचनं श्रीपतिः पादपङ्कजात् ।
मुमोच जाह्नवीतोयं रेवामध्यगमं शुचि
hareḥ pādodakaṃ dṛṣṭvā niḥsṛtaṃ munayastu te |
vismitāḥ samapadyanta jānantastasya gauravam
||73||हरेः पादोदकं दृष्ट्वा निःसृतं मुनयस्तु ते ।
विस्मिताः समपद्यन्त जानन्तस्तस्य गौरवम्
rudreṇa sahitāḥ sarve devatā ṛṣayastathā |
saṃkathā vismitāścakrurvidhunvantaḥ śirāṃsi ca
||74||रुद्रेण सहिताः सर्वे देवता ऋषयस्तथा ।
संकथा विस्मिताश्चक्रुर्विधुन्वन्तः शिरांसि च
ṛṣaya ūcuḥ
brūhi śambho kimatrāyaṃ akasmādvārisambhavaḥ |
viṣṇoḥ pādāmbujotthaśca sammohakaraṇaḥ paraḥ
||75||ब्रूहि शम्भो किमत्रायं अकस्माद्वारिसम्भवः ।
विष्णोः पादाम्बुजोत्थश्च सम्मोहकरणः परः
īśvara uvāca
pādodakamidaṃ viṣṇorahaṃ jānāmi vai surāḥ |
daśāśvamedhāvabhṛthaiḥ snānamatrātiricyate
||76||पादोदकमिदं विष्णोरहं जानामि वै सुराः ।
दशाश्वमेधावभृथैः स्नानमत्रातिरिच्यते
yuṣmābhiḥ śrīpatiḥ pūjyaḥ snānaṃ cāvabhṛthaṃ kutaḥ |
bhaviṣyatīti tenāśu idaṃ vo'rthe vinirmitam
||77||युष्माभिः श्रीपतिः पूज्यः स्नानं चावभृथं कुतः ।
भविष्यतीति तेनाशु इदं वोऽर्थे विनिर्मितम्
snātvātra tridaśeśānā yatphalaṃ samprapadyate |
vaktuṃ na kenacidyāti tataḥ kimuttaraṃ vacaḥ
||78||स्नात्वात्र त्रिदशेशाना यत्फलं सम्प्रपद्यते ।
वक्तुं न केनचिद्याति ततः किमुत्तरं वचः
mārkaṇḍeya uvāca
evamuktvā tu te sarve snānaṃ kṛtvā yathāgatam |
jagmurdevā maheśānapurogā bharatarṣabha
||79||एवमुक्त्वा तु ते सर्वे स्नानं कृत्वा यथागतम् ।
जग्मुर्देवा महेशानपुरोगा भरतर्षभ
brāhmaṇāśca tataḥ sarve svaveśmānyeva bhejire |
devatīrthe mahārāja sarvapāpapraṇāśane
||80||ब्राह्मणाश्च ततः सर्वे स्ववेश्मान्येव भेजिरे ।
देवतीर्थे महाराज सर्वपापप्रणाशने
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śrīpativivāhavarṇanaṃ nāma caturnavatyuttaraśatatamo'dhyāyaḥ ||