ādivārāhatīrthamāhātmyavarṇanam
śrīmārkaṇḍeya uvāca
tato gacchettu rājendra uttare narmadātaṭe |
sarvapāpaharaṃ tīrthaṃ vārāhaṃ nāma nāmataḥ
||1||ततो गच्छेत्तु राजेन्द्र उत्तरे नर्मदातटे ।
सर्वपापहरं तीर्थं वाराहं नाम नामतः
tatra devo jagaddhātā vārāhaṃ rūpamāsthitaḥ |
sthito lokahitārthāya saṃsārārṇavatārakaḥ
||2||तत्र देवो जगद्धाता वाराहं रूपमास्थितः ।
स्थितो लोकहितार्थाय संसारार्णवतारकः
tatra tīrthe tu yaḥ snātvā pūjayeddharaṇīdharam |
gandhamālyaviśeṣaiśca jayaśabdādimaṅgalaiḥ
||3||तत्र तीर्थे तु यः स्नात्वा पूजयेद्धरणीधरम् ।
गन्धमाल्यविशेषैश्च जयशब्दादिमङ्गलैः
upavāsaparo bhūtvā dvādaśyāṃ nṛpasattama |
vṛṣalāḥ pāpakarmāṇastathaivāndhapiśācinaḥ
||4||उपवासपरो भूत्वा द्वादश्यां नृपसत्तम ।
वृषलाः पापकर्माणस्तथैवान्धपिशाचिनः
ālāpādgātrasaṃparkānniḥśvāsātsahabhojanāt |
pāpaṃ saṃkramate yasmāttasmāttān parivarjayet
||5||आलापाद्गात्रसंपर्कान्निःश्वासात्सहभोजनात् ।
पापं संक्रमते यस्मात्तस्मात्तान् परिवर्जयेत्
brāhmaṇān pūjayedbhaktyā yathāśaktyā yathāvidhi |
rātrau jāgaraṇaṃ kāryaṃ kathāyāṃ tatra bhārata
||6||ब्राह्मणान् पूजयेद्भक्त्या यथाशक्त्या यथाविधि ।
रात्रौ जागरणं कार्यं कथायां तत्र भारत
prabhāte vimale snātvā tatra tīrthe jagadgurum |
ye paśyanti jitakrodhāste muktāḥ sarvapātakaiḥ
||7||प्रभाते विमले स्नात्वा तत्र तीर्थे जगद्गुरुम् ।
ये पश्यन्ति जितक्रोधास्ते मुक्ताः सर्वपातकैः
yathā tu dṛṣṭvā bhujagāḥ suparṇaṃ naśyanti muktvā viṣamugratejaḥ |
naśyanti pāpāni tathaiva śīghraṃ dṛṣṭvā mukhaṃ śūkararūpiṇastu
||8||यथा तु दृष्ट्वा भुजगाः सुपर्णं नश्यन्ति मुक्त्वा विषमुग्रतेजः ।
नश्यन्ति पापानि तथैव शीघ्रं दृष्ट्वा मुखं शूकररूपिणस्तु
nabhogataṃ naśyati cāndhakāraṃ dṛṣṭvā raviṃ devavaraṃ tathaiva |
naśyanti pāpāni sudustarāṇi dṛṣṭvā mukhaṃ pārtha dharādharasya
||9||नभोगतं नश्यति चान्धकारं दृष्ट्वा रविं देववरं तथैव ।
नश्यन्ति पापानि सुदुस्तराणि दृष्ट्वा मुखं पार्थ धराधरस्य
kiṃ tasya bahubhirmantrairbhaktiryasya janārdane |
namo nārāyaṇāyeti mantraḥ sarvārthasādhakaḥ
||10||किं तस्य बहुभिर्मन्त्रैर्भक्तिर्यस्य जनार्दने ।
नमो नारायणायेति मन्त्रः सर्वार्थसाधकः
eko'pi kṛṣṇasya kṛtaḥ praṇāmo daśāśvamedhāvabhṛthena tulyaḥ |
daśāśvamedhī punareti janma kṛṣṇapraṇāmī na punarbhavāya
||11||एकोऽपि कृष्णस्य कृतः प्रणामो दशाश्वमेधावभृथेन तुल्यः ।
दशाश्वमेधी पुनरेति जन्म कृष्णप्रणामी न पुनर्भवाय
dhyāyamānā mahātmāno rūpaṃ nārāyaṇaṃ hareḥ |
ye tyajanti svakaṃ dehaṃ tatra tīrthe jitendriyāḥ
||12||ध्यायमाना महात्मानो रूपं नारायणं हरेः ।
ये त्यजन्ति स्वकं देहं तत्र तीर्थे जितेन्द्रियाः
te gacchantyamalaṃ sthānaṃ yatsurairapi durlabham |
kṣarākṣaravinirmuktaṃ tadviṣṇoḥ paramaṃ padam
||13||ते गच्छन्त्यमलं स्थानं यत्सुरैरपि दुर्लभम् ।
क्षराक्षरविनिर्मुक्तं तद्विष्णोः परमं पदम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ādivārāhatīrthamāhātmyavarṇanaṃ nāma dvātriṃśadadhikaśatatamo'dhyāyaḥ ||