sthāpitaṃ kapilenaiva sarvapātakanāśanam
śrīmārkaṇḍeya uvāca
tasyaivānantaraṃ pārtha kāpilaṃ tīrthamāśrayet |
sthāpitaṃ kapilenaiva sarvapātakanāśanam
||1||तस्यैवानन्तरं पार्थ कापिलं तीर्थमाश्रयेत् ।
स्थापितं कपिलेनैव सर्वपातकनाशनम्
aṣṭamyāṃ ca site pakṣe caturdaśyāṃ nareśvara |
snāpayetparayā bhaktyā kapilākṣīrasarpiṣā
||2||अष्टम्यां च सिते पक्षे चतुर्दश्यां नरेश्वर ।
स्नापयेत्परया भक्त्या कपिलाक्षीरसर्पिषा
śrīkhaṇḍena sugandhena guṇṭhayeta maheśvaram |
tataḥ sugandhapuṣpaiśca śvetaiśca nṛpasattama
||3||श्रीखण्डेन सुगन्धेन गुण्ठयेत महेश्वरम् ।
ततः सुगन्धपुष्पैश्च श्वेतैश्च नृपसत्तम
ye'rcayanti jitakrodhā na te yānti yamālayam |
asipattravanaṃ ghoraṃ yamaculhī sudāruṇā
||4||येऽर्चयन्ति जितक्रोधा न ते यान्ति यमालयम् ।
असिपत्त्रवनं घोरं यमचुल्ही सुदारुणा
dṛśyate naiva vidvadbhiḥ kapileśvarapūjanāt |
snātvā revājale puṇye bhojayedbrāhmaṇāñchubhān
||5||दृश्यते नैव विद्वद्भिः कपिलेश्वरपूजनात् ।
स्नात्वा रेवाजले पुण्ये भोजयेद्ब्राह्मणाञ्छुभान्
gopradānena vastreṇa tiladānena bhārata |
chatraśayyāpradānena rājā bhavati dhārmikaḥ
||6||गोप्रदानेन वस्त्रेण तिलदानेन भारत ।
छत्रशय्याप्रदानेन राजा भवति धार्मिकः
tīvratejā vighoraśca jīvatputraḥ priyaṃvadaḥ |
śatruvargo na tasya syātkadācitpāṇḍunandana
||7||तीव्रतेजा विघोरश्च जीवत्पुत्रः प्रियंवदः ।
शत्रुवर्गो न तस्य स्यात्कदाचित्पाण्डुनन्दन
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kapileśvaratīrthamāhātmyavarṇanaṃ nāmāṣṭāśītitamo'dhyāyaḥ ||