kākūcchvāsastaraṃstoyaṃ bāhubhyāṃ nṛpasattama
śrīmārkaṇḍeya uvāca
tatastvekārṇave tasminmumūrṣurahamāturaḥ |
kākūcchvāsastaraṃstoyaṃ bāhubhyāṃ nṛpasattama
||1||ततस्त्वेकार्णवे तस्मिन्मुमूर्षुरहमातुरः ।
काकूच्छ्वासस्तरंस्तोयं बाहुभ्यां नृपसत्तम
śṛṇomyarṇavamadhyastho niḥśabdastimite tadā |
ambhoravamanaupamyaṃ diśo daśa vinādinam
||2||शृणोम्यर्णवमध्यस्थो निःशब्दस्तिमिते तदा ।
अम्भोरवमनौपम्यं दिशो दश विनादिनम्
haṃsakudendusaṃkāśāṃ hāragokṣīrapāṇḍurām |
nānāratnavicitrāṅgīṃ svarṇaśṛṅgāṃ manoramām
||3||हंसकुदेन्दुसंकाशां हारगोक्षीरपाण्डुराम् ।
नानारत्नविचित्राङ्गीं स्वर्णशृङ्गां मनोरमाम्
suraiḥ pravālakamayairlāṅguladhvajaśobhitām |
pralambaghoṇāṃ nardantīṃ khurairarṇavagāhinīm
||4||सुरैः प्रवालकमयैर्लाङ्गुलध्वजशोभिताम् ।
प्रलम्बघोणां नर्दन्तीं खुरैरर्णवगाहिनीम्
gāṃ dadarśāhamudvigno māmevābhimukhīṃ sthitām |
kiṃkiṇījālamuktābhiḥ svarṇaghaṇṭāsamāvṛtām
||5||गां ददर्शाहमुद्विग्नो मामेवाभिमुखीं स्थिताम् ।
किंकिणीजालमुक्ताभिः स्वर्णघण्टासमावृताम्
tasyāścaraṇavikṣepaiḥ sarvamekārṇavaṃ jalam |
vikṣiptaphenapuñjaughairnṛtyantīva samaṃ tataḥ
||6||तस्याश्चरणविक्षेपैः सर्वमेकार्णवं जलम् ।
विक्षिप्तफेनपुञ्जौघैर्नृत्यन्तीव समं ततः
rarāsa salilotkṣepaiḥ kṣobhayantī mahārṇavam |
sā māmāha mahābhāga ślakṣṇagambhīrayā girā
||7||ररास सलिलोत्क्षेपैः क्षोभयन्ती महार्णवम् ।
सा मामाह महाभाग श्लक्ष्णगम्भीरया गिरा
mā bhaiṣīrvatsa vatseti mṛtyustava na vidyate |
mahādevaprasādena na mṛtyuste mamāpi ca
||8||मा भैषीर्वत्स वत्सेति मृत्युस्तव न विद्यते ।
महादेवप्रसादेन न मृत्युस्ते ममापि च
mamāśrayasva lāṅgūlaṃ tvāmatastārayāmyaham |
ghorādasmādbhayādvipra yāvatsaṃplavate jagat
||9||ममाश्रयस्व लाङ्गूलं त्वामतस्तारयाम्यहम् ।
घोरादस्माद्भयाद्विप्र यावत्संप्लवते जगत्
kṣuttṛṣāpratighātārthaṃ stanau me tvaṃ pibasva ha |
payo'mṛtāśrayaṃ divyaṃ tatpītvā nirvṛto bhava
||10||क्षुत्तृषाप्रतिघातार्थं स्तनौ मे त्वं पिबस्व ह ।
पयोऽमृताश्रयं दिव्यं तत्पीत्वा निर्वृतो भव
tasyāstadvacanaṃ śrutvā harṣātpīto mayā stanaḥ |
na kṣuttṛṣā pītamātre stane mahyaṃ tadābhavat
||11||तस्यास्तद्वचनं श्रुत्वा हर्षात्पीतो मया स्तनः ।
न क्षुत्तृषा पीतमात्रे स्तने मह्यं तदाभवत्
divyaṃ prāṇabalaṃ jajñe samudraplavanakṣamam |
tatastāṃ pratyuvācedaṃ kā tvamekārṇavīkṛte
||12||दिव्यं प्राणबलं जज्ञे समुद्रप्लवनक्षमम् ।
ततस्तां प्रत्युवाचेदं का त्वमेकार्णवीकृते
bhramase brūhi tattvena vismayo me mahānhṛdi |
bhramato'tra mamārtasya mumūrṣoḥ prahatasya
||13||भ्रमसे ब्रूहि तत्त्वेन विस्मयो मे महान्हृदि ।
भ्रमतोऽत्र ममार्तस्य मुमूर्षोः प्रहतस्य
tvaṃ hi me śaraṇaṃ jātā bhāgyaśeṣeṇa suvrate
||14||त्वं हि मे शरणं जाता भाग्यशेषेण सुव्रते
gauruvāca
kimahaṃ vismṛtā tubhyaṃ viśvarūpā maheśvarī |
narmadā dharmadā nḥṇāṃ svargaśarmabalapradā
||15||किमहं विस्मृता तुभ्यं विश्वरूपा महेश्वरी ।
नर्मदा धर्मदा न्ःणां स्वर्गशर्मबलप्रदा
dṛṣṭvā tvāṃ sīdamānaṃ tu rudreṇāhaṃ visarjitā |
taṃ dvijaṃ tārayasvārye mā prāṇāṃstyajatāṃ jale
||16||दृष्ट्वा त्वां सीदमानं तु रुद्रेणाहं विसर्जिता ।
तं द्विजं तारयस्वार्ये मा प्राणांस्त्यजतां जले
gorūpeṇa vibhorvākyāttvatsakāśamihāgatā |
mā mṛṣāvacanaḥ śambhurbhavediti ca satvarā
||17||गोरूपेण विभोर्वाक्यात्त्वत्सकाशमिहागता ।
मा मृषावचनः शम्भुर्भवेदिति च सत्वरा
evamuktastayāhaṃ tu indrāyudhanibhaṃ śubham |
lāṅgūlamavyayaṃ jñātvā bhujābhyāmavalambitaḥ
||18||एवमुक्तस्तयाहं तु इन्द्रायुधनिभं शुभम् ।
लाङ्गूलमव्ययं ज्ञात्वा भुजाभ्यामवलम्बितः
tato'taraṃ taṃ jaladhiṃ lāṅgūladhvajamāśritaḥ |
asau devo mahādeva iti māṃ pratyabhāṣata
||19||ततोऽतरं तं जलधिं लाङ्गूलध्वजमाश्रितः ।
असौ देवो महादेव इति मां प्रत्यभाषत
tato yugasahasrāntamahaṃ kālaṃ tayā saha |
vyacaraṃ vai tamobhūte sarvataḥ salilāvṛte
||20||ततो युगसहस्रान्तमहं कालं तया सह ।
व्यचरं वै तमोभूते सर्वतः सलिलावृते
mahārṇave tatastasmin bhramangoḥ pucchamāśritaḥ |
nirvāte cāndhakāre ca nirāloke nirāmaye
||21||महार्णवे ततस्तस्मिन् भ्रमन्गोः पुच्छमाश्रितः ।
निर्वाते चान्धकारे च निरालोके निरामये
akasmātsalile tasminnatasīpuṣpasannibham |
vibhinnāṃjanasaṅkāśamākāśamiva nirmalam
||22||अकस्मात्सलिले तस्मिन्नतसीपुष्पसन्निभम् ।
विभिन्नांजनसङ्काशमाकाशमिव निर्मलम्
nīlotpaladalaśyāmaṃ pītavāsasamavyayam |
kirīṭenārkavarṇena vidyudvidyotakāriṇā
||23||नीलोत्पलदलश्यामं पीतवाससमव्ययम् ।
किरीटेनार्कवर्णेन विद्युद्विद्योतकारिणा
bhrājamānena śirasā khamivātyantarūpiṇam |
kuṇḍaloddhaṣṭagallaṃ tu hāroddyotitavakṣasam
||24||भ्राजमानेन शिरसा खमिवात्यन्तरूपिणम् ।
कुण्डलोद्धष्टगल्लं तु हारोद्द्योतितवक्षसम्
jāmbūnadamayairdivyairbhūṣaṇairupaśobhitam |
nāgopadhānaśayanaṃ sahasrādityavarcasam
||25||जाम्बूनदमयैर्दिव्यैर्भूषणैरुपशोभितम् ।
नागोपधानशयनं सहस्रादित्यवर्चसम्
anekabāhūrudharaṃ naikavaktraṃ manoramam |
suptamekārṇave vīraṃ sahasrākṣaśirodharam
||26||अनेकबाहूरुधरं नैकवक्त्रं मनोरमम् ।
सुप्तमेकार्णवे वीरं सहस्राक्षशिरोधरम्
jaṭājūṭena mahatā sphuradvidyutsamārciṣā |
ekārṇavaṃ jagatsarvaṃ vyāpya devaṃ vyavasthitam
||27||जटाजूटेन महता स्फुरद्विद्युत्समार्चिषा ।
एकार्णवं जगत्सर्वं व्याप्य देवं व्यवस्थितम्
grasitvā śaṅkaraḥ sarvaṃ sadevāsuramānavam |
prapaśyāmyahamīśānaṃ suptamekārṇave prabhum
||28||ग्रसित्वा शङ्करः सर्वं सदेवासुरमानवम् ।
प्रपश्याम्यहमीशानं सुप्तमेकार्णवे प्रभुम्
sarvavyāpinamavyaktamanantaṃ viśvatomukham |
tasya pādatalābhyāśe svarṇakeyūramaṇḍitām
||29||सर्वव्यापिनमव्यक्तमनन्तं विश्वतोमुखम् ।
तस्य पादतलाभ्याशे स्वर्णकेयूरमण्डिताम्
viśvarūpāṃ mahābhāgāṃ viśvamāyāvadhāriṇīm |
śrīmayīṃ hrīmayīṃ devīṃ dhīmayīṃ vāṅmayīṃ śivām
||30||विश्वरूपां महाभागां विश्वमायावधारिणीम् ।
श्रीमयीं ह्रीमयीं देवीं धीमयीं वाङ्मयीं शिवाम्
siddhiṃ kīrtiṃ ratiṃ brāhmīṃ kālarātrimayonijām |
tāmevāhaṃ tadātyantamīśvarāntikamāsthitām
||31||सिद्धिं कीर्तिं रतिं ब्राह्मीं कालरात्रिमयोनिजाम् ।
तामेवाहं तदात्यन्तमीश्वरान्तिकमास्थिताम्
adrākṣaṃ candravadanāṃ dhṛtiṃ sarveśvarīmumām
||32||अद्राक्षं चन्द्रवदनां धृतिं सर्वेश्वरीमुमाम्
śāntaṃ prasuptaṃ navahemavarṇamumāsahāyaṃ bhagavantamīśam |
tamovṛtaṃ puṇyatamaṃ variṣṭhaṃ pradakṣiṇīkṛtya namaskaromi
||33||शान्तं प्रसुप्तं नवहेमवर्णमुमासहायं भगवन्तमीशम् ।
तमोवृतं पुण्यतमं वरिष्ठं प्रदक्षिणीकृत्य नमस्करोमि
tataḥ prasuptaḥ sahasā vibuddho rātrikṣaye devavaraḥ svabhāvāt |
vikṣobhayan bāhubhirarṇavāmbho jagatpraṇaṣṭaṃ salile vimṛśya
||34||ततः प्रसुप्तः सहसा विबुद्धो रात्रिक्षये देववरः स्वभावात् ।
विक्षोभयन् बाहुभिरर्णवाम्भो जगत्प्रणष्टं सलिले विमृश्य
kiṃ kāryamityeva vicintayitvā vārāharūpo'bhavadadbhutāṅgaḥ |
mahāghanāmbhodharatulyavarcāḥ pralambamālāmbaraniṣkamālī
||35||किं कार्यमित्येव विचिन्तयित्वा वाराहरूपोऽभवदद्भुताङ्गः ।
महाघनाम्भोधरतुल्यवर्चाः प्रलम्बमालाम्बरनिष्कमाली
saśaṅkhacakrāsidharaḥ kirīṭī savedavedāṅgamayo mahātmā |
trailokyanirmāṇakaraḥ purāṇo devatrayīrūpadharaśca kārye
||36||सशङ्खचक्रासिधरः किरीटी सवेदवेदाङ्गमयो महात्मा ।
त्रैलोक्यनिर्माणकरः पुराणो देवत्रयीरूपधरश्च कार्ये
sa eva rudraḥ sa jagajjahāra sṛṣṭyarthamīśaḥ prapitāmaho'bhūt |
saṃrakṣaṇārthaṃ jagataḥ sa eva hariḥ sucakrāsigadābjapāṇiḥ
||37||स एव रुद्रः स जगज्जहार सृष्ट्यर्थमीशः प्रपितामहोऽभूत् ।
संरक्षणार्थं जगतः स एव हरिः सुचक्रासिगदाब्जपाणिः
teṣāṃ vibhāgo na hi kartumarho mahātmanāmekaśarīrabhājām |
mīmāṃsāhetvarthaviśeṣatarkairyasteṣu kuryātpravibhedamajñaḥ
||38||तेषां विभागो न हि कर्तुमर्हो महात्मनामेकशरीरभाजाम् ।
मीमांसाहेत्वर्थविशेषतर्कैर्यस्तेषु कुर्यात्प्रविभेदमज्ञः
sa yāti ghoraṃ narakaṃ krameṇa vibhāgakṛddveṣamatirdurātmā |
yā yasya bhaktiḥ sa tayaiva nūnaṃ dehaṃ tyajan svaṃ hyamṛtatvameti
||39||स याति घोरं नरकं क्रमेण विभागकृद्द्वेषमतिर्दुरात्मा ।
या यस्य भक्तिः स तयैव नूनं देहं त्यजन् स्वं ह्यमृतत्वमेति
saṃmohayanmūrtibhiratra lokaṃ sraṣṭā ca goptā kṣayakṛtsa devaḥ |
tasmānna mohātmakamāviśeta dveṣaṃ na kuryātpravibhinnamūrtiḥ
||40||संमोहयन्मूर्तिभिरत्र लोकं स्रष्टा च गोप्ता क्षयकृत्स देवः ।
तस्मान्न मोहात्मकमाविशेत द्वेषं न कुर्यात्प्रविभिन्नमूर्तिः
vārāhamīśānavaro'pyato'sau rūpaṃ samāsthāya jagadvidhātā |
naṣṭe triloke'rṇavatoyamagne vimārgitoyaughamaye'ntarātmā
||41||वाराहमीशानवरोऽप्यतोऽसौ रूपं समास्थाय जगद्विधाता ।
नष्टे त्रिलोकेऽर्णवतोयमग्ने विमार्गितोयौघमयेऽन्तरात्मा
bhittvārṇavaṃ toyamathāntarasthaṃ viveśa pātālatalaṃ kṣaṇena |
jale nimagnāṃ dharaṇīṃ samastāṃ samaspṛśatpaṅkajapatranetrām
||42||भित्त्वार्णवं तोयमथान्तरस्थं विवेश पातालतलं क्षणेन ।
जले निमग्नां धरणीं समस्तां समस्पृशत्पङ्कजपत्रनेत्राम्
viśīrṇaśailopalaśṛṅgakūṭāṃ vasuṃdharāṃ tāṃ pralaye pralīnām |
daṃṣṭraikayā viṣṇuratulyasāhasaḥ samuddadhāra svayameva devaḥ
||43||विशीर्णशैलोपलशृङ्गकूटां वसुंधरां तां प्रलये प्रलीनाम् ।
दंष्ट्रैकया विष्णुरतुल्यसाहसः समुद्दधार स्वयमेव देवः
sā tasya daṃṣṭrāgravilambitāṅgī kailāsaśṛṅgāgragateva jyotsnā |
vibhrājate sāpyasamānamūrtiḥ śaśāṅkaśṛṅge ca taḍidvilagnā
||44||सा तस्य दंष्ट्राग्रविलम्बिताङ्गी कैलासशृङ्गाग्रगतेव ज्योत्स्ना ।
विभ्राजते साप्यसमानमूर्तिः शशाङ्कशृङ्गे च तडिद्विलग्ना
tāmujjahārārṇavatoyamagnāṃ karī nimagnāmiva hastinīṃ haṭhāt |
nāvaṃ viśīrṇāmiva toyamadhyādudīrṇasattvo'nupamaprabhāvaḥ
||45||तामुज्जहारार्णवतोयमग्नां करी निमग्नामिव हस्तिनीं हठात् ।
नावं विशीर्णामिव तोयमध्यादुदीर्णसत्त्वोऽनुपमप्रभावः
sa tāṃ samuttārya mahājalaughātsamudramāryo vyabhajatsamastam |
mahārṇaveṣveva mahārṇavāmbho nikṣepayāmāsa punarnadīṣu
||46||स तां समुत्तार्य महाजलौघात्समुद्रमार्यो व्यभजत्समस्तम् ।
महार्णवेष्वेव महार्णवाम्भो निक्षेपयामास पुनर्नदीषु
śīrṇāṃśca śailānsa cakāra bhūyo dvīpānsamastāṃśca tathārṇavāṃśca |
śailopalairye vicitāḥ samantācchiloccayāṃstānsa cakāra kalpe
||47||शीर्णांश्च शैलान्स चकार भूयो द्वीपान्समस्तांश्च तथार्णवांश्च ।
शैलोपलैर्ये विचिताः समन्ताच्छिलोच्चयांस्तान्स चकार कल्पे
anekarūpaṃ pravibhajya dehaṃ cakāra devendragaṇānsamastān |
mukhācca vahnirmanasaśca candraścakṣośca sūryaḥ sahasā babhūva
||48||अनेकरूपं प्रविभज्य देहं चकार देवेन्द्रगणान्समस्तान् ।
मुखाच्च वह्निर्मनसश्च चन्द्रश्चक्षोश्च सूर्यः सहसा बभूव
jajñe'tha tasyeśvarayogamūrteḥ pradhyāyamānasya surendrasaṅghaḥ |
vedāśca yajñāśca tathaiva varṇāstathā hi sarvauṣadhayo rasāśca
||49||जज्ञेऽथ तस्येश्वरयोगमूर्तेः प्रध्यायमानस्य सुरेन्द्रसङ्घः ।
वेदाश्च यज्ञाश्च तथैव वर्णास्तथा हि सर्वौषधयो रसाश्च
jagatsamastaṃ manasā babhūva yatsthāvaraṃ kiṃcidihāṇḍajaṃ vā |
jarāyujaṃ svedajamudbhijjaṃ vā yatkiṃcidā kīṭapipīlakādyam
||50||जगत्समस्तं मनसा बभूव यत्स्थावरं किंचिदिहाण्डजं वा ।
जरायुजं स्वेदजमुद्भिज्जं वा यत्किंचिदा कीटपिपीलकाद्यम्
tato vijajñe manasā kṣaṇena anekarūpāḥ sahasā maheśā |
cakāra yanmūrtibhiravyayātmā aṣṭābhirāviśya punaḥ sa tatra
||51||ततो विजज्ञे मनसा क्षणेन अनेकरूपाः सहसा महेशा ।
चकार यन्मूर्तिभिरव्ययात्मा अष्टाभिराविश्य पुनः स तत्र
līlāṃ cakārātha samṛddhatejā ato'tra me paśyata eva viprāḥ |
teṣāṃ mayā darśanameva sarvaṃ yāvanmuhūrtātsamakāri bhūpa
||52||लीलां चकाराथ समृद्धतेजा अतोऽत्र मे पश्यत एव विप्राः ।
तेषां मया दर्शनमेव सर्वं यावन्मुहूर्तात्समकारि भूप
kṛtvā tvaśeṣaṃ kila līlayaiva sa devadevo jagatāṃ vidhātā |
sarvatradṛksarvaga eva devo jagāma cādarśanamādikartā
||53||कृत्वा त्वशेषं किल लीलयैव स देवदेवो जगतां विधाता ।
सर्वत्रदृक्सर्वग एव देवो जगाम चादर्शनमादिकर्ता
yattanmuhūrtādiha nāmarūpaṃ tāvatprapaśyāmi jagattathaiva |
dvīpaiḥ samudrairabhisaṃvṛtaṃ hi nakṣatratārādivimānakīrṇam
||54||यत्तन्मुहूर्तादिह नामरूपं तावत्प्रपश्यामि जगत्तथैव ।
द्वीपैः समुद्रैरभिसंवृतं हि नक्षत्रतारादिविमानकीर्णम्
viyatpayodagrahacakracitraṃ nānāvidhaiḥ prāṇigaṇairvṛtaṃ ca |
tāṃ vai na paśyāmi mahānubhāvāṃ gorūpiṇīṃ sarvasureśvarīṃ ca
||55||वियत्पयोदग्रहचक्रचित्रं नानाविधैः प्राणिगणैर्वृतं च ।
तां वै न पश्यामि महानुभावां गोरूपिणीं सर्वसुरेश्वरीं च
kva sāṃprataṃ seti vicintya rājanvibhrāntacittastvabhavaṃ tadaiva |
diśo vibhāgānavalokayānṛte punastāṃ kathamīśvarāṅgīm
||56||क्व सांप्रतं सेति विचिन्त्य राजन्विभ्रान्तचित्तस्त्वभवं तदैव ।
दिशो विभागानवलोकयानृते पुनस्तां कथमीश्वराङ्गीम्
paśyāmi tāmatra punaśca śubhrāṃ mahābhranīlāṃ śuciśubhratoyām |
vṛkṣairanekairupaśobhitāṅgīṃ gajaisturaṅgairvihagairvṛtāṃ ca
||57||पश्यामि तामत्र पुनश्च शुभ्रां महाभ्रनीलां शुचिशुभ्रतोयाम् ।
वृक्षैरनेकैरुपशोभिताङ्गीं गजैस्तुरङ्गैर्विहगैर्वृतां च
yathā purātīramupetya devyāḥ samāsthitaścāpyamarakaṇṭake tu |
tathaiva paśyāmi sukhopaviṣṭa ātmānamavyagramavāptasaukhyam
||58||यथा पुरातीरमुपेत्य देव्याः समास्थितश्चाप्यमरकण्टके तु ।
तथैव पश्यामि सुखोपविष्ट आत्मानमव्यग्रमवाप्तसौख्यम्
tathaiva puṇyā malatoyavāhāṃ dṛṣṭvā punaḥ kalpaparikṣaye'pi |
ambāmivāryāmanukampamānāmakṣīṇatoyāṃ virujāṃ viśokaḥ
||59||तथैव पुण्या मलतोयवाहां दृष्ट्वा पुनः कल्पपरिक्षयेऽपि ।
अम्बामिवार्यामनुकम्पमानामक्षीणतोयां विरुजां विशोकः
evaṃ mahatpuṇyatamaṃ ca kalpaṃ paṭhanti śṛṇvanti ca ye dvijendrāḥ |
mahāvarāhasya maheśvarasya dine dine te vimalā bhavanti
||60||एवं महत्पुण्यतमं च कल्पं पठन्ति शृण्वन्ति च ये द्विजेन्द्राः ।
महावराहस्य महेश्वरस्य दिने दिने ते विमला भवन्ति
aśubhaśatasahasraṃ te vidhūya prapannāstridivamamarajuṣṭaṃ siddhagandharvayuktam |
vimalaśaśinibhābhiḥ sarva evāpsarobhiḥ saha vividhavilāsaiḥ svargasaukhyaṃ labhante
||61||अशुभशतसहस्रं ते विधूय प्रपन्नास्त्रिदिवममरजुष्टं सिद्धगन्धर्वयुक्तम् ।
विमलशशिनिभाभिः सर्व एवाप्सरोभिः सह विविधविलासैः स्वर्गसौख्यं लभन्ते
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śrīnarmadāmāhātmye vārāhakalpavṛttāntavarṇanaṃ nāmaikonaviṃśo'dhyāyaḥ ||