siddheśvaramāhātmyavarṇanam
śrīmārkaṇḍeya uvāca
tasyaivānantaraṃ cānyatsiddheśvaramanuttamam |
tīrthaṃ sarvaguṇopetaṃ sarvalokeṣu pūjitam
||1||तस्यैवानन्तरं चान्यत्सिद्धेश्वरमनुत्तमम् ।
तीर्थं सर्वगुणोपेतं सर्वलोकेषु पूजितम्
tatra tīrthe tu yaḥ snātvā hyumārudraṃ prapūjayet |
vājapeyasya yajñasya sa labhetphalamuttamam
||2||तत्र तीर्थे तु यः स्नात्वा ह्युमारुद्रं प्रपूजयेत् ।
वाजपेयस्य यज्ञस्य स लभेत्फलमुत्तमम्
tena puṇyena mahatā mṛtaḥ svargamavāpnuyāt |
apsarogaṇasaṃvīto jayaśabdādimaṅgalaiḥ
||3||तेन पुण्येन महता मृतः स्वर्गमवाप्नुयात् ।
अप्सरोगणसंवीतो जयशब्दादिमङ्गलैः
sahasravatsarāṃstatra krīḍayitvā yathāsukham |
dhanadhānyasamopete kule mahati jāyate
||4||सहस्रवत्सरांस्तत्र क्रीडयित्वा यथासुखम् ।
धनधान्यसमोपेते कुले महति जायते
pūjyamāno naraśreṣṭha vedavedāṅgapāragaḥ |
vyādhiśokavinirmukto jīvecca śaradāṃ śatam
||5||पूज्यमानो नरश्रेष्ठ वेदवेदाङ्गपारगः ।
व्याधिशोकविनिर्मुक्तो जीवेच्च शरदां शतम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe siddheśvaramāhātmyavarṇanaṃ nāma pañcatriṃśadadhikaśatatamo'dhyāyaḥ ||