suvarṇabindutīrthamāhātmyavarṇanam
śrīmārkaṇḍeya uvāca
tasyāgre pāvanaṃ tīrthaṃ svarṇabindviti viśrutam |
yatra snātvā divaṃ yānti mṛtāśca na punarbhavam
||1||तस्याग्रे पावनं तीर्थं स्वर्णबिन्द्विति विश्रुतम् ।
यत्र स्नात्वा दिवं यान्ति मृताश्च न पुनर्भवम्
tatra tīrthe tu yaḥ snātvā datte viprāya kāñcanam |
tena yattu phalaṃ proktaṃ tacchṛṇuṣva mahīpate
||2||तत्र तीर्थे तु यः स्नात्वा दत्ते विप्राय काञ्चनम् ।
तेन यत्तु फलं प्रोक्तं तच्छृणुष्व महीपते
sarveṣāmeva ratnānāṃ kāñcanaṃ ratnamuttamam |
agnitejaḥsamudbhūtaṃ tena tatparamaṃ bhuvi
||3||सर्वेषामेव रत्नानां काञ्चनं रत्नमुत्तमम् ।
अग्नितेजःसमुद्भूतं तेन तत्परमं भुवि
tenaiva dattā pṛthivī saśailavanakānanā |
sapattanapurā sarvā kāñcanaṃ yaḥ prayacchati
||4||तेनैव दत्ता पृथिवी सशैलवनकानना ।
सपत्तनपुरा सर्वा काञ्चनं यः प्रयच्छति
mānasaṃ vācikaṃ pāpaṃ karmaṇā yatpurā kṛtam |
tatsarvaṃ naśyati kṣipraṃ svarṇadānena bhārata
||5||मानसं वाचिकं पापं कर्मणा यत्पुरा कृतम् ।
तत्सर्वं नश्यति क्षिप्रं स्वर्णदानेन भारत
svarṇadānaṃ tu yo dattvā hyapi vālāgramātrakam |
tatra tīrthe mṛto yāti divaṃ nāstyatra saṃśayaḥ
||6||स्वर्णदानं तु यो दत्त्वा ह्यपि वालाग्रमात्रकम् ।
तत्र तीर्थे मृतो याति दिवं नास्त्यत्र संशयः
tatra vidyādharaiḥ siddhairvimānavaramāsthitaḥ |
pūjyamāno vasettāvadyāvadābhūtasamplavam
||7||तत्र विद्याधरैः सिद्धैर्विमानवरमास्थितः ।
पूज्यमानो वसेत्तावद्यावदाभूतसम्प्लवम्
pūrṇe tatra tataḥ kāle prāpya mānuṣyamuttamam |
suvarṇakoṭisahite gṛhe vai jāyate dvijaḥ
||8||पूर्णे तत्र ततः काले प्राप्य मानुष्यमुत्तमम् ।
सुवर्णकोटिसहिते गृहे वै जायते द्विजः
sarvavyādhivinirmuktaḥ sarvalokeṣu pūjitaḥ |
jīvedvarṣaśataṃ sāgraṃ rājasaṃ satsu viśrutaḥ
||9||सर्वव्याधिविनिर्मुक्तः सर्वलोकेषु पूजितः ।
जीवेद्वर्षशतं साग्रं राजसं सत्सु विश्रुतः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe suvarṇabindutīrthamāhātmyavarṇanaṃ nāma saptādhikadviśatatamo'dhyāyaḥ ||