bhīmeśvaratīrthamāhātmyavarṇanam
śrīmārkaṇḍeya uvāca
bhīmeśvaraṃ tato gacchetsarvapāpakṣayaṃkaram |
sevitaṃ ṛṣisaṅghaiśca bhīmavratadharaiḥ śubhaiḥ
||1||भीमेश्वरं ततो गच्छेत्सर्वपापक्षयंकरम् ।
सेवितं ऋषिसङ्घैश्च भीमव्रतधरैः शुभैः
tatra tīrthe tu yaḥ snātvā sopavāso jitendriyaḥ |
japedekākṣaraṃ mantramūrdhvabāhurdivākare
||2||तत्र तीर्थे तु यः स्नात्वा सोपवासो जितेन्द्रियः ।
जपेदेकाक्षरं मन्त्रमूर्ध्वबाहुर्दिवाकरे
tasya janmārjitaṃ pāpaṃ tatkṣaṇādeva naśyati |
saptajanmārjitaṃ pāpaṃ gāyatryā naśyate dhruvam
||3||तस्य जन्मार्जितं पापं तत्क्षणादेव नश्यति ।
सप्तजन्मार्जितं पापं गायत्र्या नश्यते ध्रुवम्
daśabhirjanmabhirjātaṃ śatena tu purā kṛtam |
sahasreṇa trijanmotthaṃ gāyatrī hanti kilbiṣam
||4||दशभिर्जन्मभिर्जातं शतेन तु पुरा कृतम् ।
सहस्रेण त्रिजन्मोत्थं गायत्री हन्ति किल्बिषम्
vaidikaṃ laukikaṃ vāpi jāpyaṃ japtaṃ nareśvara |
tatkṣaṇāddahate sarvaṃ tṛṇaṃ tu jvalano yathā
||5||वैदिकं लौकिकं वापि जाप्यं जप्तं नरेश्वर ।
तत्क्षणाद्दहते सर्वं तृणं तु ज्वलनो यथा
na devabalamāśritya kadācitpāpamācaret |
ajñānānnaśyate kṣipraṃ nottaraṃ tu kadācana
||6||न देवबलमाश्रित्य कदाचित्पापमाचरेत् ।
अज्ञानान्नश्यते क्षिप्रं नोत्तरं तु कदाचन
tatra tīrthe tu yo dānaṃ śaktimāśritya cācaret |
tadakṣayyaphalaṃ sarvaṃ jāyate pāṇḍunandana
||7||तत्र तीर्थे तु यो दानं शक्तिमाश्रित्य चाचरेत् ।
तदक्षय्यफलं सर्वं जायते पाण्डुनन्दन
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe bhīmeśvaratīrthamāhātmyavarṇanaṃ nāma saptasaptatitamo'dhyāyaḥ ||