sāṃvaureśvaratīrthamāhātmyavarṇanam
śrīmārkaṇḍeya uvāca
tato gacchenmahārāja sāṃvauraṃ tīrthamuttamam |
yatra saṃnihito bhānuḥ pūjyamānaḥ surāsuraiḥ
||1||ततो गच्छेन्महाराज सांवौरं तीर्थमुत्तमम् ।
यत्र संनिहितो भानुः पूज्यमानः सुरासुरैः
tatra ye paṅgutāṃ prāptāḥ śīrṇaghrāṇanakhā narāḥ |
dadrumaṇḍalabhinnāṅgā makṣikākṛmisaṃkulāḥ
||2||तत्र ये पङ्गुतां प्राप्ताः शीर्णघ्राणनखा नराः ।
दद्रुमण्डलभिन्नाङ्गा मक्षिकाकृमिसंकुलाः
mātāpitṛbhyāṃ rahitā bhrātṛbhāryāvivarjitāḥ |
anāthā vikalā vyaṅgā magnā ye duḥkhasāgare
||3||मातापितृभ्यां रहिता भ्रातृभार्याविवर्जिताः ।
अनाथा विकला व्यङ्गा मग्ना ये दुःखसागरे
teṣāṃ nātho jagadyonirnarmadātaṭamāśritaḥ |
sāṃvauranātho lokānāmārtihā duḥkhanāśanaḥ
||4||तेषां नाथो जगद्योनिर्नर्मदातटमाश्रितः ।
सांवौरनाथो लोकानामार्तिहा दुःखनाशनः
tatra tīrthe tu yaḥ snātvā māsamekaṃ nirantaram |
pūjayedbhāskaraṃ devaṃ tasya puṇyaphalaṃ śṛṇu
||5||तत्र तीर्थे तु यः स्नात्वा मासमेकं निरन्तरम् ।
पूजयेद्भास्करं देवं तस्य पुण्यफलं शृणु
yatphalaṃ cottare pārtha tathā vai pūrvasāgare |
dakṣiṇe paścime snātvā tatra tīrthe tu tatphalam
||6||यत्फलं चोत्तरे पार्थ तथा वै पूर्वसागरे ।
दक्षिणे पश्चिमे स्नात्वा तत्र तीर्थे तु तत्फलम्
kaumāre yauvane pāpaṃ vārddhake yacca saṃcitam |
tatpraṇaśyati sāṃvaure snānamātrānna saṃśayaḥ
||7||कौमारे यौवने पापं वार्द्धके यच्च संचितम् ।
तत्प्रणश्यति सांवौरे स्नानमात्रान्न संशयः
na vyādhirnaiva dāridryaṃ na caiveṣṭaviyojanam |
saptajanmāni rājendra sāṃvauraparisevanāt
||8||न व्याधिर्नैव दारिद्र्यं न चैवेष्टवियोजनम् ।
सप्तजन्मानि राजेन्द्र सांवौरपरिसेवनात्
saptamyāmupavāsena taddine cāpyupoṣite |
sa tatphalamavāpnoti tatra snātvā na saṃśayaḥ
||9||सप्तम्यामुपवासेन तद्दिने चाप्युपोषिते ।
स तत्फलमवाप्नोति तत्र स्नात्वा न संशयः
raktacandanamiśreṇa yadarghyeṇa phalaṃ smṛtam |
tatra tīrthe nṛpaśreṣṭha snātvā tatphalamāpnuyāt
||10||रक्तचन्दनमिश्रेण यदर्घ्येण फलं स्मृतम् ।
तत्र तीर्थे नृपश्रेष्ठ स्नात्वा तत्फलमाप्नुयात्
narmadāsalilaṃ ramyaṃ sarvapātakanāśanam |
nirīkṣitaṃ viśeṣeṇa sāṃvaureṇa mahātmanā
||11||नर्मदासलिलं रम्यं सर्वपातकनाशनम् ।
निरीक्षितं विशेषेण सांवौरेण महात्मना
te dhanyāste mahātmānasteṣāṃ janma sujīvitam |
snātvā paśyanti deveśaṃ sāṃvaureśvaramuttamam
||12||ते धन्यास्ते महात्मानस्तेषां जन्म सुजीवितम् ।
स्नात्वा पश्यन्ति देवेशं सांवौरेश्वरमुत्तमम्
sūryaloke vasettāvadyāvadābhūtasamplavam
||13||सूर्यलोके वसेत्तावद्यावदाभूतसम्प्लवम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe sāṃvaureśvaratīrthamāhātmyavarṇanaṃ nāma catuḥṣaṣṭyuttaraśatatamo'dhyāyaḥ ||