koṭīśvaratīrthamāhātmyavarṇanam
mārkaṇḍeya uvāca
tataḥ krośāntare pārtha tīrthaṃ koṭīśvaraṃ param |
yatra snānaṃ ca dānaṃ ca japahomārcanādikam |
bhaktyā kṛtaṃ naraistatra sarvaṃ koṭiguṇaṃ bhavet
||1||ततः क्रोशान्तरे पार्थ तीर्थं कोटीश्वरं परम् ।
यत्र स्नानं च दानं च जपहोमार्चनादिकम् ।
भक्त्या कृतं नरैस्तत्र सर्वं कोटिगुणं भवेत्
tatra devāḥ sagandharvā ṛṣayaḥ siddhacāraṇāḥ |
jaladhiṃ pratigacchanti narmadāṃ vīkṣituṃ kila
||2||तत्र देवाः सगन्धर्वा ऋषयः सिद्धचारणाः ।
जलधिं प्रतिगच्छन्ति नर्मदां वीक्षितुं किल
militāḥ koṭiśo rājanrevāsāgarasaṅgame |
vinodamatulaṃ dṛṣṭvā revārṇavasamāgame
||3||मिलिताः कोटिशो राजन्रेवासागरसङ्गमे ।
विनोदमतुलं दृष्ट्वा रेवार्णवसमागमे
snātvā śivaṃ ca saṃsthāpya pūjayitvā maheśvaram |
koṭīśvarābhidhānaṃ tu svasvabhaktyā vidhānataḥ
||4||स्नात्वा शिवं च संस्थाप्य पूजयित्वा महेश्वरम् ।
कोटीश्वराभिधानं तु स्वस्वभक्त्या विधानतः
koṭītīrthe parāṃ siddhiṃ samprāptāḥ sarvatoṣaṇāt |
tena tatpuṇyamatulaṃ sarvatīrtheṣu cottamam
||5||कोटीतीर्थे परां सिद्धिं सम्प्राप्ताः सर्वतोषणात् ।
तेन तत्पुण्यमतुलं सर्वतीर्थेषु चोत्तमम्
tatra tīrthe tu yatkiṃcicchubhaṃ vā yadi vāśubham |
kriyate nṛpaśārdūla sarvaṃ koṭiguṇaṃ bhavet
||6||तत्र तीर्थे तु यत्किंचिच्छुभं वा यदि वाशुभम् ।
क्रियते नृपशार्दूल सर्वं कोटिगुणं भवेत्
tatra tīrthe tu mārgasthā ye kecidṛṣisattamāḥ |
siddhāmṛtapadaṃ yānti pitṛlokaṃ tathottamam
||7||तत्र तीर्थे तु मार्गस्था ये केचिदृषिसत्तमाः ।
सिद्धामृतपदं यान्ति पितृलोकं तथोत्तमम्
uttare narmadātīre dakṣiṇe cāśritāśca ye |
devalokaṃ gatāstatra iti me niścitā matiḥ
||8||उत्तरे नर्मदातीरे दक्षिणे चाश्रिताश्च ये ।
देवलोकं गतास्तत्र इति मे निश्चिता मतिः
bilvārkapuṣpairdhattūrakuśakāśaprasūnakaiḥ |
ṛtūdbhavaistathānyaiśca pūjayitvā maheśvaram
||9||बिल्वार्कपुष्पैर्धत्तूरकुशकाशप्रसूनकैः ।
ऋतूद्भवैस्तथान्यैश्च पूजयित्वा महेश्वरम्
nānopacārairvidhivanmantrapūrvaṃ yudhiṣṭhira |
dhūpadīpārdhanaivedyaistoṣayitvā ca dhūrjaṭim
||10||नानोपचारैर्विधिवन्मन्त्रपूर्वं युधिष्ठिर ।
धूपदीपार्धनैवेद्यैस्तोषयित्वा च धूर्जटिम्
śivalokamavāpnoti yāvadindrāścaturdaśa |
pauṣakṛṣṇāṣṭamīyoge viśeṣaḥ pūjane smṛtaḥ
||11||शिवलोकमवाप्नोति यावदिन्द्राश्चतुर्दश ।
पौषकृष्णाष्टमीयोगे विशेषः पूजने स्मृतः
nityaṃ ca nṛpatiśreṣṭha caturdaśyaṣṭamīṣu ca |
śivamabhyarcya viprāṃśca bhojayedbhaktito varān
||12||नित्यं च नृपतिश्रेष्ठ चतुर्दश्यष्टमीषु च ।
शिवमभ्यर्च्य विप्रांश्च भोजयेद्भक्तितो वरान्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe koṭīśvaratīrthamāhātmyavarṇanaṃ nāma caturviṃśatyadhikadviśatatamo'dhyāyaḥ ||