kalhoḍītīrthamāhātmyavarṇanam
śrīmārkaṇḍeya uvāca
tato gacchettu rājendra kalhoḍītīrthamuttamam |
vikhyātaṃ bhārate loke gaṅgāyāḥ pāpanāśanam
||1||ततो गच्छेत्तु राजेन्द्र कल्होडीतीर्थमुत्तमम् ।
विख्यातं भारते लोके गङ्गायाः पापनाशनम्
durlabhaṃ manujaiḥ pārtha revātaṭasamāśritam |
prāṇināṃ pāpanāśāya ūṣaraṃ puṣkaraṃ tathā
||2||दुर्लभं मनुजैः पार्थ रेवातटसमाश्रितम् ।
प्राणिनां पापनाशाय ऊषरं पुष्करं तथा
tattu tīrthamidaṃ puṇyamityevaṃ śūlino vacaḥ |
jāhnavī paśurūpeṇa tatra snānārthamāgatā
||3||तत्तु तीर्थमिदं पुण्यमित्येवं शूलिनो वचः ।
जाह्नवी पशुरूपेण तत्र स्नानार्थमागता
atastadviśrutaṃ loke kalhoḍītīrthamuttamam |
trirātraṃ kārayettatra pūrṇimāyāṃ yudhiṣṭhira
||4||अतस्तद्विश्रुतं लोके कल्होडीतीर्थमुत्तमम् ।
त्रिरात्रं कारयेत्तत्र पूर्णिमायां युधिष्ठिर
rajastamastathā krodhaṃ dambhaṃ mātsaryameva ca |
etāṃstyajati yaḥ pārtha tenāptaṃ mokṣajaṃ phalam
||5||रजस्तमस्तथा क्रोधं दम्भं मात्सर्यमेव च ।
एतांस्त्यजति यः पार्थ तेनाप्तं मोक्षजं फलम्
payasā snāpayeddevaṃ trisandhyaṃ ca tryahaṃ tathā |
payo gosambhavaṃ sadyaḥ savatsā jīvaputriṇī
||6||पयसा स्नापयेद्देवं त्रिसन्ध्यं च त्र्यहं तथा ।
पयो गोसम्भवं सद्यः सवत्सा जीवपुत्रिणी
kṛtvā tattāmraje pātre kṣaudreṇa caiva yojite |
oṃ namaḥ śrīśivāyeti snānaṃ devasya kārayet
||7||कृत्वा तत्ताम्रजे पात्रे क्षौद्रेण चैव योजिते ।
ओं नमः श्रीशिवायेति स्नानं देवस्य कारयेत्
sa yāti tridaśasthānaṃ nākastrībhiḥ samāvṛtaḥ |
yastatra vidhivatsnātvā dānaṃ preteṣu yacchati
||8||स याति त्रिदशस्थानं नाकस्त्रीभिः समावृतः ।
यस्तत्र विधिवत्स्नात्वा दानं प्रेतेषु यच्छति
śuklāṃ gāṃ dāpayettatra prīyatāṃ me pitāmahāḥ |
brāhmaṇe śaucasampanne svadāranirate sadā
||9||शुक्लां गां दापयेत्तत्र प्रीयतां मे पितामहाः ।
ब्राह्मणे शौचसम्पन्ने स्वदारनिरते सदा
savatsāṃ vastrasaṃyuktāṃ hiraṇyopari saṃsthitām |
sattvayukto dadadrājañchāmbhavaṃ lokamāpnuyāt
||10||सवत्सां वस्त्रसंयुक्तां हिरण्योपरि संस्थिताम् ।
सत्त्वयुक्तो ददद्राजञ्छाम्भवं लोकमाप्नुयात्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kalhoḍītīrthamāhātmyavarṇanaṃ nāma trinavatitamo'dhyāyaḥ ||