kumāreśvaratīrthamāhātmyavarṇanam
śrīmārkaṇḍeya uvāca
tato gacchettu rājendra kumāreśvaramuttamam |
prasiddhaṃ sarvatīrthānāmagastyeśvarasannidhau
||1||ततो गच्छेत्तु राजेन्द्र कुमारेश्वरमुत्तमम् ।
प्रसिद्धं सर्वतीर्थानामगस्त्येश्वरसन्निधौ
ṣaṇmukhena purā tāta sarvapātakanāśanam |
ārādhya parayā bhaktyā siddhiḥ prāptā narādhipa
||2||षण्मुखेन पुरा तात सर्वपातकनाशनम् ।
आराध्य परया भक्त्या सिद्धिः प्राप्ता नराधिप
devasainyādhipo jātaḥ sarvaśatrunibarhaṇaḥ |
ugratejā mahātmāsau saṃjātastīrthasevanāt
||3||देवसैन्याधिपो जातः सर्वशत्रुनिबर्हणः ।
उग्रतेजा महात्मासौ संजातस्तीर्थसेवनात्
tadāprabhṛti tattīrthaṃ saṃjātaṃnarmadātaṭe |
tatra tīrthe tu yo gatvā ekacitto jitendriyaḥ
||4||तदाप्रभृति तत्तीर्थं संजातंनर्मदातटे ।
तत्र तीर्थे तु यो गत्वा एकचित्तो जितेन्द्रियः
kārttikasya caturdaśyāmaṣṭamyāṃ ca viśeṣataḥ |
snāpayedgirijānāthaṃ dadhidugdhena sarpiṣā
||5||कार्त्तिकस्य चतुर्दश्यामष्टम्यां च विशेषतः ।
स्नापयेद्गिरिजानाथं दधिदुग्धेन सर्पिषा
gītaṃ tatra prakartavyaṃ piṇḍadānaṃ yathāvidhi |
brāhmaṇaiḥ śrotriyaiḥ pārtha ṣaṭkarmanirataiḥ śubhaiḥ
||6||गीतं तत्र प्रकर्तव्यं पिण्डदानं यथाविधि ।
ब्राह्मणैः श्रोत्रियैः पार्थ षट्कर्मनिरतैः शुभैः
yatkiṃciddīyate tatra akṣayaṃ pāṇḍunandana |
sarvatīrthamayaṃ tīrtha nirmitaṃ śikhinā nṛpa
||7||यत्किंचिद्दीयते तत्र अक्षयं पाण्डुनन्दन ।
सर्वतीर्थमयं तीर्थ निर्मितं शिखिना नृप
etatte sarvamākhyātaṃ kumāreśvarajaṃ phalam |
kumāradarśanātpuṇyaṃ prāpyate pāṇḍunandana
||8||एतत्ते सर्वमाख्यातं कुमारेश्वरजं फलम् ।
कुमारदर्शनात्पुण्यं प्राप्यते पाण्डुनन्दन
mṛtaḥ svargamavāpnoti satyamīśvarabhāṣitam
||9||मृतः स्वर्गमवाप्नोति सत्यमीश्वरभाषितम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kumāreśvaratīrthamāhātmyavarṇanaṃ nāma triṣaṣṭitamo'dhyāyaḥ ||