ekaśālaḍiṇḍimeśvaratīrthamāhātmyavarṇanam
śrīmārkaṇḍeya uvāca
athānyatsampravakṣyāmi devasya caritaṃ mahat |
śrutamātreṇa yenāśu sarvapāpaiḥ pramucyate
||1||अथान्यत्सम्प्रवक्ष्यामि देवस्य चरितं महत् ।
श्रुतमात्रेण येनाशु सर्वपापैः प्रमुच्यते
bhikṣurūpaṃ paraṃ kṛtvā devadevo maheśvaraḥ |
ekaśālāṃ gato grāmaṃ bhikṣārthī kṣutpipāsitaḥ
||2||भिक्षुरूपं परं कृत्वा देवदेवो महेश्वरः ।
एकशालां गतो ग्रामं भिक्षार्थी क्षुत्पिपासितः
akṣasūtrodyatakaro bhasmaguṇṭhitavigrahaḥ |
sphurattriśūlo viśveśo jaṭākuṇḍalabhūṣitaḥ
||3||अक्षसूत्रोद्यतकरो भस्मगुण्ठितविग्रहः ।
स्फुरत्त्रिशूलो विश्वेशो जटाकुण्डलभूषितः
kṛttivāsā mahākāyo mahāhikṛtabhūṣaṇaḥ |
vādayanvai ḍamarukaṃ ḍiṇḍimapratimaṃ śubham
||4||कृत्तिवासा महाकायो महाहिकृतभूषणः ।
वादयन्वै डमरुकं डिण्डिमप्रतिमं शुभम्
kapālapāṇirbhagavānbālakairbahubhirvṛtaḥ |
kvacidgāyanhasaṃścaiva nṛtyanvadan kvacitkvacit
||5||कपालपाणिर्भगवान्बालकैर्बहुभिर्वृतः ।
क्वचिद्गायन्हसंश्चैव नृत्यन्वदन् क्वचित्क्वचित्
yatra yatra gṛhe devo līlayā ḍiṇḍamaṃ nyaset |
bhārākrāntaṃ gṛhaṃ pārtha tatratatra vinaśyati
||6||यत्र यत्र गृहे देवो लीलया डिण्डमं न्यसेत् ।
भाराक्रान्तं गृहं पार्थ तत्रतत्र विनश्यति
evaṃ sampracaran devo veṣṭito bahubhirjanaiḥ |
dṛśyādṛśyena rūpeṇa nirjagāma bahiḥ prabhuḥ
||7||एवं सम्प्रचरन् देवो वेष्टितो बहुभिर्जनैः ।
दृश्यादृश्येन रूपेण निर्जगाम बहिः प्रभुः
itaścetaśca dhāvantaṃ na paśyanti yadā janāḥ |
vismitāste sthitāḥ śambhurbhaviṣyati tato'stuvan
||8||इतश्चेतश्च धावन्तं न पश्यन्ति यदा जनाः ।
विस्मितास्ते स्थिताः शम्भुर्भविष्यति ततोऽस्तुवन्
teṣāṃ tu stuvatāṃ bhaktyā śaṅkaraṃ jagatāṃ patim |
ḍiṇḍirūpo hi bhagavāṃstadāsau pratyadṛśyata
||9||तेषां तु स्तुवतां भक्त्या शङ्करं जगतां पतिम् ।
डिण्डिरूपो हि भगवांस्तदासौ प्रत्यदृश्यत
tadāprabhṛti deveśo ḍiṇḍimeśvara ucyate |
darśanātsparśanādrājan sarvapāpaiḥ pramucyate
||10||तदाप्रभृति देवेशो डिण्डिमेश्वर उच्यते ।
दर्शनात्स्पर्शनाद्राजन् सर्वपापैः प्रमुच्यते
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ekaśālaḍiṇḍimeśvaratīrthamāhātmyavarṇanaṃ nāma dvādaśottaradviśatatamo'dhyāyaḥ ||