mātṛtīrthamāhātmyavarṇanam
śrīmārkaṇḍeya uvāca
tato gacchettu rājendra mātṛtīrthamanuttamam |
saṅgamasya samīpasthaṃ narmadādakṣiṇe taṭe
||1||ततो गच्छेत्तु राजेन्द्र मातृतीर्थमनुत्तमम् ।
सङ्गमस्य समीपस्थं नर्मदादक्षिणे तटे
mātarastatra rājendra saṃjātā narmadātaṭe |
umārdhanārirdeveśo vyālayajñopavītadhṛk
||2||मातरस्तत्र राजेन्द्र संजाता नर्मदातटे ।
उमार्धनारिर्देवेशो व्यालयज्ञोपवीतधृक्
uvāca yoginīvṛndaṃ kaṣṭaṃkaṣṭamaho hara |
ajeyāḥ sarvadevānāṃ tvatprasādānmaheśvara
||3||उवाच योगिनीवृन्दं कष्टंकष्टमहो हर ।
अजेयाः सर्वदेवानां त्वत्प्रसादान्महेश्वर
tīrthamatra vidhānena prakhyātaṃ vasudhātale |
evaṃ bhavatu yoginya ityuktvāntaradhācchivaḥ
||4||तीर्थमत्र विधानेन प्रख्यातं वसुधातले ।
एवं भवतु योगिन्य इत्युक्त्वान्तरधाच्छिवः
śrīmārkaṇḍeya uvāca
tatra tīrthe tu yo bhaktyā navamyāṃ niyataḥ śuciḥ |
upoṣya parayā bhaktyā pūjayenmātṛgocaram
||5||तत्र तीर्थे तु यो भक्त्या नवम्यां नियतः शुचिः ।
उपोष्य परया भक्त्या पूजयेन्मातृगोचरम्
tasya syurmātaraḥ prītāḥ prīto'yaṃ vṛṣavāhanaḥ |
vandhyāyā mṛtavatsāyā aputrāyā yudhiṣṭhira
||6||तस्य स्युर्मातरः प्रीताः प्रीतोऽयं वृषवाहनः ।
वन्ध्याया मृतवत्साया अपुत्राया युधिष्ठिर
snāpanaṃ cārabhettatra mantraśāstraviduttamaḥ |
sahiraṇyena kumbhena pañcaratnaphalānvitaḥ
||7||स्नापनं चारभेत्तत्र मन्त्रशास्त्रविदुत्तमः ।
सहिरण्येन कुम्भेन पञ्चरत्नफलान्वितः
snāpayetputrakāmāyāḥ kāṃsyapātreṇa deśikaḥ |
putraṃ sā labhate nārī vīryavantaṃ guṇānvitam
||8||स्नापयेत्पुत्रकामायाः कांस्यपात्रेण देशिकः ।
पुत्रं सा लभते नारी वीर्यवन्तं गुणान्वितम्
yo yaṃ kāmamabhidhyāyettataḥ sa labhate nṛpa |
mātṛtīrthātparaṃ tīrthaṃ na bhūtaṃ na bhaviṣyati
||9||यो यं काममभिध्यायेत्ततः स लभते नृप ।
मातृतीर्थात्परं तीर्थं न भूतं न भविष्यति
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe mātṛtīrthamāhātmyavarṇanaṃ nāma ṣaṭṣaṣṭitamo'dhyāyaḥ ||