śaṃkhodakakuṇḍeśvarīgaurīmāhātmyavarṇanam
īśvara uvāca
tato gacchenmahādevi devīṃ saubhāgyakāriṇīm ||
kuṇḍeśvarīti vikhyātāṃ puṣkarādvāyugocare
||1||ततो गच्छेन्महादेवि देवीं सौभाग्यकारिणीम् ॥
कुण्डेश्वरीति विख्यातां पुष्कराद्वायुगोचरे
dhanuṣāṃ triṃśatā devi bhūtanāthācca nairṛte ||
saṃsthitā pāpadamanī dāridryaughavināśinī
||2||धनुषां त्रिंशता देवि भूतनाथाच्च नैर्ऋते ॥
संस्थिता पापदमनी दारिद्र्यौघविनाशिनी
tasyā nairṛtadigbhāge dhanuḥpañcadaśe sthitam ||
śaṃkhodakaṃnāma kuṇḍaṃ sarvapātakanāśanam
||3||तस्या नैर्ऋतदिग्भागे धनुःपञ्चदशे स्थितम् ॥
शंखोदकंनाम कुण्डं सर्वपातकनाशनम्
tatra snātvā tu ye martyā nārī vā śubhavāriṇi ||
pūjayettāṃ mahādevi śaṃkhāvarteti viśrutām
||4||तत्र स्नात्वा तु ये मर्त्या नारी वा शुभवारिणि ॥
पूजयेत्तां महादेवि शंखावर्तेति विश्रुताम्
kalau kuṇḍeśvarīnāma sarvasaukhyapradāyinī ||
śaṃkho nāma purā devi viṣṇunā nihataḥ priye
||5||कलौ कुण्डेश्वरीनाम सर्वसौख्यप्रदायिनी ॥
शंखो नाम पुरा देवि विष्णुना निहतः प्रिये
tasya dehaṃ samādāya mahāntaṃ śaṃkharūpiṇam ||
tīrthodakena saṃpūrya prabhāsaṃ kṣetramāgataḥ
||6||तस्य देहं समादाय महान्तं शंखरूपिणम् ॥
तीर्थोदकेन संपूर्य प्रभासं क्षेत्रमागतः
tatra śaṃkhaṃ tu prakṣālya kṛtaṃ tīrthaṃ mahāprabham ||
tatra pūritavāñchaṅkhaṃ meghagambhīranisvanam
||7||तत्र शंखं तु प्रक्षाल्य कृतं तीर्थं महाप्रभम् ॥
तत्र पूरितवाञ्छङ्खं मेघगम्भीरनिस्वनम्
tasya nādena mahatā devī tatra samāgatā ||
pṛcchatī kāraṇaṃ tatra tatkuṇḍasya samīpagā ||
tena kuṇḍeśvarī khyātā kuṇḍaṃ śaṃkhodakaṃ smṛtam
||8||तस्य नादेन महता देवी तत्र समागता ॥
पृच्छती कारणं तत्र तत्कुण्डस्य समीपगा ॥
तेन कुण्डेश्वरी ख्याता कुण्डं शंखोदकं स्मृतम्
māghe māsi tṛtīyāyāṃ yastāṃ pūjayate naraḥ ||
nārī vā bhaktisaṃyuktā sa gaurīpadamāpnuyāt
||9||माघे मासि तृतीयायां यस्तां पूजयते नरः ॥
नारी वा भक्तिसंयुक्ता स गौरीपदमाप्नुयात्
daṃpatyorbhojanaṃ tatra deyaṃ yātrāphalepsubhiḥ ||
kañcukaṃ phaladānaṃ ca gauriṇīnāṃ ca bhojanam
||10||दंपत्योर्भोजनं तत्र देयं यात्राफलेप्सुभिः ॥
कञ्चुकं फलदानं च गौरिणीनां च भोजनम्
iti śrīskānde mahāpurāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsakṣetramāhātmye śaṃkhodakakuṇḍeśvarīgaurīmāhātmyavarṇanaṃnāma ṣoḍaśottaraśatatamo'dhyāyaḥ || 116 ||