pāṃḍaveśvaramāhātmyavarṇanam
īśvara uvāca
tasyāstu dakṣiṇe bhāge sthitaṃ liṃgaṃ mahāprabham ||
pāṃḍaveśvaranāmāḍhyaṃ paṃcabhiḥ sthāpitaṃ kramāt
||1||तस्यास्तु दक्षिणे भागे स्थितं लिंगं महाप्रभम् ॥
पांडवेश्वरनामाढ्यं पंचभिः स्थापितं क्रमात्
guptacaryāṃ yadā yātāḥ pāṃḍavā vanavāsinaḥ ||
tīrthayātrāprasaṃgena prabhāsaṃ kṣetramāgatāḥ
||2||गुप्तचर्यां यदा याताः पांडवा वनवासिनः ॥
तीर्थयात्राप्रसंगेन प्रभासं क्षेत्रमागताः
tasminkāle mahādevi saṃ prāpte somaparvaṇi ||
sthāpayāmāsuste sarve liṃgaṃ saṃnihitā taṭe
||3||तस्मिन्काले महादेवि सं प्राप्ते सोमपर्वणि ॥
स्थापयामासुस्ते सर्वे लिंगं संनिहिता तटे
mārkaṇḍapramukhānkṛtvā ṛtvijo brāhmaṇottamān ||
vedoktaiḥ kārayāmāsurabhiṣekaṃ vṛṣāndaduḥ
||4||मार्कण्डप्रमुखान्कृत्वा ऋत्विजो ब्राह्मणोत्तमान् ॥
वेदोक्तैः कारयामासुरभिषेकं वृषान्ददुः
tataḥ prasannā ṛṣayo mārkaṃḍapramukhāḥ priye ||
pratiṣṭhitasya liṃgasya pāṃḍavairvaravarṇini
||5||ततः प्रसन्ना ऋषयो मार्कंडप्रमुखाः प्रिये ॥
प्रतिष्ठितस्य लिंगस्य पांडवैर्वरवर्णिनि
ṛṣaya ūcuḥ
ye caitatpūjayiṣyaṃti liṃgaṃ pāṃḍavapūjitam ||
te vai pūjyā bhaviṣyaṃti devadānavarakṣasām
||6||ये चैतत्पूजयिष्यंति लिंगं पांडवपूजितम् ॥
ते वै पूज्या भविष्यंति देवदानवरक्षसाम्
aśvamedhaphalaṃ teṣāṃ samyakchraddhārcanena vai ||
bhaviṣyati na saṃdeho hyasmadvākyaprabhāvataḥ
||7||अश्वमेधफलं तेषां सम्यक्छ्रद्धार्चनेन वै ॥
भविष्यति न संदेहो ह्यस्मद्वाक्यप्रभावतः
snātvā saṃnihitākuṃḍe yo'rcayetpāṃḍaveśvaram ||
māghe māsi samagre tu sa sākṣātpuruṣottamaḥ
||8||स्नात्वा संनिहिताकुंडे योऽर्चयेत्पांडवेश्वरम् ॥
माघे मासि समग्रे तु स साक्षात्पुरुषोत्तमः
darśanenāpi tasyāpi pāpaṃ yāti sahasradhā ||
viṣṇurūpo hi sa prokto nātra kāryā vicāraṇā
||9||दर्शनेनापि तस्यापि पापं याति सहस्रधा ॥
विष्णुरूपो हि स प्रोक्तो नात्र कार्या विचारणा
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye saṃnihityāmāhātmye pāṃḍaveśvaramāhātmyavarṇanaṃnāma ṣaḍaśītitamo'dhyāyaḥ || 86 ||