maṅgalāmāhātmyavarṇanam
īśvara uvāca
prabhāsakṣetradūtīnāṃ tritayaṃ varavarṇini ||
atha te saṃpravakṣyāmi śṛṇu hyekamanāḥ priye
||1||प्रभासक्षेत्रदूतीनां त्रितयं वरवर्णिनि ॥
अथ ते संप्रवक्ष्यामि शृणु ह्येकमनाः प्रिये
prathamā maṃgalā devī viśālākṣī dvitīyikā ||
tathā catvaradevī tu tṛtīyā parikīrtitā
||2||प्रथमा मंगला देवी विशालाक्षी द्वितीयिका ॥
तथा चत्वरदेवी तु तृतीया परिकीर्तिता
yathānukramataḥ pūjyāḥ śaktayastā varānane ||
prabhāsakṣetrayātrāyāḥ phalaprepsurnaro yadi
||3||यथानुक्रमतः पूज्याः शक्तयस्ता वरानने ॥
प्रभासक्षेत्रयात्रायाः फलप्रेप्सुर्नरो यदि
devyuvāca
kasminsthāne sthitā deva dūtyastāḥ kṣetrarakṣikāḥ ||
kasya tāḥ kathamārādhyāḥ kathaṃ pūjyā jagatpate
||4||कस्मिन्स्थाने स्थिता देव दूत्यस्ताः क्षेत्ररक्षिकाः ॥
कस्य ताः कथमाराध्याः कथं पूज्या जगत्पते
īśvara uvāca
brāhmī tu maṃgalā proktā viśālākṣī tu vaiṣṇavī ||
raudrīśaktiḥ samākhyātā devī sā catvarapriyā
||5||ब्राह्मी तु मंगला प्रोक्ता विशालाक्षी तु वैष्णवी ॥
रौद्रीशक्तिः समाख्याता देवी सा चत्वरप्रिया
maṃgalā prathamaṃ pūjyā ajādevyuttare sthitā ||
rāhvīśāddakṣiṇebhāge nātidūre varānane
||6||मंगला प्रथमं पूज्या अजादेव्युत्तरे स्थिता ॥
राह्वीशाद्दक्षिणेभागे नातिदूरे वरानने
someśvarapratiṣṭhāpya prārabdhe yajñakarmaṇi ||
somena tatra devānāmāgatā sā didṛkṣayā
||7||सोमेश्वरप्रतिष्ठाप्य प्रारब्धे यज्ञकर्मणि ॥
सोमेन तत्र देवानामागता सा दिदृक्षया
brahmādīnāṃ ca sā yasmānmāṃgalyaṃ kṛtavatyume ||
tasmātsā maṃgalā proktā sarvamāṃgalyadāyinī
||8||ब्रह्मादीनां च सा यस्मान्मांगल्यं कृतवत्युमे ॥
तस्मात्सा मंगला प्रोक्ता सर्वमांगल्यदायिनी
tṛtīyāyāṃ tu yā nārī naro vā pūjayiṣyati ||
tasyā'maṃgalyaduḥkhāni nāśaṃ yāsyaṃti kṛtsnaśaḥ
||9||तृतीयायां तु या नारी नरो वा पूजयिष्यति ॥
तस्याऽमंगल्यदुःखानि नाशं यास्यंति कृत्स्नशः
dampatībhojanaṃ tatra phaladānaṃ sakañcukam ||
praśastaṃ pṛṣadājyasya prāśanaṃ pāpanāśanam
||10||दम्पतीभोजनं तत्र फलदानं सकञ्चुकम् ॥
प्रशस्तं पृषदाज्यस्य प्राशनं पापनाशनम्
iti saṃkṣepataḥ proktaṃ mahābhāgyaṃ mahodayam ||
maṃgalāyāśca māhātmyaṃ sarvapātakanāśanam
||11||इति संक्षेपतः प्रोक्तं महाभाग्यं महोदयम् ॥
मंगलायाश्च माहात्म्यं सर्वपातकनाशनम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye maṅgalāmāhātmyavarṇanaṃnāma ṣaṣṭitamo'dhyāyaḥ || 60 ||