jalaprabhāsamāhātmyavarṇanam
īśvara uvāca
tato gacchenmahādevi prabhāsaṃ jalasaṃsthitam ||
vṛddhaprabhāsāddakṣiṇato nātidūre vyavasthitam
||1||ततो गच्छेन्महादेवि प्रभासं जलसंस्थितम् ॥
वृद्धप्रभासाद्दक्षिणतो नातिदूरे व्यवस्थितम्
tasyaiva devi devasya śṛṇu māhātmyamuttamam
||2||तस्यैव देवि देवस्य शृणु माहात्म्यमुत्तमम्
jāmadagnyena rāmeṇa yadā kṣattravadhaḥ kṛtaḥ ||
tadā'sya paramā jātā ghṛṇā manasi bhāmini
||3||जामदग्न्येन रामेण यदा क्षत्त्रवधः कृतः ॥
तदाऽस्य परमा जाता घृणा मनसि भामिनि
tatastvārādhayāmāsa mahādevaṃ sureśvaram ||
ugraṃ tapaḥ samāsthāya bahūnvarṣa gaṇānpriye
||4||ततस्त्वाराधयामास महादेवं सुरेश्वरम् ॥
उग्रं तपः समास्थाय बहून्वर्ष गणान्प्रिये
tatastuṣṭo mahādevastasya pratyakṣatāṃ gataḥ ||
abravīdvaradaste'haṃ varaṃ varaya suvrata
||5||ततस्तुष्टो महादेवस्तस्य प्रत्यक्षतां गतः ॥
अब्रवीद्वरदस्तेऽहं वरं वरय सुव्रत
rāma uvāca
yadi tuṣṭo'si me deva yadi deyo varo mama ||
darśayasva svakaṃ liṃgaṃ yajñe vajreṇa chāditam
||6||यदि तुष्टोऽसि मे देव यदि देयो वरो मम ॥
दर्शयस्व स्वकं लिंगं यज्ञे वज्रेण छादितम्
ghṛṇā me mahatī jātā hatvemānkṣatriyānbahūn ||
darśanāttava liṃgasya yena me naśyate ghṛṇā
||7||घृणा मे महती जाता हत्वेमान्क्षत्रियान्बहून् ॥
दर्शनात्तव लिंगस्य येन मे नश्यते घृणा
tathā me pātakaṃ sarvaṃ prasādāttava śaṃkara
||8||तथा मे पातकं सर्वं प्रसादात्तव शंकर
śaṃkara uvāca
mama liṃgaṃ sahasrākṣa utthitaṃ tu punaḥpunaḥ ||
vajreṇācchādayatyeva bhayena mahatā vṛtaḥ
||9||मम लिंगं सहस्राक्ष उत्थितं तु पुनःपुनः ॥
वज्रेणाच्छादयत्येव भयेन महता वृतः
na te'haṃ darśanaṃ yāsye liṃgarūpī kadācana
||10||न तेऽहं दर्शनं यास्ये लिंगरूपी कदाचन
yanmāṃ vadasi ghṛṇayā vṛto'haṃ pātakena tu ||
tatte'haṃ nāśayiṣyāmi sparśanāttu dvijottama
||11||यन्मां वदसि घृणया वृतोऽहं पातकेन तु ॥
तत्तेऽहं नाशयिष्यामि स्पर्शनात्तु द्विजोत्तम
asmiñjalāśraye puṇye jalamadhye mahāmate ||
utthāsyati mahāliṃgaṃ tasya tvaṃ darśanaṃ kuru
||12||अस्मिञ्जलाश्रये पुण्ये जलमध्ये महामते ॥
उत्थास्यति महालिंगं तस्य त्वं दर्शनं कुरु
gamiṣyati ghṛṇā sarvā niṣpāpastvaṃ bhaviṣyasi ||
uktvaivamudatiṣṭhacca jalamadhyādvarānane
||13||गमिष्यति घृणा सर्वा निष्पापस्त्वं भविष्यसि ॥
उक्त्वैवमुदतिष्ठच्च जलमध्याद्वरानने
jalaprabhāsanāmāsya tato jātaṃ dharātale ||
tasyālaṃ sparśanāddevi śivalokaṃ vrajennaraḥ
||14||जलप्रभासनामास्य ततो जातं धरातले ॥
तस्यालं स्पर्शनाद्देवि शिवलोकं व्रजेन्नरः
ekaṃ bhojayate yo'tra brāhmaṇaṃ śaṃsitavratam ||
bhojito'haṃ bhavettena sapatnīko na saṃśayaḥ
||15||एकं भोजयते योऽत्र ब्राह्मणं शंसितव्रतम् ॥
भोजितोऽहं भवेत्तेन सपत्नीको न संशयः
eṣā jalaprabhāsasya saṃbhūtiste mayoditā ||
śrutā pāpopaśamanī sarvakāmaphalapradā
||16||एषा जलप्रभासस्य संभूतिस्ते मयोदिता ॥
श्रुता पापोपशमनी सर्वकामफलप्रदा
iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye jalaprabhāsamāhātmyavarṇanaṃnāma ṣaṇṇavatyuttaraśatatamo'dhyāyaḥ || 196 ||