indreśvaramāhātmyavarṇanam
īśvara uvāca
tato gacchenmahādevi liṃgamiṃdrapratiṣṭhitam ||
pāpamocananāmāḍhyaṃ dakṣiṇe puruṣottamāt
||1||ततो गच्छेन्महादेवि लिंगमिंद्रप्रतिष्ठितम् ॥
पापमोचननामाढ्यं दक्षिणे पुरुषोत्तमात्
vṛtraṃ hatvā purā śakro brahmahatyāsamanvitaḥ ||
abravītsa ṛṣīndivyānkathameṣā gamiṣyati
||2||वृत्रं हत्वा पुरा शक्रो ब्रह्महत्यासमन्वितः ॥
अब्रवीत्स ऋषीन्दिव्यान्कथमेषा गमिष्यति
brahmahatyā hi duṣprekṣyā vivarṇajananī mama ||
durgaṃdhacāriṇī caiva sarvatejovināśinī
||3||ब्रह्महत्या हि दुष्प्रेक्ष्या विवर्णजननी मम ॥
दुर्गंधचारिणी चैव सर्वतेजोविनाशिनी
athocustaṃ suragaṇā nāradādyā maharṣayaḥ ||
prabhāsaṃ gaccha deveśa kṣetraṃ pāpaharaṃ hi tat
||4||अथोचुस्तं सुरगणा नारदाद्या महर्षयः ॥
प्रभासं गच्छ देवेश क्षेत्रं पापहरं हि तत्
tatrārādhya mahādevaṃ mokṣyase brahmahatyayā ||
sa tatheti pratijñāya gatastatra varānane
||5||तत्राराध्य महादेवं मोक्ष्यसे ब्रह्महत्यया ॥
स तथेति प्रतिज्ञाय गतस्तत्र वरानने
liṃgaṃ saṃsthāpayāmāsa devadevasya śūlinaḥ ||
tasya pūjārato nityaṃ dhūpagaṃdhānulepanaiḥ
||6||लिंगं संस्थापयामास देवदेवस्य शूलिनः ॥
तस्य पूजारतो नित्यं धूपगंधानुलेपनैः
tato'sya gātradaurgaṃdhyaṃ nāśamāśvabhyagacchata ||
vivarṇatvaṃ gataṃ sarvaṃ vapuścābhūttathottamam
||7||ततोऽस्य गात्रदौर्गंध्यं नाशमाश्वभ्यगच्छत ॥
विवर्णत्वं गतं सर्वं वपुश्चाभूत्तथोत्तमम्
atha hṛṣṭamanā bhūtvā vākyametaduvāca ha ||
tatrāgatya naro bhaktyā yaścainaṃ pūjayiṣyati
||8||अथ हृष्टमना भूत्वा वाक्यमेतदुवाच ह ॥
तत्रागत्य नरो भक्त्या यश्चैनं पूजयिष्यति
brahmahatyādikaṃ pāpaṃ nāśaṃ tasya prayāsyati ||
evamuktvā sahasrākṣaḥ prahṛṣṭastridivaṃ yayau
||9||ब्रह्महत्यादिकं पापं नाशं तस्य प्रयास्यति ॥
एवमुक्त्वा सहस्राक्षः प्रहृष्टस्त्रिदिवं ययौ
brahmahatyāvinirmuktaḥ pūjyamāno divaukasaiḥ ||
godānaṃ tatra dātavyaṃ brāhmaṇe vedapārage ||
brahmahatyāpanodārthaṃ tatra śrāddhaṃ samācaret
||10||ब्रह्महत्याविनिर्मुक्तः पूज्यमानो दिवौकसैः ॥
गोदानं तत्र दातव्यं ब्राह्मणे वेदपारगे ॥
ब्रह्महत्यापनोदार्थं तत्र श्राद्धं समाचरेत्
iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya indreśvaramāhātmyavarṇanaṃnāma caturviṃśatyuttaradviśatatamo'dhyāyaḥ || 224 ||