someśvarapratiṣṭhāmāhātmyavarṇanam
īśvara uvāca
tataḥ śāṃtamanā bhūtvā caṃdramā vismayānvitaḥ ||
śaṃbhubhaktyā parītātmā prabhāsakṣetramāsthitaḥ
||1||ततः शांतमना भूत्वा चंद्रमा विस्मयान्वितः ॥
शंभुभक्त्या परीतात्मा प्रभासक्षेत्रमास्थितः
pūrvoktaṃ yattu devena sa tathā kṛtavānvibhuḥ ||
gatvā sāgaramadhye tu gṛhītvā liṃgamuttamam
||2||पूर्वोक्तं यत्तु देवेन स तथा कृतवान्विभुः ॥
गत्वा सागरमध्ये तु गृहीत्वा लिंगमुत्तमम्
viśvakarmmāṇamāhūya sahitaṃ paricārakaiḥ ||
ādideśa svayaṃ somastvaṣṭāraṃ devaśilpinam
||3||विश्वकर्म्माणमाहूय सहितं परिचारकैः ॥
आदिदेश स्वयं सोमस्त्वष्टारं देवशिल्पिनम्
caṃdra uvāca
viśvakarmannidaṃ liṃgaṃ mama dattaṃ tu śaṃbhunā ||
gṛhāṇa tvaṃ mahābāho yuktasthāne niveśaya
||4||विश्वकर्मन्निदं लिंगं मम दत्तं तु शंभुना ॥
गृहाण त्वं महाबाहो युक्तस्थाने निवेशय
rakṣasva tāvadgantāsmi svakīyaṃ bhavanaṃ vibho ||
yajñārthamānayiṣyāmi yajñopakaraṇāni ca
||5||रक्षस्व तावद्गन्तास्मि स्वकीयं भवनं विभो ॥
यज्ञार्थमानयिष्यामि यज्ञोपकरणानि च
īśvara uvāca
ityuktvā ca tadā caṃdraścaṃdra lokaṃ jagāma ha ||
gatvā tatra mahādevi caṃdralokaṃmahāprabham
||6||इत्युक्त्वा च तदा चंद्रश्चंद्र लोकं जगाम ह ॥
गत्वा तत्र महादेवि चंद्रलोकंमहाप्रभम्
koṭiyojanavistīrṇaṃ sadāmṛtamayaṃ śubham ||
tatrāhūya mahādevi pratīhāraṃ sumedhasam
||7||कोटियोजनविस्तीर्णं सदामृतमयं शुभम् ॥
तत्राहूय महादेवि प्रतीहारं सुमेधसम्
maṃtriṇaṃ hemagarbhāṃgaṃ bṛhaspatisamaṃ dhiyā ||
yajñopaskarasaṃbhāraṃ sarvamādāya satvarāḥ
||8||मंत्रिणं हेमगर्भांगं बृहस्पतिसमं धिया ॥
यज्ञोपस्करसंभारं सर्वमादाय सत्वराः
prabhāsakṣetraṃ gacchaṃtu mamādeśaparāyaṇāḥ ||
sāgnibhirbrāhmaṇaiḥ sārddhaṃ gacchaṃtu kṣetramuttamam
||9||प्रभासक्षेत्रं गच्छंतु ममादेशपरायणाः ॥
साग्निभिर्ब्राह्मणैः सार्द्धं गच्छंतु क्षेत्रमुत्तमम्
śīghraṃ saṃpādyatāṃ sarvaṃ yathā yajñaḥ pravartate ||
sarveṣāmeva viprāṇāṃ caṃdralokanivāsinām
||10||शीघ्रं संपाद्यतां सर्वं यथा यज्ञः प्रवर्तते ॥
सर्वेषामेव विप्राणां चंद्रलोकनिवासिनाम्
pṛthakpṛthagvimānaṃ tu deyaṃ teṣāṃ mahādhanam ||
gavāṃ ca daśalakṣāṇāṃ savatsānāṃ payomucām
||11||पृथक्पृथग्विमानं तु देयं तेषां महाधनम् ॥
गवां च दशलक्षाणां सवत्सानां पयोमुचाम्
hemabhārairbhūṣitānāṃ kāmadhenūpamatviṣām ||
aśvānāṃ śyāmakarṇānāṃ sapādaṃ lakṣameva ca
||12||हेमभारैर्भूषितानां कामधेनूपमत्विषाम् ॥
अश्वानां श्यामकर्णानां सपादं लक्षमेव च
daṃtināmayutaṃ caiva ghaṃṭābharaṇaśobhitam ||
sahasrāṇi ca catvāri rathānāṃ vātaraṃhasām
||13||दंतिनामयुतं चैव घंटाभरणशोभितम् ॥
सहस्राणि च चत्वारि रथानां वातरंहसाम्
lakṣaṃ tu karabhāṇāṃ ca maṇimāṇikyasaṃyutam ||
sainyānāṃ koṭirekā tu caturaṃgabalānvitā
||14||लक्षं तु करभाणां च मणिमाणिक्यसंयुतम् ॥
सैन्यानां कोटिरेका तु चतुरंगबलान्विता
agniśaucāni vastrāṇi brāhmaṇārthaṃ tathaiva ca ||
vibhūṣaṇāni divyāni ṛtvigarthaṃ śubhāni ca
||15||अग्निशौचानि वस्त्राणि ब्राह्मणार्थं तथैव च ॥
विभूषणानि दिव्यानि ऋत्विगर्थं शुभानि च
nānābhakṣyāṇi bhojyāni pānāni vividhāni ca ||
lakṣaṃ karmakarāṇāṃ tu dāsīnāṃ lakṣameva ca
||16||नानाभक्ष्याणि भोज्यानि पानानि विविधानि च ॥
लक्षं कर्मकराणां तु दासीनां लक्षमेव च
dāruvaṃśāvadhi proktaṃ yatkiṃcitsvaṃ madājñayā ||
anyadyadbrāhmaṇā brūyustatsarvaṃ tatra nīyatām
||17||दारुवंशावधि प्रोक्तं यत्किंचित्स्वं मदाज्ञया ॥
अन्यद्यद्ब्राह्मणा ब्रूयुस्तत्सर्वं तत्र नीयताम्
devānāṃ dānavānāṃ tu yakṣagaṃdharvarakṣa sām ||
saptadvīpakṣitīśānāṃ saptapātālavāsinām
||18||देवानां दानवानां तु यक्षगंधर्वरक्ष साम् ॥
सप्तद्वीपक्षितीशानां सप्तपातालवासिनाम्
nānānṛpasahasrāṇāṃ ghoṣaṇā kriyatāṃ muhuḥ ||
sarveṣāṃ ghoṣaṇā kāryā prabhāsāgamanaṃ prati
||19||नानानृपसहस्राणां घोषणा क्रियतां मुहुः ॥
सर्वेषां घोषणा कार्या प्रभासागमनं प्रति
ityuktvā maṃtriṇaṃ tatra caṃdramāstvarayā'nvitaḥ ||
brahmalokaṃ sa gatavānyajñārthaṃ brahmaṇoṃtikam
||20||इत्युक्त्वा मंत्रिणं तत्र चंद्रमास्त्वरयाऽन्वितः ॥
ब्रह्मलोकं स गतवान्यज्ञार्थं ब्रह्मणोंतिकम्
so'pi caṃdramaso maṃtrī hemagarbho mahāprabhaḥ ||
somājñāṃ śirasā kṛtvā yajñasaṃbhārasaṃbhṛtaḥ
||21||सोऽपि चंद्रमसो मंत्री हेमगर्भो महाप्रभः ॥
सोमाज्ञां शिरसा कृत्वा यज्ञसंभारसंभृतः
prabhāsaṃ kṣetramāgatya yajñārthaṃ yatnavānabhūt ||
tathaiva cāhvayāṃcakre bhūrbhuvaḥsvarnivāsinaḥ
||22||प्रभासं क्षेत्रमागत्य यज्ञार्थं यत्नवानभूत् ॥
तथैव चाह्वयांचक्रे भूर्भुवःस्वर्निवासिनः
śrutvā tu ghoṣaṇāṃ sarve śīghraṃ tatra samāyayuḥ ||
raviyojanaparyaṃtaṃ kṣetramālokya tatra tat
||23||श्रुत्वा तु घोषणां सर्वे शीघ्रं तत्र समाययुः ॥
रवियोजनपर्यंतं क्षेत्रमालोक्य तत्र तत्
brāhmaṇāṃśca samāhūya somādhyakṣaṃ uvāca tān ||
yajñāṃgaṃ sarvamānītaṃ mayā somājñayā dvijāḥ ||
anaṃtaraṃ tu yatkṛtyaṃ bhavadbhistadvidhīyatām
||24||ब्राह्मणांश्च समाहूय सोमाध्यक्षं उवाच तान् ॥
यज्ञांगं सर्वमानीतं मया सोमाज्ञया द्विजाः ॥
अनंतरं तु यत्कृत्यं भवद्भिस्तद्विधीयताम्
ityuktā brāhmaṇāḥ sarve taponirdhūtakalmaṣāḥ ||
tatraiva dadṛśuḥ sarve tvaṣṭāraṃ devaśilpinam
||25||इत्युक्ता ब्राह्मणाः सर्वे तपोनिर्धूतकल्मषाः ॥
तत्रैव ददृशुः सर्वे त्वष्टारं देवशिल्पिनम्
taṃ dṛṣṭvā tu dvijāḥ sarve liṃgaṃ dṛṣṭvā samīpataḥ ||
kathametaditi procurviśvakarmanbravīhi naḥ ||
kasmādatra sthitastvaṃ vai śilpikoṭisamanvitaḥ
||26||तं दृष्ट्वा तु द्विजाः सर्वे लिंगं दृष्ट्वा समीपतः ॥
कथमेतदिति प्रोचुर्विश्वकर्मन्ब्रवीहि नः ॥
कस्मादत्र स्थितस्त्वं वै शिल्पिकोटिसमन्वितः
viśvakarmmovāca
ahaṃ somaniyuktastu yukto'smi liṃgarakṣaṇe ||
tadājñāpālane yatnaḥ kriyate'to mayā dvijāḥ
||27||अहं सोमनियुक्तस्तु युक्तोऽस्मि लिंगरक्षणे ॥
तदाज्ञापालने यत्नः क्रियतेऽतो मया द्विजाः
īśvara uvāca
evaṃ śrutvā yadā viprā jñātvā sarvaṃ tu kāraṇam ||
caritā yajñakāryārthaṃ tataścakrurupa kramam
||28||एवं श्रुत्वा यदा विप्रा ज्ञात्वा सर्वं तु कारणम् ॥
चरिता यज्ञकार्यार्थं ततश्चक्रुरुप क्रमम्
tatra yojanaparyaṃtaṃ devānāṃ yajanaṃ śubham ||
taddevayajanaṃ kṛtvā patnīśālāṃ ca cakrire
||29||तत्र योजनपर्यंतं देवानां यजनं शुभम् ॥
तद्देवयजनं कृत्वा पत्नीशालां च चक्रिरे
havirddhānaṃ sadaścaiva uttarā vedireva ca ||
brahmaṇaḥ sadanāgnīdhrītyevaṃ sthānāni cakrire
||30||हविर्द्धानं सदश्चैव उत्तरा वेदिरेव च ॥
ब्रह्मणः सदनाग्नीध्रीत्येवं स्थानानि चक्रिरे
tatra yojanaparyaṃtaṃ yajñayūpāṃśca maṃḍapān ||
viśvakarmā cakārāśu kuṃḍāni vividhāni ca
||31||तत्र योजनपर्यंतं यज्ञयूपांश्च मंडपान् ॥
विश्वकर्मा चकाराशु कुंडानि विविधानि च
sahasrasaṃkhyayā tatra kuṇḍānāṃ maṃḍapāvadhi ||
tatra te brāhmaṇāḥ sarve pratiṣṭhāyajñakovidāḥ
||32||सहस्रसंख्यया तत्र कुण्डानां मंडपावधि ॥
तत्र ते ब्राह्मणाः सर्वे प्रतिष्ठायज्ञकोविदाः
nānābharaṇaratnaiśca brāhmaṇāḥ samalaṃkṛtāḥ ||
cakruḥ sarve yathanyāyaṃ śāstraṃ dṛṣṭvā punaḥpunaḥ
||33||नानाभरणरत्नैश्च ब्राह्मणाः समलंकृताः ॥
चक्रुः सर्वे यथन्यायं शास्त्रं दृष्ट्वा पुनःपुनः
vṛkṣāṃstathauṣadhīrdivyā samitpuṣpakuśādikān ||
homadravyādikaṃ sarva mājyaṃ prājyaṃ navaṃ payaḥ
||34||वृक्षांस्तथौषधीर्दिव्या समित्पुष्पकुशादिकान् ॥
होमद्रव्यादिकं सर्व माज्यं प्राज्यं नवं पयः
tathānyadapi yatkiṃcidyajñopakaraṇaṃ smṛtam ||
varddhanīkalaśādyaṃ ca sarvaṃ hemamayaṃ śubham
||35||तथान्यदपि यत्किंचिद्यज्ञोपकरणं स्मृतम् ॥
वर्द्धनीकलशाद्यं च सर्वं हेममयं शुभम्
cakruḥ sarvaṃ yathānyāyaṃ pratiṣṭhāmakhamādṛtāḥ ||
tatra vipragaṇo hṛṣṭo bhakṣyabhojyāditarpitaḥ
||36||चक्रुः सर्वं यथान्यायं प्रतिष्ठामखमादृताः ॥
तत्र विप्रगणो हृष्टो भक्ष्यभोज्यादितर्पितः
vedadhvanitanirghoṣairdivaṃ bhūmiṃ ca saṃspṛśan ||
suśubhe maṃḍapastatra patākābhiralaṃkṛtaḥ
||37||वेदध्वनितनिर्घोषैर्दिवं भूमिं च संस्पृशन् ॥
सुशुभे मंडपस्तत्र पताकाभिरलंकृतः
divyasiṃhāsanopeto muktādāmapariṣkṛtaḥ ||
divyacandanamālābhiḥ kalpapallavatoraṇaiḥ
||38||दिव्यसिंहासनोपेतो मुक्तादामपरिष्कृतः ॥
दिव्यचन्दनमालाभिः कल्पपल्लवतोरणैः
divyagandha sugandhādyaiḥ svargasthānamivābhavat ||
caturdaśavidhastatra bhūtagrāmaḥ samāgataḥ
||39||दिव्यगन्ध सुगन्धाद्यैः स्वर्गस्थानमिवाभवत् ॥
चतुर्दशविधस्तत्र भूतग्रामः समागतः
sthāvaraḥ sarpajātiśca pakṣijātistathaiva ca ||
mṛgasaṃjñaścaturthaśca paśvākhyaḥ pañcamaḥ smṛtaḥ
||40||स्थावरः सर्पजातिश्च पक्षिजातिस्तथैव च ॥
मृगसंज्ञश्चतुर्थश्च पश्वाख्यः पञ्चमः स्मृतः
ṣaṣṭhaśca mānuṣaḥ proktaḥ paiśācaḥ saptamaḥ smṛtaḥ ||
aṣṭamo rākṣasaḥ prokto navamo yajña eva ca
||41||षष्ठश्च मानुषः प्रोक्तः पैशाचः सप्तमः स्मृतः ॥
अष्टमो राक्षसः प्रोक्तो नवमो यज्ञ एव च
gāṃdharvaśākrasaumyāśca prājāpatyastathaiva ca ||
brāhmaśceti samākhyātaścaturdaśavidho gaṇaḥ
||42||गांधर्वशाक्रसौम्याश्च प्राजापत्यस्तथैव च ॥
ब्राह्मश्चेति समाख्यातश्चतुर्दशविधो गणः
viśvedevāstathā sādhyā maruto vasavastathā ||
lokapālāstathāṣṭau ca nakṣatrāṇi grahaiḥ saha
||43||विश्वेदेवास्तथा साध्या मरुतो वसवस्तथा ॥
लोकपालास्तथाष्टौ च नक्षत्राणि ग्रहैः सह
brahmāṇḍe devatā yāśca tāḥ sarvāstatra cāgatāḥ ||
hṛṣṭāḥ prabhāsake kṣetre prārabdhe yajñakarmmaṇi
||44||ब्रह्माण्डे देवता याश्च ताः सर्वास्तत्र चागताः ॥
हृष्टाः प्रभासके क्षेत्रे प्रारब्धे यज्ञकर्म्मणि
ghṛtakṣīravahā nadyo dadhipāyasakardamāḥ ||
pakvānnānāṃ phalānāṃ ca rāśayaḥ parvatopamāḥ
||45||घृतक्षीरवहा नद्यो दधिपायसकर्दमाः ॥
पक्वान्नानां फलानां च राशयः पर्वतोपमाः
dṛśyante vividhākārāstasminyajñamahotsave ||
jagu(?)statraiva gandharvā nanṛtuścāpsarogaṇāḥ
||46||दृश्यन्ते विविधाकारास्तस्मिन्यज्ञमहोत्सवे ॥
जगु(?)स्तत्रैव गन्धर्वा ननृतुश्चाप्सरोगणाः
bhakṣyabhojyaiśca vividhaiḥ kāmapānādibhistathā ||
tṛptā devāśca munayo bhūtagrāmāścaturdaśa
||47||भक्ष्यभोज्यैश्च विविधैः कामपानादिभिस्तथा ॥
तृप्ता देवाश्च मुनयो भूतग्रामाश्चतुर्दश
evaṃ saṃbhārasahitaṃ yajñāṃgaṃ sarvameva hi ||
praguṇīkṛtya sacivo muktvā tatraiva rakṣakān ||
somasyāhvānanārthaṃ ca brahmalokaṃ jagāma ha
||48||एवं संभारसहितं यज्ञांगं सर्वमेव हि ॥
प्रगुणीकृत्य सचिवो मुक्त्वा तत्रैव रक्षकान् ॥
सोमस्याह्वाननार्थं च ब्रह्मलोकं जगाम ह
īśvara uvāca
sa dṛṣṭvā brahmaṇaḥ pārśve sthitaṃ somamahāprabham ||
praṇamya daṇḍavadbhūmau somaṃ brahmāṇameva ca
||49||स दृष्ट्वा ब्रह्मणः पार्श्वे स्थितं सोममहाप्रभम् ॥
प्रणम्य दण्डवद्भूमौ सोमं ब्रह्माणमेव च
kṛtāṃjalipuṭo bhūtvā uvāca natakaṃdharaḥ ||
hemagarbha uvāca ||
bhagavanbhavadādeśādyajñāṃgaṃ sarvameva hi
||50||कृतांजलिपुटो भूत्वा उवाच नतकंधरः ॥
हेमगर्भ उवाच ॥
भगवन्भवदादेशाद्यज्ञांगं सर्वमेव हि
tatra prābhāsike kṣetre mayā te praguṇīkṛtam ||
tatra brahmarṣayaḥ sarve tathā rājarṣayo'pare
||51||तत्र प्राभासिके क्षेत्रे मया ते प्रगुणीकृतम् ॥
तत्र ब्रह्मर्षयः सर्वे तथा राजर्षयोऽपरे
tvanmārgaprekṣakāḥ sarve santiṣṭhante samākulāḥ ||
anantaraṃ tu yatkṛtyaṃ tadbhavānkartumarhati
||52||त्वन्मार्गप्रेक्षकाः सर्वे सन्तिष्ठन्ते समाकुलाः ॥
अनन्तरं तु यत्कृत्यं तद्भवान्कर्तुमर्हति
īśvara uvāca
ityuktastu tadā candraḥ samudrasya sutena vai ||
prahasyovāca brahmāṇaṃ candramā lokasākṣiṇam
||53||इत्युक्तस्तु तदा चन्द्रः समुद्रस्य सुतेन वै ॥
प्रहस्योवाच ब्रह्माणं चन्द्रमा लोकसाक्षिणम्
bhagavansarvadeveśa mamānugrahakāmyayā ||
pratiṣṭhāyajñakāmasya mamātithyaṃ kuru prabho
||54||भगवन्सर्वदेवेश ममानुग्रहकाम्यया ॥
प्रतिष्ठायज्ञकामस्य ममातिथ्यं कुरु प्रभो
adya me saphalaṃ janma saphalaṃ ca tapaḥ prabho ||
devatvamadya me brahmaṃstvatprasādādbhaviṣyati
||55||अद्य मे सफलं जन्म सफलं च तपः प्रभो ॥
देवत्वमद्य मे ब्रह्मंस्त्वत्प्रसादाद्भविष्यति
mayā ca tapasogreṇa prāptaṃ liṃgamumāpateḥ ||
tatpratiṣṭhāvidhiṃ sarvaṃ tadbhavānkarttumarhati
||56||मया च तपसोग्रेण प्राप्तं लिंगमुमापतेः ॥
तत्प्रतिष्ठाविधिं सर्वं तद्भवान्कर्त्तुमर्हति
brahmovāca
avaśyaṃ tava karttāsmi pratiṣṭhāṃ śaṃkarātmikām ||
tvadārādhanaliṃge tu someśe'tiviśeṣataḥ
||57||अवश्यं तव कर्त्तास्मि प्रतिष्ठां शंकरात्मिकाम् ॥
त्वदाराधनलिंगे तु सोमेशेऽतिविशेषतः
ye kecidbhavitāro vā atītā ye niśākarāḥ ||
teṣāṃ somānvayānāṃ ca sarveṣāmādyadaivatam
||58||ये केचिद्भवितारो वा अतीता ये निशाकराः ॥
तेषां सोमान्वयानां च सर्वेषामाद्यदैवतम्
yo'sau someśvaro deva ādau bhairavanāmabhṛt ||
manvantarāntare'tīte pratiṣṭhe'haṃ punaḥpunaḥ
||59||योऽसौ सोमेश्वरो देव आदौ भैरवनामभृत् ॥
मन्वन्तरान्तरेऽतीते प्रतिष्ठेऽहं पुनःपुनः
yadā prābhāsikaṃ kṣetre gato'haṃ cāṣṭavārṣikaḥ ||
āhūtaḥ pūrvamindreṇa bhairavasya pratiṣṭhite
||60||यदा प्राभासिकं क्षेत्रे गतोऽहं चाष्टवार्षिकः ॥
आहूतः पूर्वमिन्द्रेण भैरवस्य प्रतिष्ठिते
tatprabhṛtyeva me nāma bālarūpī nigadyate ||
anyeṣu sarvatīrtheṣu vṛddharūpī vasāmyaham
||61||तत्प्रभृत्येव मे नाम बालरूपी निगद्यते ॥
अन्येषु सर्वतीर्थेषु वृद्धरूपी वसाम्यहम्
prabhāse tu punaścaṃdra bālyāprabhṛti saṃvase ||
brahmāṇḍe yāni tīrthāni brāhmaṇāsteṣu ye smṛtāḥ
||62||प्रभासे तु पुनश्चंद्र बाल्याप्रभृति संवसे ॥
ब्रह्माण्डे यानि तीर्थानि ब्राह्मणास्तेषु ये स्मृताः
teṣāmādyo niśānātha prabhāse'haṃ vyavasthitaḥ ||
kalpekalpe niśānātha mama nāmāṃtaraṃ bhavet
||63||तेषामाद्यो निशानाथ प्रभासेऽहं व्यवस्थितः ॥
कल्पेकल्पे निशानाथ मम नामांतरं भवेत्
svayaṃbhūḥ prathame nāma dvitīye padmabhūḥ smṛtaḥ ||
tṛtīye viśvakartteti bālarūpī turīyake
||64||स्वयंभूः प्रथमे नाम द्वितीये पद्मभूः स्मृतः ॥
तृतीये विश्वकर्त्तेति बालरूपी तुरीयके
eṣāmeva parīvarto nāmnāṃ bhāvi punaḥpunaḥ ||
parārddhadvayaparyaṃtaṃ prabhāse saṃsthitasya me
||65||एषामेव परीवर्तो नाम्नां भावि पुनःपुनः ॥
परार्द्धद्वयपर्यंतं प्रभासे संस्थितस्य मे
ādisomena tatraiva śaṃbhornetrodbhavena vai ||
prabhāse tu tapastaptvā pratyakṣīkṛtaīśvaraḥ
||66||आदिसोमेन तत्रैव शंभोर्नेत्रोद्भवेन वै ॥
प्रभासे तु तपस्तप्त्वा प्रत्यक्षीकृतईश्वरः
tato dadau varaṃ tuṣṭaḥ pūrvacandrasya śūladhṛk ||
yasmādārādhito'haṃ te soma bhaktyā cirantanam
||67||ततो ददौ वरं तुष्टः पूर्वचन्द्रस्य शूलधृक् ॥
यस्मादाराधितोऽहं ते सोम भक्त्या चिरन्तनम्
tasmātsomeśanāmaivamasmim̐lliṃge bhaviṣyati ||
yāvadbrahmā śatānandaḥ prakṛtau na pralīyate
||68||तस्मात्सोमेशनामैवमस्मिँल्लिंगे भविष्यति ॥
यावद्ब्रह्मा शतानन्दः प्रकृतौ न प्रलीयते
ye kecidbhavitāro vai rātrināthā niśākarāḥ ||
te madārādhanaṃ cātra kariṣyaṃti punaḥpunaḥ
||69||ये केचिद्भवितारो वै रात्रिनाथा निशाकराः ॥
ते मदाराधनं चात्र करिष्यंति पुनःपुनः
ityuktvā bhagavāñchaṃbhustatraivāṃtaradhīyata ||
tasminkāle mayā soma ādyaṃ liṃgaṃ pratiṣṭhitam
||7||इत्युक्त्वा भगवाञ्छंभुस्तत्रैवांतरधीयत ॥
तस्मिन्काले मया सोम आद्यं लिंगं प्रतिष्ठितम्
tadāprabhṛti somānāṃ lakṣāṇāṃ dvitayaṃ gatam ||
sahasradvitayaṃ caiva śataṃ caikaṃ ṣaḍuttaram
||71||तदाप्रभृति सोमानां लक्षाणां द्वितयं गतम् ॥
सहस्रद्वितयं चैव शतं चैकं षडुत्तरम्
saptamastvaṃ mahāvāho varttase soma sāṃpratam ||
etāvantyeva liṃgāni pratiṣṭhāṃ prāpitāni me
||72||सप्तमस्त्वं महावाहो वर्त्तसे सोम सांप्रतम् ॥
एतावन्त्येव लिंगानि प्रतिष्ठां प्रापितानि मे
eṣa evādhunā so'haṃ tadārādhanajaṃ phalam ||
pratiṣṭhātāsmi bhadraṃ te soma kṛtya mamaiva tat
||73||एष एवाधुना सोऽहं तदाराधनजं फलम् ॥
प्रतिष्ठातास्मि भद्रं ते सोम कृत्य ममैव तत्
īśvara uvāca
ityuktvā bhagavānbrahmā vedavidyāsamanvitaḥ ||
sarvadevamayo devaiḥ sahitastīrthasaṃyutaḥ
||74||इत्युक्त्वा भगवान्ब्रह्मा वेदविद्यासमन्वितः ॥
सर्वदेवमयो देवैः सहितस्तीर्थसंयुतः
sanatkumārapramukhai ryogīndrairṛṣibhiḥ saha ||
bṛhaspatiṃ samāhūya puraskṛtya purodhasam
||75||सनत्कुमारप्रमुखै र्योगीन्द्रैर्ऋषिभिः सह ॥
बृहस्पतिं समाहूय पुरस्कृत्य पुरोधसम्
haṃsayānaṃ samāruhya koṭibrahmarṣibhiḥ saha ||
āgataḥ somarājena tadā brahmā jagatpatiḥ
||76||हंसयानं समारुह्य कोटिब्रह्मर्षिभिः सह ॥
आगतः सोमराजेन तदा ब्रह्मा जगत्पतिः
prābhāsike mahātīrthe yatra dāruvanaṃ smṛtam ||
ṛṣitoyā nadī yatra mahāpātakanāśinī
||77||प्राभासिके महातीर्थे यत्र दारुवनं स्मृतम् ॥
ऋषितोया नदी यत्र महापातकनाशिनी
asmiṃstīrthe prabhāse tu brahmabhāgaḥ sa ucyate ||
tridaivatamidaṃ kṣetraṃ mayā te kathitaṃ priye
||78||अस्मिंस्तीर्थे प्रभासे तु ब्रह्मभागः स उच्यते ॥
त्रिदैवतमिदं क्षेत्रं मया ते कथितं प्रिये
tatrāgatva caturvaktro brāhmabhāge'tinirmale ||
munīnākārayāmāsa unnata sthānavāsinaḥ
||79||तत्रागत्व चतुर्वक्त्रो ब्राह्मभागेऽतिनिर्मले ॥
मुनीनाकारयामास उन्नत स्थानवासिनः
āyāṃtaṃ vedhasaṃ dṛṣṭvā devarṣigurusaṃyutam ||
te sarve pūjayāmāsuḥ saṃstavairvedasaṃmitaiḥ
||80||आयांतं वेधसं दृष्ट्वा देवर्षिगुरुसंयुतम् ॥
ते सर्वे पूजयामासुः संस्तवैर्वेदसंमितैः
athovāca dvijānsarvānbrahmā lokapitāmahaḥ ||
ciramārādhya somena someśaṃ pāpanāśanam
||81||अथोवाच द्विजान्सर्वान्ब्रह्मा लोकपितामहः ॥
चिरमाराध्य सोमेन सोमेशं पापनाशनम्
tasminprasanne somena labdhaṃ liṅgamanuttamam ||
pratiṣṭhārthaṃ tu devasya āyātā dvijasattamāḥ
||82||तस्मिन्प्रसन्ने सोमेन लब्धं लिङ्गमनुत्तमम् ॥
प्रतिष्ठार्थं तु देवस्य आयाता द्विजसत्तमाः
yathā mayā sadā kāryā pratiṣṭhā śaṃkarātmikā ||
bhavadbhiḥ parikāryā sā mama bhāgasamāśrayaiḥ
||83||यथा मया सदा कार्या प्रतिष्ठा शंकरात्मिका ॥
भवद्भिः परिकार्या सा मम भागसमाश्रयैः
yataḥ kopena bhavatāṃ liṃgaṃ prapatitaṃ bhuvi ||
pratiṣṭhā tasya kartavyā yuṣmābhirvai na saṃśayaḥ
||84||यतः कोपेन भवतां लिंगं प्रपतितं भुवि ॥
प्रतिष्ठा तस्य कर्तव्या युष्माभिर्वै न संशयः
īśvara uvāca
gṛhītvā'tha munīnsarvānbrahmā lokapitā mahaḥ ||
ānītaḥ somarājena tadā brahmā jagatpatiḥ
||85||गृहीत्वाऽथ मुनीन्सर्वान्ब्रह्मा लोकपिता महः ॥
आनीतः सोमराजेन तदा ब्रह्मा जगत्पतिः
prābhāsike mahātīrthe sāvitryā sahitaḥ prabhuḥ ||
kārayāmāsa kuṇḍānāṃ maṇḍapānāṃ śataṃśatam
||86||प्राभासिके महातीर्थे सावित्र्या सहितः प्रभुः ॥
कारयामास कुण्डानां मण्डपानां शतंशतम्
ekaike maṇḍape tatra cakre saptadaśartvijaḥ ||
guruṇā prerito brahmā tatra devapurodhasā
||87||एकैके मण्डपे तत्र चक्रे सप्तदशर्त्विजः ॥
गुरुणा प्रेरितो ब्रह्मा तत्र देवपुरोधसा
pārśve sthitastadā brahmā vidhānairveda bhāṣitaiḥ ||
dīkṣayāmāsa somaṃ tu rohiṇyā sahitaṃ vibhum
||88||पार्श्वे स्थितस्तदा ब्रह्मा विधानैर्वेद भाषितैः ॥
दीक्षयामास सोमं तु रोहिण्या सहितं विभुम्
patnīṃ ca rohiṇīṃ kṛtvā sarvalakṣaṇasaṃyutām ||
mṛgacarmadharāṃ devīṃ kṣaumavastrāvaguṃṭhitā m
||89||पत्नीं च रोहिणीं कृत्वा सर्वलक्षणसंयुताम् ॥
मृगचर्मधरां देवीं क्षौमवस्त्रावगुंठिता म्
patnīśālāṃ samānītā ṛtvigbhirvedapāragaiḥ ||
caṃdramā dīkṣayā yukta ṛṣigaṃdharvasaṃstutaḥ
||90||पत्नीशालां समानीता ऋत्विग्भिर्वेदपारगैः ॥
चंद्रमा दीक्षया युक्त ऋषिगंधर्वसंस्तुतः
auduṃbareṇa daṃḍena saṃvṛto mṛgacarmaṇā ||
atīva tejasā yuktaḥ śuśubhe sadasi sthitaḥ
||91||औदुंबरेण दंडेन संवृतो मृगचर्मणा ॥
अतीव तेजसा युक्तः शुशुभे सदसि स्थितः
tato brahmā mahādevi sarvalokapitāmahaḥ ||
ṛtvijāṃ varaṇaṃ cakre vedoktavidhinā tadā
||92||ततो ब्रह्मा महादेवि सर्वलोकपितामहः ॥
ऋत्विजां वरणं चक्रे वेदोक्तविधिना तदा
gururhotā vṛtastatra vasiṣṭho'dhvaryureva ca ||
tatrodgātā marīcistu brahmatve nāradaḥ kṛtaḥ
||93||गुरुर्होता वृतस्तत्र वसिष्ठोऽध्वर्युरेव च ॥
तत्रोद्गाता मरीचिस्तु ब्रह्मत्वे नारदः कृतः
sanatkumārasaṃyuktāḥ sadasyāstatra vai kṛtāḥ ||
vastrairābharaṇairyuktā mukuṭairaṃgulīyakaiḥ
||94||सनत्कुमारसंयुक्ताः सदस्यास्तत्र वै कृताः ॥
वस्त्रैराभरणैर्युक्ता मुकुटैरंगुलीयकैः
bhūṣitā bhūṣaṇaughena tasminyajñe tadartvijaḥ ||
caturṣu tajjñāścatvāra evaṃ te ṣoḍaśartvijaḥ
||95||भूषिता भूषणौघेन तस्मिन्यज्ञे तदर्त्विजः ॥
चतुर्षु तज्ज्ञाश्चत्वार एवं ते षोडशर्त्विजः
prastotā kaśyapastatra pratihartā tu gālavaḥ ||
subrahmaṇyastathā gargaḥ sadasyaḥ pulahaḥ kṛtaḥ
||96||प्रस्तोता कश्यपस्तत्र प्रतिहर्ता तु गालवः ॥
सुब्रह्मण्यस्तथा गर्गः सदस्यः पुलहः कृतः
hotā śukraḥ samākhyāto neṣṭā kratha udāhṛtaḥ ||
maitrāvaruṇo durvāsā brāhmaṇācchaṃsī kauśikaḥ
||97||होता शुक्रः समाख्यातो नेष्टा क्रथ उदाहृतः ॥
मैत्रावरुणो दुर्वासा ब्राह्मणाच्छंसी कौशिकः
acchāvākaśca śākalyo grāvasthaḥ kratureva ca ||
prasthātā pratipūrvo yaḥ śālaṃkāyana eva ca
||98||अच्छावाकश्च शाकल्यो ग्रावस्थः क्रतुरेव च ॥
प्रस्थाता प्रतिपूर्वो यः शालंकायन एव च
agnīdhraśca manustatra unnetā tvaṃgirāḥ kṛtaḥ ||
evamādyānmaṇḍapeṣu kṛtvā tānṛtvijaḥ prabhuḥ
||99||अग्नीध्रश्च मनुस्तत्र उन्नेता त्वंगिराः कृतः ॥
एवमाद्यान्मण्डपेषु कृत्वा तानृत्विजः प्रभुः
anyeṣu maṇḍapeṣveva pratyekamṛtvijaḥ kṛtāḥ ||
maṇḍapānāṃ śateṣveva kṛtvā kuṇḍānyakalpayat
||100||अन्येषु मण्डपेष्वेव प्रत्येकमृत्विजः कृताः ॥
मण्डपानां शतेष्वेव कृत्वा कुण्डान्यकल्पयत्
ekaiko maṇḍapastatra viṃśahastapramāṇataḥ ||
astreṇāśodhya bhūmiṃ tu paṃcagavyena prokṣya ca
||101||एकैको मण्डपस्तत्र विंशहस्तप्रमाणतः ॥
अस्त्रेणाशोध्य भूमिं तु पंचगव्येन प्रोक्ष्य च
carmaṇā cāvaguṃṭhyaiva ālikhyāstreṇa pārvati ||
ullikhya prokṣaṇaṃ kṛtvā khātaṃ kṛtvā vidhānataḥ
||102||चर्मणा चावगुंठ्यैव आलिख्यास्त्रेण पार्वति ॥
उल्लिख्य प्रोक्षणं कृत्वा खातं कृत्वा विधानतः
aṣṭau kuṃḍāni saṃkalpya tathaikamaṇḍape priye ||
lepanaṃ maṇḍape kṛtvā vajrākaraṇameva ca
||103||अष्टौ कुंडानि संकल्प्य तथैकमण्डपे प्रिये ॥
लेपनं मण्डपे कृत्वा वज्राकरणमेव च
caturasrakārmukaṃ ca vartulaṃ kamalākṛti ||
pūrvāṃ diśaṃ samā rabhya kṛtvā tāni prayatnataḥ
||104||चतुरस्रकार्मुकं च वर्तुलं कमलाकृति ॥
पूर्वां दिशं समा रभ्य कृत्वा तानि प्रयत्नतः
catuḥkoṇasamāyuktaṃ pūrve kuṇḍaṃ niveśya tu ||
bhagākṛti tathā''gneyyāṃ dakṣiṇe dhanurākṛti
||105||चतुःकोणसमायुक्तं पूर्वे कुण्डं निवेश्य तु ॥
भगाकृति तथाऽऽग्नेय्यां दक्षिणे धनुराकृति
nairṛtye tu trikoṇaṃ vai vartulaṃ paścimena tu ||
ṣaṭkoṇaṃ caiva vāyavye padmākāraṃ tathottare
||106||नैर्ऋत्ये तु त्रिकोणं वै वर्तुलं पश्चिमेन तु ॥
षट्कोणं चैव वायव्ये पद्माकारं तथोत्तरे
aiśānyāmaṣṭakoṇaṃ tu madhye caikaṃ vidhā nataḥ ||
pratyekaṃ maṇḍapaṃ śubhraṃ stambhaiḥ ṣoḍaśabhiryutam
||107||ऐशान्यामष्टकोणं तु मध्ये चैकं विधा नतः ॥
प्रत्येकं मण्डपं शुभ्रं स्तम्भैः षोडशभिर्युतम्
dhvajaiḥ satoraṇairyuktaṃ cakre brahmā vidhānataḥ ||
nyagrodhaṃ pūrvato nyasya dakṣe coduṃbaraṃ tathā
||108||ध्वजैः सतोरणैर्युक्तं चक्रे ब्रह्मा विधानतः ॥
न्यग्रोधं पूर्वतो न्यस्य दक्षे चोदुंबरं तथा
aśvatthaṃ paścime caiva palāśaṃ cottare kramāt ||
bāhudaṃḍapramāṇena dhvajāṃstatra niveśya vai
||109||अश्वत्थं पश्चिमे चैव पलाशं चोत्तरे क्रमात् ॥
बाहुदंडप्रमाणेन ध्वजांस्तत्र निवेश्य वै
aindryādau pītavarṇādi patākā parikalpitāḥ ||
tato brahmā hyagnikuṃḍe cāgnisthāpanamārabhat
||110||ऐन्द्र्यादौ पीतवर्णादि पताका परिकल्पिताः ॥
ततो ब्रह्मा ह्यग्निकुंडे चाग्निस्थापनमारभत्
svasthāne brāhmaṇāṃścaiva jāpye caiva nyayojayat ||
śrīsūktaṃ pāvamānaṃ ca sadā caiva ca vājinam
||111||स्वस्थाने ब्राह्मणांश्चैव जाप्ये चैव न्ययोजयत् ॥
श्रीसूक्तं पावमानं च सदा चैव च वाजिनम्
vṛṣākapiṃ tathaindraṃ ca bahvṛcaḥ pūrvato'japan ||
rudrānpuruṣasūktaṃ ca krokādhyāyaṃ(?) ca vaikriyam
||112||वृषाकपिं तथैन्द्रं च बह्वृचः पूर्वतोऽजपन् ॥
रुद्रान्पुरुषसूक्तं च क्रोकाध्यायं(?) च वैक्रियम्
brāhmaṇaṃ paitryamaiṃdraṃ ca japeranyajuṣo yame(?) ||
devavrataṃ vāmadevyaṃ jyeṣṭhaṃ sāma rathaṃtaram
||113||ब्राह्मणं पैत्र्यमैंद्रं च जपेरन्यजुषो यमे(?) ॥
देवव्रतं वामदेव्यं ज्येष्ठं साम रथंतरम्
bheruṃḍāni ca sāmāni cchaṃdogaḥ paścime'japat ||
atharvātharvaśirasaṃ skambhastaṃbhamatharvaṇam
||114||भेरुंडानि च सामानि च्छंदोगः पश्चिमेऽजपत् ॥
अथर्वाथर्वशिरसं स्कम्भस्तंभमथर्वणम्
nīlarudramatharvāṇamatharvā cottare'japat ||
garbhādhānādikaṃ sarvaṃ tato'gnerakarodvibhuḥ
||115||नीलरुद्रमथर्वाणमथर्वा चोत्तरेऽजपत् ॥
गर्भाधानादिकं सर्वं ततोऽग्नेरकरोद्विभुः
pūrṇāhutiṃ tato dattvā snānakarma tathā'rabhat ||
paṃcapallavasaṃyuktaṃ mṛttikābhiḥ samanvitam
||116||पूर्णाहुतिं ततो दत्त्वा स्नानकर्म तथाऽरभत् ॥
पंचपल्लवसंयुक्तं मृत्तिकाभिः समन्वितम्
kaṣāyaiḥ paṃcagavyaiśca paṃcāmṛtaphalaistathā ||
tīrthodakaiḥ sametaṃ tu maṃtraiḥ snānamathārabhat
||117||कषायैः पंचगव्यैश्च पंचामृतफलैस्तथा ॥
तीर्थोदकैः समेतं तु मंत्रैः स्नानमथारभत्
netrāṇyutpādya devasya kṛtvā ca tilakakriyām ||
pṛthivyāṃ yāni tīrthāni pātāle ca viśeṣataḥ
||118||नेत्राण्युत्पाद्य देवस्य कृत्वा च तिलकक्रियाम् ॥
पृथिव्यां यानि तीर्थानि पाताले च विशेषतः
svarga loke ca yānyeva tatra tānyāyayustadā ||
etasminnantare brahmā devānāṃ paśyatāṃ tadā
||119||स्वर्ग लोके च यान्येव तत्र तान्याययुस्तदा ॥
एतस्मिन्नन्तरे ब्रह्मा देवानां पश्यतां तदा
bhūmiṃ bhittvā viveśātha tatra liṃgamapaśyata ||
sparśākhyaṃ taṃ tu saṃchādya madhunā darbhamūlakaiḥ
||120||भूमिं भित्त्वा विवेशाथ तत्र लिंगमपश्यत ॥
स्पर्शाख्यं तं तु संछाद्य मधुना दर्भमूलकैः
tatra brahmaśilāṃ nyasya tasyā ūrdhvaṃ mahāprabham ||
liṃgaṃ pratiṣṭhayāmāsa kṛtvā niścalamā tmavān
||121||तत्र ब्रह्मशिलां न्यस्य तस्या ऊर्ध्वं महाप्रभम् ॥
लिंगं प्रतिष्ठयामास कृत्वा निश्चलमा त्मवान्
sthitvā ca parame tattve maṃtranyāsamathākarot ||
evaṃ liṃgaṃ pratiṣṭhāpya tatra brahmā jagadguruḥ ||
pūjayāmāsa vidhinā vedoktairmaṃtra vistaraiḥ
||122||स्थित्वा च परमे तत्त्वे मंत्रन्यासमथाकरोत् ॥
एवं लिंगं प्रतिष्ठाप्य तत्र ब्रह्मा जगद्गुरुः ॥
पूजयामास विधिना वेदोक्तैर्मंत्र विस्तरैः
mantranyāse kṛte tatra brahmaṇā lokakartṝṇā ||
tatra vipragaṇo hṛṣṭo jayaśabdādimaṃgalaiḥ ||
nirdhūmaścābhavadvahniḥ sūryakoṭisamaprabhaḥ
||123||मन्त्रन्यासे कृते तत्र ब्रह्मणा लोककर्तॄणा ॥
तत्र विप्रगणो हृष्टो जयशब्दादिमंगलैः ॥
निर्धूमश्चाभवद्वह्निः सूर्यकोटिसमप्रभः
devadundubhayo neduḥ prasannāśca digīśvarāḥ ||
puṣpavṛṣṭiḥ papātoccaistasminyajñamahotsave
||124||देवदुन्दुभयो नेदुः प्रसन्नाश्च दिगीश्वराः ॥
पुष्पवृष्टिः पपातोच्चैस्तस्मिन्यज्ञमहोत्सवे
pratiṣṭhāpya tato liṃgaṃ śrīsomeśaṃ pitāmahaḥ ||
dāpayāmāsa viprebhyo bhūriśo yajñadakṣiṇām
||125||प्रतिष्ठाप्य ततो लिंगं श्रीसोमेशं पितामहः ॥
दापयामास विप्रेभ्यो भूरिशो यज्ञदक्षिणाम्
sanatkumārapramukhairādyairbrahmarṣibhirvṛtaḥ ||
dakṣiṇāmadadātsomastrīm̐llokānbrahmaṇe purā
||126||सनत्कुमारप्रमुखैराद्यैर्ब्रह्मर्षिभिर्वृतः ॥
दक्षिणामददात्सोमस्त्रीँल्लोकान्ब्रह्मणे पुरा
tebhyo brahmarṣimukhyebhyaḥ sadasyebhyastathaiva ca ||
dadau hiraṇyaṃ ratnāni koṭiśo bhūridakṣiṇāḥ
||127||तेभ्यो ब्रह्मर्षिमुख्येभ्यः सदस्येभ्यस्तथैव च ॥
ददौ हिरण्यं रत्नानि कोटिशो भूरिदक्षिणाः
sobhiṣikto mahātejāḥ sarvairbrahmarṣibhistataḥ ||
trīm̐llokānbhāvayāmāsa svabhāsā bhāsatāṃ varaḥ
||128||सोभिषिक्तो महातेजाः सर्वैर्ब्रह्मर्षिभिस्ततः ॥
त्रीँल्लोकान्भावयामास स्वभासा भासतां वरः
taṃ sinī ca kuhūścaiva dyutiḥ puṣṭiḥ prabhā vasuḥ ||
kīrttirdhṛtiśca lakṣmīśca nava devyaḥ siṣevire
||129||तं सिनी च कुहूश्चैव द्युतिः पुष्टिः प्रभा वसुः ॥
कीर्त्तिर्धृतिश्च लक्ष्मीश्च नव देव्यः सिषेविरे
prāpyāvabhṛthamavyagraḥ kṛtvā māheśvaraṃ makham ||
kṛtārthaḥ paripūrṇaśca saṃbabhūva niśāpatiḥ
||130||प्राप्यावभृथमव्यग्रः कृत्वा माहेश्वरं मखम् ॥
कृतार्थः परिपूर्णश्च संबभूव निशापतिः
tatastasmai dadau rājyaṃ prājyaṃ brahmā pitāmahaḥ ||
bījauṣadhīnāṃ viprāṇāmavannānāṃ ca varānane
||131||ततस्तस्मै ददौ राज्यं प्राज्यं ब्रह्मा पितामहः ॥
बीजौषधीनां विप्राणामवन्नानां च वरानने
tasminyajñe samājagmurye kecitpṛthivīśvarāḥ ||
teṣāṃ rājyaṃ dhanaṃ bhogāndadau svargaṃ tathā'kṣayam
||132||तस्मिन्यज्ञे समाजग्मुर्ये केचित्पृथिवीश्वराः ॥
तेषां राज्यं धनं भोगान्ददौ स्वर्गं तथाऽक्षयम्
brāhmaṇānbhojayāmāsa svayamevauṣadhīpatiḥ ||
dadau sarvaṃ tadā teṣāṃ prabhāsakṣetravāsinām
||133||ब्राह्मणान्भोजयामास स्वयमेवौषधीपतिः ॥
ददौ सर्वं तदा तेषां प्रभासक्षेत्रवासिनाम्
hiraṇyādīnyadāccaiva mahādānāni ṣoḍaśa ||
yo yadarthayate tatra sāmānyaḥ prākṛto janaḥ ||
nijakarmānusāreṇa sa lebhe ca tadeva hi
||134||हिरण्यादीन्यदाच्चैव महादानानि षोडश ॥
यो यदर्थयते तत्र सामान्यः प्राकृतो जनः ॥
निजकर्मानुसारेण स लेभे च तदेव हि
evaṃ samarthite yajñe sarve devāḥ savāsavāḥ ||
sthāpayitvā tu liṃgāni jagmuḥ sarve yathāgatam
||136||एवं समर्थिते यज्ञे सर्वे देवाः सवासवाः ॥
स्थापयित्वा तु लिंगानि जग्मुः सर्वे यथागतम्
candramāstu punardevi brahmaṇā sahito vibhuḥ ||
liṃgamārādhayāmāsa prabhāse pāpanāśane
||136||चन्द्रमास्तु पुनर्देवि ब्रह्मणा सहितो विभुः ॥
लिंगमाराधयामास प्रभासे पापनाशने
trikālaṃ pūjayāmāsa dhūpamālyānulepanaiḥ ||
taṃ praṇamya ca deveśi stauti nityaṃ niśāpatiḥ
||137||त्रिकालं पूजयामास धूपमाल्यानुलेपनैः ॥
तं प्रणम्य च देवेशि स्तौति नित्यं निशापतिः
iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye someśvarapratiṣṭhāmāhātmyavarṇanaṃ nāma trayoviṃśo'dhyāyaḥ || 23 ||