tasyaiva pūrvadigbhāge sarasvatyā pratiṣṭhitam
īśvara uvāca
tasyaiva pūrvadigbhāge sarasvatyā pratiṣṭhitam ||
liṃgaṃ mahāprabhāvaṃ tu someśādagnigocare
||1||तस्यैव पूर्वदिग्भागे सरस्वत्या प्रतिष्ठितम् ॥
लिंगं महाप्रभावं तु सोमेशादग्निगोचरे
bhairaveśvararūpastu vāḍavaḥ kumbhasaṃsthitaḥ ||
yatra devyā samānītaḥ sāgarasya samīpataḥ
||2||भैरवेश्वररूपस्तु वाडवः कुम्भसंस्थितः ॥
यत्र देव्या समानीतः सागरस्य समीपतः
viśrāmārthaṃ kṣaṇaṃ muktvā devyā liṃgaṃ pratiṣṭhitam ||
samabhyarcya vidhānena gṛhītvā vaḍavānalam ||
samudramadhye cikṣepa devānāṃ hitakāmyayā
||3||विश्रामार्थं क्षणं मुक्त्वा देव्या लिंगं प्रतिष्ठितम् ॥
समभ्यर्च्य विधानेन गृहीत्वा वडवानलम् ॥
समुद्रमध्ये चिक्षेप देवानां हितकाम्यया
tato hṛṣṭatarā devāḥ śaṃkhadundubhiniḥsvanaiḥ ||
pūrayantoṃ'baraṃ devīmīḍire puṣpavṛṣṭibhiḥ
||4||ततो हृष्टतरा देवाः शंखदुन्दुभिनिःस्वनैः ॥
पूरयन्तोंऽबरं देवीमीडिरे पुष्पवृष्टिभिः
devamāteti te nāma kṛtvocustāṃ tadā surāḥ ||
kṛtvā tu bhairavaṃ kāryamasādhyaṃ devadānavaiḥ
||5||देवमातेति ते नाम कृत्वोचुस्तां तदा सुराः ॥
कृत्वा तु भैरवं कार्यमसाध्यं देवदानवैः
pratiṣṭhitavatī cātra yasmālliṃgaṃ mahodayam ||
tvaṃ sarvasaritāṃ śreṣṭhā sarvapātakanāśinī ||
tasmādbhairavanāmeti liṃgaṃ khyātiṃ gamiṣyati
||6||प्रतिष्ठितवती चात्र यस्माल्लिंगं महोदयम् ॥
त्वं सर्वसरितां श्रेष्ठा सर्वपातकनाशिनी ॥
तस्माद्भैरवनामेति लिंगं ख्यातिं गमिष्यति
ityuktā tu tadā devī bhairaveśvaranairṛte ||
sāgarasya sthitā ramye tatra mūrttimatī satī
||7||इत्युक्ता तु तदा देवी भैरवेश्वरनैर्ऋते ॥
सागरस्य स्थिता रम्ये तत्र मूर्त्तिमती सती
pūjayettāṃ vidhānena taṃ tathā bhairaveśvaram ||
mahānavamyāṃ yatnena kṛtvā snānaṃ vidhānataḥ ||
sarasvatīṃ pūjayitvā vāgdoṣānmucyate'khilāt
||8||पूजयेत्तां विधानेन तं तथा भैरवेश्वरम् ॥
महानवम्यां यत्नेन कृत्वा स्नानं विधानतः ॥
सरस्वतीं पूजयित्वा वाग्दोषान्मुच्यतेऽखिलात्
tasyā liṃgaṃ tu saṃpūjya saṃsnāpya payasā pṛthak ||
aghoreṇaiva vidhivatsamyagyātrāphalaṃ labhet
||9||तस्या लिंगं तु संपूज्य संस्नाप्य पयसा पृथक् ॥
अघोरेणैव विधिवत्सम्यग्यात्राफलं लभेत्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye bhairaveśvaramāhātmyavarṇanaṃnāmaikacatvāriṃśo'dhyāyaḥ || 41 ||