punaḥ kathaya deveśa māhātmyaṃ lokaśaṃkara
devyuvāca
punaḥ kathaya deveśa māhātmyaṃ lokaśaṃkara ||
śrīsomeśvaradevasya sarvapātakanāśanam ||
brahmaviṣṇvīśadaivatyaṃ tathātra tritayaṃ vada
||1||पुनः कथय देवेश माहात्म्यं लोकशंकर ॥
श्रीसोमेश्वरदेवस्य सर्वपातकनाशनम् ॥
ब्रह्मविष्ण्वीशदैवत्यं तथात्र त्रितयं वद
īśvara uvāca
śṛṇuṣvaikamanā bhūtvā mama gopyaṃ purātanam ||
tasmim̐lliṃge ca yadvṛttamāścaryaṃ paramaṃ mahat
||2||शृणुष्वैकमना भूत्वा मम गोप्यं पुरातनम् ॥
तस्मिँल्लिंगे च यद्वृत्तमाश्चर्यं परमं महत्
ṣaṣṭikoṭi sahasrāṇi ṛṣīṇāmūrddhvaretasām ||
tasmim̐lliṃge praviṣṭāni te ghṛtāhutirivānale
||3||षष्टिकोटि सहस्राणि ऋषीणामूर्द्ध्वरेतसाम् ॥
तस्मिँल्लिंगे प्रविष्टानि ते घृताहुतिरिवानले
siddhirvṛddhistathā tuṣṭirṛddhiḥ puṣṭistu paṃcamī ||
kīrtiḥ śāṃtistathā lakṣmīstasmiṃlliṃge samutthitā
||4||सिद्धिर्वृद्धिस्तथा तुष्टिर्ऋद्धिः पुष्टिस्तु पंचमी ॥
कीर्तिः शांतिस्तथा लक्ष्मीस्तस्मिंल्लिंगे समुत्थिता
saptakoṭyastu maṃtrāṇāṃ siddhīnāṃ caiva saṃbhavaḥ ||
divyayogarasāścānye divyauṣadhirasāyanāḥ
||5||सप्तकोट्यस्तु मंत्राणां सिद्धीनां चैव संभवः ॥
दिव्ययोगरसाश्चान्ये दिव्यौषधिरसायनाः
gāruḍaṃ bhūtataṃtraṃ ca khecaryo vyaṃtarīstathā ||
te sarve saha yogena tasmālliṃgātsamutthitāḥ
||6||गारुडं भूततंत्रं च खेचर्यो व्यंतरीस्तथा ॥
ते सर्वे सह योगेन तस्माल्लिंगात्समुत्थिताः
anyāścaiva tu yāḥ kāścitsiddhayo'ṣṭau prakīrtitāḥ ||
tāḥ sarvāḥ saha liṃgena tasmātsthānātsamutthitāḥ
||7||अन्याश्चैव तु याः काश्चित्सिद्धयोऽष्टौ प्रकीर्तिताः ॥
ताः सर्वाः सह लिंगेन तस्मात्स्थानात्समुत्थिताः
anyaddevi pravakṣyāmi atra siddhiṃ gatāstu ye ||
mamāṃśasaṃbhavāḥ prāptā asmim̐lliṃge layaṃ gatāḥ
||9||अन्यद्देवि प्रवक्ष्यामि अत्र सिद्धिं गतास्तु ये ॥
ममांशसंभवाः प्राप्ता अस्मिँल्लिंगे लयं गताः
teṣāṃ ca vikramānsarvānpravakṣyāmyanupūrvaśaḥ ||
purākramā grahā muṇḍā guḍakāśca sahetukāḥ
||9||तेषां च विक्रमान्सर्वान्प्रवक्ष्याम्यनुपूर्वशः ॥
पुराक्रमा ग्रहा मुण्डा गुडकाश्च सहेतुकाः
vimalā daṃḍikāścaiva saptaite kutsikāḥ smṛtāḥ ||
asmiṃlliṃge purā siddhā yogātpāśupatānmama
||10||विमला दंडिकाश्चैव सप्तैते कुत्सिकाः स्मृताः ॥
अस्मिंल्लिंगे पुरा सिद्धा योगात्पाशुपतान्मम
rudro viprastathā dānaścaṃdro mantho'valokakaḥ ||
sūryāvalokaśceti gārgeyāḥ sapta kīrttitāḥ
||11||रुद्रो विप्रस्तथा दानश्चंद्रो मन्थोऽवलोककः ॥
सूर्यावलोकश्चेति गार्गेयाः सप्त कीर्त्तिताः
someśvare ca te siddhāḥ prabhāse varavarṇini ||
mūkamanyaḥ śivaścaiva prakāśaḥ kapilastathā
||12||सोमेश्वरे च ते सिद्धाः प्रभासे वरवर्णिनि ॥
मूकमन्यः शिवश्चैव प्रकाशः कपिलस्तथा
satkulaḥ karṇikāraśca pauruṣeyāḥ prakīrttitāḥ ||
someśvare purā siddhāḥ prabhāse pāpanāśane
||13||सत्कुलः कर्णिकारश्च पौरुषेयाः प्रकीर्त्तिताः ॥
सोमेश्वरे पुरा सिद्धाः प्रभासे पापनाशने
yugeyuge purā siddhāstasmim̐lliṃge priye mama ||
ete cānye ca ye viprā bhaviṣyaṃti kalau yuge
||14||युगेयुगे पुरा सिद्धास्तस्मिँल्लिंगे प्रिये मम ॥
एते चान्ये च ये विप्रा भविष्यंति कलौ युगे
tatra siddhiṃ gamiṣyaṃti durllabhāṃ tridaśairapi ||
etatte sarvamākhyātaṃ talliṃgaṃ siddhidaṃ param
||19||तत्र सिद्धिं गमिष्यंति दुर्ल्लभां त्रिदशैरपि ॥
एतत्ते सर्वमाख्यातं तल्लिंगं सिद्धिदं परम्
durllabhaṃ sarvamarttyānāṃ prabhāse tu vyavasthitam ||
na ca kaścidvijānāti aśubhaiḥ karmabhirvṛtaḥ
||16||दुर्ल्लभं सर्वमर्त्त्यानां प्रभासे तु व्यवस्थितम् ॥
न च कश्चिद्विजानाति अशुभैः कर्मभिर्वृतः
grahadoṣāstu ye kecidbhūtadoṣāstathā pare ||
ḍākinīpretavetālā rākṣasā grahapūtanāḥ
||17||ग्रहदोषास्तु ये केचिद्भूतदोषास्तथा परे ॥
डाकिनीप्रेतवेताला राक्षसा ग्रहपूतनाः
piśācā yātudhānāśca mātaro jātahārikāḥ ||
bālagrahāstathā cānye buddhāścaiva tu ye grahāḥ
||18||पिशाचा यातुधानाश्च मातरो जातहारिकाः ॥
बालग्रहास्तथा चान्ये बुद्धाश्चैव तु ये ग्रहाः
jvarabhūta grahāścānye hyatisārabhagaṃdarāḥ ||
aśmarī mūtrakṛcchraṃ ca rogāścānye sahasraśaḥ
||19||ज्वरभूत ग्रहाश्चान्ये ह्यतिसारभगंदराः ॥
अश्मरी मूत्रकृच्छ्रं च रोगाश्चान्ये सहस्रशः
durnāmakāstathā cānye kuṣṭharogāstathā pare ||
kṣayarogāstathā cānye vātagulmāstathaiva ca ||
anye caiva tu ye kecidvyādhayastu prakīrttitāḥ
||20||दुर्नामकास्तथा चान्ये कुष्ठरोगास्तथा परे ॥
क्षयरोगास्तथा चान्ये वातगुल्मास्तथैव च ॥
अन्ये चैव तु ये केचिद्व्याधयस्तु प्रकीर्त्तिताः
someśvaraṃ samāsādya tasya liṃgasya darśanāt ||
sarva eva vinaśyaṃti vahnau kṣiptamivendhanam
||21||सोमेश्वरं समासाद्य तस्य लिंगस्य दर्शनात् ॥
सर्व एव विनश्यंति वह्नौ क्षिप्तमिवेन्धनम्
upasargāśca () cānye sarpaghoṇapavṛścikāḥ ||
sarve tatra vinaśyaṃti śrīsomeśvaradarśanāt
||22||उपसर्गाश्च () चान्ये सर्पघोणपवृश्चिकाः ॥
सर्वे तत्र विनश्यंति श्रीसोमेश्वरदर्शनात्
yo'sau someśvaro nāmnā paścimo bhairavaḥ smṛtaḥ ||
kālāgnirudranātheti paryāyairnāmabhiḥ śrutaḥ
||23||योऽसौ सोमेश्वरो नाम्ना पश्चिमो भैरवः स्मृतः ॥
कालाग्निरुद्रनाथेति पर्यायैर्नामभिः श्रुतः
tasmiṃstiṣṭhāmi deveśi bhaktānugrahakārakaḥ ||
sarvaṃ ca duṣkṛtaṃ nṛṇāṃ bhakṣayāmi na saṃśayaḥ
||24||तस्मिंस्तिष्ठामि देवेशि भक्तानुग्रहकारकः ॥
सर्वं च दुष्कृतं नृणां भक्षयामि न संशयः
yo'sau prāṇaḥ śarīrastho dehināṃ dehasaṃcaraḥ ||
brahmāṃḍametadyasyāṃtareko yaścāpyanekadhā
||25||योऽसौ प्राणः शरीरस्थो देहिनां देहसंचरः ॥
ब्रह्मांडमेतद्यस्यांतरेको यश्चाप्यनेकधा
vedāḥ sarve'pi yaṃ devaṃ praśaṃsaṃti maharṣayaḥ ||
parasya brahmaṇo rūpaṃ yasya dvāreṇa labhyate
||26||वेदाः सर्वेऽपि यं देवं प्रशंसंति महर्षयः ॥
परस्य ब्रह्मणो रूपं यस्य द्वारेण लभ्यते
so'yaṃ devi mahādevaḥ prabhāse saṃvyavasthitaḥ ||
yathā guptaṃ gṛhe ratnaṃ na kaścidviṃdate naraḥ
||27||सोऽयं देवि महादेवः प्रभासे संव्यवस्थितः ॥
यथा गुप्तं गृहे रत्नं न कश्चिद्विंदते नरः
prabhāse tu sthitaṃ tadvadratnabhūtaṃ gṛhe mama ||
tacca liṃgaṃ purā kalpe saptapātālabhedakam
||28||प्रभासे तु स्थितं तद्वद्रत्नभूतं गृहे मम ॥
तच्च लिंगं पुरा कल्पे सप्तपातालभेदकम्
kathitaṃ koṭi sūryasya pralayānalasaṃnibham ||
tenakālāgnirudreti proktaṃ someśvaraḥ purā
||29||कथितं कोटि सूर्यस्य प्रलयानलसंनिभम् ॥
तेनकालाग्निरुद्रेति प्रोक्तं सोमेश्वरः पुरा
iti devi samāsena kathitaṃ tava pārvati ||
someśvarasya māhātmyaṃ sarvapātakanāśanam
||30||इति देवि समासेन कथितं तव पार्वति ॥
सोमेश्वरस्य माहात्म्यं सर्वपातकनाशनम्
iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsamāhātmye śrīsomeśvaraiśvaryavarṇanaṃ nāmāṣṭamo'dhyāyaḥ || 8 ||