varuṇeśvaramāhātmyavarṇanam
īśvara uvāca
tato gacchenmahādevi varuṇeśvaramuttamam ||
gaurītapovanāgneyyāṃ dhanuṣāṃ viṃśatau sthitam ||
liṃgaṃ mahāprabhāvaṃ hi varuṇena pratiṣṭhitam
||1||ततो गच्छेन्महादेवि वरुणेश्वरमुत्तमम् ॥
गौरीतपोवनाग्नेय्यां धनुषां विंशतौ स्थितम् ॥
लिंगं महाप्रभावं हि वरुणेन प्रतिष्ठितम्
pūrvaṃ pīto yadā devi samudraḥ kumbhajanmanā ||
tadā kopena santapto varuṇaḥ saritāṃ patiḥ
||2||पूर्वं पीतो यदा देवि समुद्रः कुम्भजन्मना ॥
तदा कोपेन सन्तप्तो वरुणः सरितां पतिः
kāmikaṃ tu samājñāya kṣetraṃ prābhāsikaṃ tadā ||
tatrātapaddevi tapaḥ sa vai paramaduścaram
||3||कामिकं तु समाज्ञाय क्षेत्रं प्राभासिकं तदा ॥
तत्रातपद्देवि तपः स वै परमदुश्चरम्
pratiṣṭhāpya mahāliṃgaṃ saṃpūjayati bhaktitaḥ ||
varṣāṇāmayutaṃ sāgraṃ pūjito vṛṣabhadhvajaḥ
||4||प्रतिष्ठाप्य महालिंगं संपूजयति भक्तितः ॥
वर्षाणामयुतं साग्रं पूजितो वृषभध्वजः
tataḥ prasanno deveśi nijagaṃgājalena tu ||
pūrayāmāsa taṃ riktaṃ samudraṃ yādasāṃpatim
||5||ततः प्रसन्नो देवेशि निजगंगाजलेन तु ॥
पूरयामास तं रिक्तं समुद्रं यादसांपतिम्
chaṃdayāmāsa taṃ liṃgaṃ varadānairanekadhā ||
tatprabhṛtyeva te sarve samudrāḥ paripūritāḥ
||6||छंदयामास तं लिंगं वरदानैरनेकधा ॥
तत्प्रभृत्येव ते सर्वे समुद्राः परिपूरिताः
varuṇeśvaranāmeti talliṃgaṃ tatprabhṛtyabhūt
||7||वरुणेश्वरनामेति तल्लिंगं तत्प्रभृत्यभूत्
ko hyartho bahubhirliṃgairdṛṣṭairvā surasundari ||
varuṇeśena dṛṣṭena sarvatīrthaphalaṃ labhet
||8||को ह्यर्थो बहुभिर्लिंगैर्दृष्टैर्वा सुरसुन्दरि ॥
वरुणेशेन दृष्टेन सर्वतीर्थफलं लभेत्
aṣṭamyāṃ ca caturdaśyāṃ taddadhnā snāpayedyadi ||
sa brāhmaṇaścaturvedo jāyate nātra saṃśayaḥ
||9||अष्टम्यां च चतुर्दश्यां तद्दध्ना स्नापयेद्यदि ॥
स ब्राह्मणश्चतुर्वेदो जायते नात्र संशयः
brāhmaṇāḥ kṣatriyā vaiśyāḥ śūdrāścānye varānane ||
mūkāṃdhabadhirā bālāḥ striyaścaiva napuṃsakāḥ
||10||ब्राह्मणाः क्षत्रिया वैश्याः शूद्राश्चान्ये वरानने ॥
मूकांधबधिरा बालाः स्त्रियश्चैव नपुंसकाः
dṛṣṭvā gacchaṃti te devi svargaṃ dharmaparāyaṇāḥ ||
snānaṃ jāpyaṃ baliṃ homaṃ pūjāṃ stotraṃ ca nartanam ||
tasminsthāne tu yaḥ kuryāttatsarvaṃ cākṣayaṃ bhavet
||11||दृष्ट्वा गच्छंति ते देवि स्वर्गं धर्मपरायणाः ॥
स्नानं जाप्यं बलिं होमं पूजां स्तोत्रं च नर्तनम् ॥
तस्मिन्स्थाने तु यः कुर्यात्तत्सर्वं चाक्षयं भवेत्
haimaṃ padmaṃ mauktikaṃ ca dānaṃ tatraiva dāpayet ||
samyagyātrāphalāpekṣī svargāpekṣī tathā naraḥ
||12||हैमं पद्मं मौक्तिकं च दानं तत्रैव दापयेत् ॥
सम्यग्यात्राफलापेक्षी स्वर्गापेक्षी तथा नरः
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye varuṇeśvaramāhātmyavarṇanaṃnāma saptatitamo'dhyāyaḥ || 70 ||