tato gacchenmahādevi tryaṃbakeśvaramavyayam
īśvara uvāca
tato gacchenmahādevi tryaṃbakeśvaramavyayam ||
tatpaṃcamaṃ samākhyātaṃ rudrāṇāmādidaivatam
||1||ततो गच्छेन्महादेवि त्र्यंबकेश्वरमव्ययम् ॥
तत्पंचमं समाख्यातं रुद्राणामादिदैवतम्
śikhaṃḍīśvaramākhyātaṃ pūrvaṃ tretāyuge priye ||
taccādyāhaṃ pravakṣyāmi yathā saṃjñāyate naraiḥ
||2||शिखंडीश्वरमाख्यातं पूर्वं त्रेतायुगे प्रिये ॥
तच्चाद्याहं प्रवक्ष्यामि यथा संज्ञायते नरैः
asti sāṃbapuraṃ devi tatrasthaṃ parameśvari ||
tasyaivottaradigbhāge sthānaṃ kāpālikaṃ smṛtam
||3||अस्ति सांबपुरं देवि तत्रस्थं परमेश्वरि ॥
तस्यैवोत्तरदिग्भागे स्थानं कापालिकं स्मृतम्
kapāleśvaranāmā ca yatreśo liṃgamūrtimān ||
saṃsthitaḥ pāpanāśāya darśanātsparśanānnṛṇām
||4||कपालेश्वरनामा च यत्रेशो लिंगमूर्तिमान् ॥
संस्थितः पापनाशाय दर्शनात्स्पर्शनान्नृणाम्
tasmādīśānadigbhāge dhanuṣāṃ ṣoḍaśāṃtare ||
tryaṃbakeśvaranāmā ca tatra rudraḥ sthitaḥ svayam
||5||तस्मादीशानदिग्भागे धनुषां षोडशांतरे ॥
त्र्यंबकेश्वरनामा च तत्र रुद्रः स्थितः स्वयम्
sarvānugrahakarttā ca sarvakāmaphalapradaḥ ||
purā yatrātapaddevi tapo ghoraṃ suduṣkaram ||
gururnāmā ṛṣivaro devadānavaduḥsaham
||6||सर्वानुग्रहकर्त्ता च सर्वकामफलप्रदः ॥
पुरा यत्रातपद्देवि तपो घोरं सुदुष्करम् ॥
गुरुर्नामा ऋषिवरो देवदानवदुःसहम्
koṭīnāṃ tritayaṃ yena tryaṃbako maṃtranāyakaḥ ||
japto divyena vidhinā trikālaṃ pūjya śaṃkaram
||7||कोटीनां त्रितयं येन त्र्यंबको मंत्रनायकः ॥
जप्तो दिव्येन विधिना त्रिकालं पूज्य शंकरम्
tataḥ prasādya deveśaṃ divyaiśvaryamavāpa saḥ ||
cakre nāma svayaṃ tasya tryaṃbakeśvaramavyayam
||8||ततः प्रसाद्य देवेशं दिव्यैश्वर्यमवाप सः ॥
चक्रे नाम स्वयं तस्य त्र्यंबकेश्वरमव्ययम्
japtvā tu tryaṃbakaṃ maṃtraṃ yataḥ siddhimavāpa saḥ ||
divyāṣṭaguṇamaiśvaryaṃ tenāsau tryaṃbakeśvaraḥ
||9||जप्त्वा तु त्र्यंबकं मंत्रं यतः सिद्धिमवाप सः ॥
दिव्याष्टगुणमैश्वर्यं तेनासौ त्र्यंबकेश्वरः
sarvapātaka vidhvaṃsī darśanātsparśanādapi ||
yastryaṃbakaṃ japedviprastryaṃbakeśvarasaṃnidhau ||
sa prāpnoti mahāsiddhiṃ pratyakṣaṃ rudra eva saḥ
||10||सर्वपातक विध्वंसी दर्शनात्स्पर्शनादपि ॥
यस्त्र्यंबकं जपेद्विप्रस्त्र्यंबकेश्वरसंनिधौ ॥
स प्राप्नोति महासिद्धिं प्रत्यक्षं रुद्र एव सः
darśanādapi tasyātha pāpaṃ yāti sahasradhā ||
yastaṃ pūjayate bhaktyā vidhinā bhāvamāsthitaḥ ||
vāmadevena maṃtreṇa sa muktaḥ pātakairbhavet
||11||दर्शनादपि तस्याथ पापं याति सहस्रधा ॥
यस्तं पूजयते भक्त्या विधिना भावमास्थितः ॥
वामदेवेन मंत्रेण स मुक्तः पातकैर्भवेत्
caitraśuklacaturdaśyāṃ tatra yo jāgṛyānniśi ||
pūjāstutikathābhiśca sa prāpnotīpsitaṃ phalam
||12||चैत्रशुक्लचतुर्दश्यां तत्र यो जागृयान्निशि ॥
पूजास्तुतिकथाभिश्च स प्राप्नोतीप्सितं फलम्
dhenustatraiva dātavyā samyagyātrāphalepsubhiḥ
||13||धेनुस्तत्रैव दातव्या सम्यग्यात्राफलेप्सुभिः
iti te kathitaṃ devi māhātmyaṃ pāpanāśanam ||
tryaṃbakeśvararudrasya nṛṇāṃ puṇyaphalapradam
||14||इति ते कथितं देवि माहात्म्यं पापनाशनम् ॥
त्र्यंबकेश्वररुद्रस्य नृणां पुण्यफलप्रदम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmya ekādaśarudramāhātmye tryaṃbakeśvaramāhātmyavarṇanaṃnāmaikonavatitamo'dhyāyaḥ || 91 ||