saṃgāleśvaramāhātmyavarṇanam
īśvara uvāca
tasyaivottaradigbhāge kiñcidvāyavyasaṃsthitam ||
saṃgāleśvaranāmāsti sarvapātakanāśanam
||1||तस्यैवोत्तरदिग्भागे किञ्चिद्वायव्यसंस्थितम् ॥
संगालेश्वरनामास्ति सर्वपातकनाशनम्
tatra brahmā ca viṣṇuśca liṃgasyārādhanodyatau ||
śakraścaiva mahātejā liṃgaṃ pūjitavānpriye
||2||तत्र ब्रह्मा च विष्णुश्च लिंगस्याराधनोद्यतौ ॥
शक्रश्चैव महातेजा लिंगं पूजितवान्प्रिये
varuṇo dhanadaścaiva dharmarājo'tha pāvakaḥ ||
ādityairvasubhiścaiva lokapālaiḥ samaṃtataḥ
||3||वरुणो धनदश्चैव धर्मराजोऽथ पावकः ॥
आदित्यैर्वसुभिश्चैव लोकपालैः समंततः
ārādhitaṃ mahāliṃgaṃ saṃgāleśvaranāmabhṛt ||
pūjayitvā tu te sarve dṛṣṭvā māhātmyamuttamam
||4||आराधितं महालिंगं संगालेश्वरनामभृत् ॥
पूजयित्वा तु ते सर्वे दृष्ट्वा माहात्म्यमुत्तमम्
ūcuśca sahasā devi paramānaṃdasaṃyutāḥ ||
devānāṃ nivahairyasmātsamāgatya pratiṣṭhitam ||
saṃgāleśvaranāmāsya bhaviṣyati dharātale
||5||ऊचुश्च सहसा देवि परमानंदसंयुताः ॥
देवानां निवहैर्यस्मात्समागत्य प्रतिष्ठितम् ॥
संगालेश्वरनामास्य भविष्यति धरातले
saṃgāleśvaranāmānaṃ pūjayiṣyaṃti mānavāḥ ||
na teṣāmanvaye kaścinnirdhanaḥ saṃbhaviṣyati
||6||संगालेश्वरनामानं पूजयिष्यंति मानवाः ॥
न तेषामन्वये कश्चिन्निर्धनः संभविष्यति
gosahasrasya dattasya kurukṣetre ca yatphalam ||
tatphalaṃ samavāpnoti saṃgāleśvaradarśanāt
||7||गोसहस्रस्य दत्तस्य कुरुक्षेत्रे च यत्फलम् ॥
तत्फलं समवाप्नोति संगालेश्वरदर्शनात्
amāvāsyāṃ ca saṃprāpya snānaṃ kṛtvā vidhānataḥ ||
yaḥ karoti naraḥ śrāddhaṃ pitṝṇāṃ roṣavarjitaḥ ||
pitarastasya tṛpyaṃti yāvadābhūtasaṃplavam
||8||अमावास्यां च संप्राप्य स्नानं कृत्वा विधानतः ॥
यः करोति नरः श्राद्धं पितॄणां रोषवर्जितः ॥
पितरस्तस्य तृप्यंति यावदाभूतसंप्लवम्
ardhakrośaṃ ca tatkṣetraṃ samaṃtātparimaṇḍalam ||
sarvakāmapradaṃ nṛṇāṃ sarvapātakanāśanam
||9||अर्धक्रोशं च तत्क्षेत्रं समंतात्परिमण्डलम् ॥
सर्वकामप्रदं नृणां सर्वपातकनाशनम्
asminkṣetre mahādevi jīvā uttamamadhyamāḥ ||
kālena nidhanaṃ prāptāste'pi yāṃti parāṃ gatim
||10||अस्मिन्क्षेत्रे महादेवि जीवा उत्तममध्यमाः ॥
कालेन निधनं प्राप्तास्तेऽपि यांति परां गतिम्
gṛhītvānaśanaṃ ye tu prāṇāṃstyakṣyaṃti mānavāḥ ||
niścayaṃ te mahādevi līyaṃte parameśvare
||11||गृहीत्वानशनं ये तु प्राणांस्त्यक्ष्यंति मानवाः ॥
निश्चयं ते महादेवि लीयंते परमेश्वरे
gavā hatā dvijahatā ye ca vai daṃṣṭribhirhatā ||
ātmano ghātakā ye tu sarpadaṣṭāśca ye mṛtāḥ
||12||गवा हता द्विजहता ये च वै दंष्ट्रिभिर्हता ॥
आत्मनो घातका ये तु सर्पदष्टाश्च ये मृताः
śayyāyāṃ vigataprāṇā ye ca śaucavivarjitāḥ ||
asmiṃstīrthe mahāpuṇye apunarbhavadāyake
||13||शय्यायां विगतप्राणा ये च शौचविवर्जिताः ॥
अस्मिंस्तीर्थे महापुण्ये अपुनर्भवदायके
dattaiḥ ṣoḍaśabhiḥ śrāddhairvṛṣotsarge kṛte punaḥ ||
vidhivadbhojitairviprairbhavenmuktirna saṃśayaḥ
||14||दत्तैः षोडशभिः श्राद्धैर्वृषोत्सर्गे कृते पुनः ॥
विधिवद्भोजितैर्विप्रैर्भवेन्मुक्तिर्न संशयः
evamuktvā surāḥ sarve gatavaṃtastriviṣṭapam
||15||एवमुक्त्वा सुराः सर्वे गतवंतस्त्रिविष्टपम्
saṃgāleśvaramāhātmyaṃ saṃkṣepātkathitaṃ tava ||
śrutaṃ harati pāpāni duḥkhaśokāṃstathaiva ca
||16||संगालेश्वरमाहात्म्यं संक्षेपात्कथितं तव ॥
श्रुतं हरति पापानि दुःखशोकांस्तथैव च
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye saṃgāleśvaramāhātmyavarṇanaṃnāma triśatatamo'dhyāyaḥ || 300 ||