ādityeśvaramāhātmyavarṇanam
īśvara uvāca
tato gacchedvarārohe liṃgaṃ sūryapratiṣṭhitam ||
someśātpaścime bhāge dhanuṣāṃ saptake sthitam ||
ādityeśvaranāmānaṃ sarvapātakanāśanam
||1||ततो गच्छेद्वरारोहे लिंगं सूर्यप्रतिष्ठितम् ॥
सोमेशात्पश्चिमे भागे धनुषां सप्तके स्थितम् ॥
आदित्येश्वरनामानं सर्वपातकनाशनम्
tretāyuge mahādevi samudreṇa mahātmanā ||
ratnaiḥ saṃpūjitaṃ liṃgaṃ varṣāṇāmayutaṃ priye
||2||त्रेतायुगे महादेवि समुद्रेण महात्मना ॥
रत्नैः संपूजितं लिंगं वर्षाणामयुतं प्रिये
tena ratneśvaraṃnāma sāṃprataṃ prathitaṃ kṣitau ||
paṃcāmṛtena saṃsnāpya paṃcaratnaiḥ prapūjayet
||3||तेन रत्नेश्वरंनाम सांप्रतं प्रथितं क्षितौ ॥
पंचामृतेन संस्नाप्य पंचरत्नैः प्रपूजयेत्
tato rājopacāreṇa pūjayedvidhivannaraḥ ||
evaṃ kṛte mahādevi merudānaphalaṃ labhet
||4||ततो राजोपचारेण पूजयेद्विधिवन्नरः ॥
एवं कृते महादेवि मेरुदानफलं लभेत्
sarveṣāṃ caiva yajñānāṃ dānānāṃ nātra saṃśayaḥ
||5||सर्वेषां चैव यज्ञानां दानानां नात्र संशयः
tīrthānāṃ cāpi sarveṣāṃ yaccānyatsukṛtaṃ bhuvi ||
uddharetpitṛvargaṃ ca mātṛvargaṃ ca mānavaḥ
||6||तीर्थानां चापि सर्वेषां यच्चान्यत्सुकृतं भुवि ॥
उद्धरेत्पितृवर्गं च मातृवर्गं च मानवः
bālye vayasi yatpāpaṃ vārddhake yauvane'pi vā ||
kṣālayeccaiva tatsarvaṃ dṛṣṭvā ratneśvaraṃ naraḥ
||7||बाल्ये वयसि यत्पापं वार्द्धके यौवनेऽपि वा ॥
क्षालयेच्चैव तत्सर्वं दृष्ट्वा रत्नेश्वरं नरः
dhenudānaṃ praśaṃsaṃti tasminsthāne maharṣayaḥ ||
dhenudastārayennūnaṃ daśa pūrvāndaśāparān
||8||धेनुदानं प्रशंसंति तस्मिन्स्थाने महर्षयः ॥
धेनुदस्तारयेन्नूनं दश पूर्वान्दशापरान्
devasya dakṣiṇe bhāge yo japecchatarudriyam ||
saṃpūjya vidhivalliṃgaṃ na sa bhūyaḥ prajāyate
||9||देवस्य दक्षिणे भागे यो जपेच्छतरुद्रियम् ॥
संपूज्य विधिवल्लिंगं न स भूयः प्रजायते
evaṃ saṃkṣepataḥ proktamādityeśamahodayam ||
śrutvā'vadhārya yatnena mucyate karmabaṃdhanaiḥ
||10||एवं संक्षेपतः प्रोक्तमादित्येशमहोदयम् ॥
श्रुत्वाऽवधार्य यत्नेन मुच्यते कर्मबंधनैः
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya ādityeśvaramāhātmyavarṇanaṃnāma tricatvāriṃśo'dhyāyaḥ || 43 ||