tato gacchenmahādevi siddheśvaramanuttamam
īśvara uvāca
tato gacchenmahādevi siddheśvaramanuttamam ||
tasyaiva pūrvadigbhāge nātidūre vyavasthitam
||1||ततो गच्छेन्महादेवि सिद्धेश्वरमनुत्तमम् ॥
तस्यैव पूर्वदिग्भागे नातिदूरे व्यवस्थितम्
yadā devaiḥ sametyāśu śivaliṃgaṃ pratiṣṭhitam ||
saṃgāleśvara nāmāḍhyaṃ sarvapāpaharaṃ śubham
||2||यदा देवैः समेत्याशु शिवलिंगं प्रतिष्ठितम् ॥
संगालेश्वर नामाढ्यं सर्वपापहरं शुभम्
tadā siddhagaṇāḥ sarve samārādhya vṛṣadhvajam ||
sthāpayāṃcakrire liṃgaṃ sarvasiddhipradāyakam
||3||तदा सिद्धगणाः सर्वे समाराध्य वृषध्वजम् ॥
स्थापयांचक्रिरे लिंगं सर्वसिद्धिप्रदायकम्
tatsiddheśvara nāmāḍhyaṃ mahāpātakanāśanam ||
tuṣṭuvurvividhaiḥ stotraistadā siddhagaṇāḥ śivam
||4||तत्सिद्धेश्वर नामाढ्यं महापातकनाशनम् ॥
तुष्टुवुर्विविधैः स्तोत्रैस्तदा सिद्धगणाः शिवम्
tatastuṣṭo mahādevo yācyatāṃ varamuttamam ||
namaskṛtya tataḥ sarve procuśca śaśiśekharam
||5||ततस्तुष्टो महादेवो याच्यतां वरमुत्तमम् ॥
नमस्कृत्य ततः सर्वे प्रोचुश्च शशिशेखरम्
ihāgatya naro yastu snātvā ca vidhipūrvakam ||
arcayetsiddhanāthaṃ ca japecca śatarudriyam
||6||इहागत्य नरो यस्तु स्नात्वा च विधिपूर्वकम् ॥
अर्चयेत्सिद्धनाथं च जपेच्च शतरुद्रियम्
aghoraṃ vā japenmantraṃ gāyatryaṃ ca maheśvaram ||
ṣaṇmāsābhyantareṇaiva japecca munisattamāḥ ||
aṇimādiguṇaiśvaryaṃ saṃsiddhiṃ prāpnuyāddhruvam
||7||अघोरं वा जपेन्मन्त्रं गायत्र्यं च महेश्वरम् ॥
षण्मासाभ्यन्तरेणैव जपेच्च मुनिसत्तमाः ॥
अणिमादिगुणैश्वर्यं संसिद्धिं प्राप्नुयाद्ध्रुवम्
īśvara uvāca
evaṃ bhaviṣyatītyuktvā hyaṃtardhānaṃ gato haraḥ ||
siddheśvaraṃ tu saṃpūjya hyaghoraṃ ca japennaraḥ
||8||एवं भविष्यतीत्युक्त्वा ह्यंतर्धानं गतो हरः ॥
सिद्धेश्वरं तु संपूज्य ह्यघोरं च जपेन्नरः
āśvayukkṛṣṇapakṣe tu caturdaśyāṃ mahāniśi ||
dhairyamālaṃbya nirbhīkaḥ sa siddhiṃ prāpnuyānnaraḥ
||9||आश्वयुक्कृष्णपक्षे तु चतुर्दश्यां महानिशि ॥
धैर्यमालंब्य निर्भीकः स सिद्धिं प्राप्नुयान्नरः
ityetatkathitaṃ devi māhātmyaṃ pāpanāśanam ||
siddheśvarasya devasya sarvakāmaphalapradam
||10||इत्येतत्कथितं देवि माहात्म्यं पापनाशनम् ॥
सिद्धेश्वरस्य देवस्य सर्वकामफलप्रदम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmya siddheśvaramāhātmyavarṇanaṃnāmaikottaratriśata tamo'dhyāyaḥ || 301 ||