yameśvaramāhātmyavarṇanam
īśvara uvāca
tato gacchenmahādevi dharmarājapratiṣṭhitam ||
yameśvaraṃ mahādevaṃ tasyai vottarataḥ sthitam
||1||ततो गच्छेन्महादेवि धर्मराजप्रतिष्ठितम् ॥
यमेश्वरं महादेवं तस्यै वोत्तरतः स्थितम्
yadā śapto dharmarājaśchāyayā varavarṇini ||
tadā tasyāpatatpādaḥ sa ca duḥkhānvito'bhavat
||2||यदा शप्तो धर्मराजश्छायया वरवर्णिनि ॥
तदा तस्यापतत्पादः स च दुःखान्वितोऽभवत्
tataḥ prābhāsike kṣetre tapastepe mahātapāḥ ||
sthāpayāmāsa liṃgaṃ tu tatra devasya śūlinaḥ
||3||ततः प्राभासिके क्षेत्रे तपस्तेपे महातपाः ॥
स्थापयामास लिंगं तु तत्र देवस्य शूलिनः
tasya tuṣṭo mahādevastataḥ pratyakṣatāṃ gataḥ ||
abravīddharma bhadraṃ te varaṃ varaya cepsitam
||4||तस्य तुष्टो महादेवस्ततः प्रत्यक्षतां गतः ॥
अब्रवीद्धर्म भद्रं ते वरं वरय चेप्सितम्
tadā'bravīddharmarājaḥ pādaḥ prapatito mama ||
prasādāttava deveśa jāyatāṃ punareva hi
||5||तदाऽब्रवीद्धर्मराजः पादः प्रपतितो मम ॥
प्रसादात्तव देवेश जायतां पुनरेव हि
etalliṃgaṃ suraśreṣṭha yanmayā nirmitaṃ tava ||
etadye bhaktisaṃyuktāḥ paśyaṃti prāṇino bhuvi
||6||एतल्लिंगं सुरश्रेष्ठ यन्मया निर्मितं तव ॥
एतद्ये भक्तिसंयुक्ताः पश्यंति प्राणिनो भुवि
teṣāṃ tava prasādena bhūyātpāpavimokṣaṇam
||7||तेषां तव प्रसादेन भूयात्पापविमोक्षणम्
evaṃ bhaviṣyatītyuktā hyantardhānaṃ gato haraḥ ||
yamo'pi labdhapādastu punareva divaṃ yayau
||8||एवं भविष्यतीत्युक्ता ह्यन्तर्धानं गतो हरः ॥
यमोऽपि लब्धपादस्तु पुनरेव दिवं ययौ
tasmindṛṣṭe suraśreṣṭha yamalokasamudbhavam ||
na bhayaṃ vidyate nṛṇāmapi duṣkṛtakāriṇām
||9||तस्मिन्दृष्टे सुरश्रेष्ठ यमलोकसमुद्भवम् ॥
न भयं विद्यते नृणामपि दुष्कृतकारिणाम्
bhrātṛdvitīyāsaṃyoge snātvā puṣkariṇījale ||
yameśvarasamīpastho yameśamavalokayet
||10||भ्रातृद्वितीयासंयोगे स्नात्वा पुष्करिणीजले ॥
यमेश्वरसमीपस्थो यमेशमवलोकयेत्
tilapātraṃ pradātavyaṃ dīpaṃ gāḥ kāṃcanā dikam ||
yamadevaṃ samuddiśya mucyate sarvapātakaiḥ
||11||तिलपात्रं प्रदातव्यं दीपं गाः कांचना दिकम् ॥
यमदेवं समुद्दिश्य मुच्यते सर्वपातकैः
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye yameśvaramāhātmyavarṇanaṃnāma ṣaṭcatvāriṃśaduttaraśatatamo'dhyāyaḥ || 146 ||