tato gacchenmahādevīṃ kṣetradūtīṃ tu vaiṣṇavīm
īśvara uvāca
tato gacchenmahādevīṃ kṣetradūtīṃ tu vaiṣṇavīm ||
śrīdaityasūdanāddevi pūrvabhāge vyavasthitām
||1||ततो गच्छेन्महादेवीं क्षेत्रदूतीं तु वैष्णवीम् ॥
श्रीदैत्यसूदनाद्देवि पूर्वभागे व्यवस्थिताम्
yogeśvaryāstathaiśānyāṃ dhanuṣāṃ saptake sthitām ||
mahādaurbhāgyadagdhānāṃ sthitāṃ bheṣajarūpiṇīm
||2||योगेश्वर्यास्तथैशान्यां धनुषां सप्तके स्थिताम् ॥
महादौर्भाग्यदग्धानां स्थितां भेषजरूपिणीम्
cākṣuṣasyāṃtare devi yadā daityā balotkaṭāḥ ||
hanyamānā viṣṇunā'tha dakṣiṇāṃ diśamāviśan
||3||चाक्षुषस्यांतरे देवि यदा दैत्या बलोत्कटाः ॥
हन्यमाना विष्णुनाऽथ दक्षिणां दिशमाविशन्
tatra varṣaśataṃ sāgraṃ daityāścakrurmahāhavam ||
viṣṇunā saha deveśi divyāstraiśca pṛthagvidhaiḥ
||4||तत्र वर्षशतं साग्रं दैत्याश्चक्रुर्महाहवम् ॥
विष्णुना सह देवेशि दिव्यास्त्रैश्च पृथग्विधैः
duḥkhavadhyāṃstato jñātvā viṣṇuḥ kamalalocanaḥ ||
sasmāra bhairavīṃ śaktiṃ mahāmāyāṃ mahāprabhām
||5||दुःखवध्यांस्ततो ज्ञात्वा विष्णुः कमललोचनः ॥
सस्मार भैरवीं शक्तिं महामायां महाप्रभाम्
sā smṛtā kṣaṇamātreṇa viṣṇunā prabhaviṣṇunā ||
tatrāgatā mahādevī ānaṃdasphuritekṣaṇā
||6||सा स्मृता क्षणमात्रेण विष्णुना प्रभविष्णुना ॥
तत्रागता महादेवी आनंदस्फुरितेक्षणा
viśāle tu kṛte devyā locane viṣṇudarśanāt ||
viśālākṣī tato jātā tatrasthā daityanāśinī
||7||विशाले तु कृते देव्या लोचने विष्णुदर्शनात् ॥
विशालाक्षी ततो जाता तत्रस्था दैत्यनाशिनी
asminkalpesamākhyātā lalitomā varānane ||
umādvayaṃ samākhyātaṃ someśe daityasūdane
||8||अस्मिन्कल्पेसमाख्याता ललितोमा वरानने ॥
उमाद्वयं समाख्यातं सोमेशे दैत्यसूदने
pūrvaṃ someśvare paśyetpaścācchrīdaityasūdane ||
umā dvayaṃ pūjayitvā tīrthayātrāphalaṃ labhet
||9||पूर्वं सोमेश्वरे पश्येत्पश्चाच्छ्रीदैत्यसूदने ॥
उमा द्वयं पूजयित्वा तीर्थयात्राफलं लभेत्
māghe māsi tṛtīyāyāṃ vidhinā yo'rcayettu tām ||
na saṃtativihīnaḥ syāttasyakoṭyanvaye naraḥ
||10||माघे मासि तृतीयायां विधिना योऽर्चयेत्तु ताम् ॥
न संततिविहीनः स्यात्तस्यकोट्यन्वये नरः
yo nityamīkṣate tatra bhaktyā paramayā yutaḥ ||
ārogyasukhasaubhāgyasaṃyukto'sau bhavecciram
||11||यो नित्यमीक्षते तत्र भक्त्या परमया युतः ॥
आरोग्यसुखसौभाग्यसंयुक्तोऽसौ भवेच्चिरम्
iti saṃkṣepataḥ proktaṃ māhātmyaṃ lalitodbhavam ||
śrutaṃ yatpāpanāśāya jāyate dharmavṛddhaye
||12||इति संक्षेपतः प्रोक्तं माहात्म्यं ललितोद्भवम् ॥
श्रुतं यत्पापनाशाय जायते धर्मवृद्धये
iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsa kṣetramāhātmye lalitomāviśālākṣī māhātmyavarṇanaṃnāmaikaṣaṣṭitamo'dhyāyaḥ || 61 ||