mṛtyuñjayamāhātmyavarṇanam
īśvara uvāca
tato gacchedvarārohe liṃgaṃ mṛtyuñjayeśvaram ||
tasyaiva vahni koṇasthaṃ dhanuṣāṃ daśake sthitam
||1||ततो गच्छेद्वरारोहे लिंगं मृत्युञ्जयेश्वरम् ॥
तस्यैव वह्नि कोणस्थं धनुषां दशके स्थितम्
paścime sāgarādityātsthitaṃ dhanuścatuṣṭaye ||
pāpaghnaṃ sarvajantūnāṃ darśanātsparśanādapi
||2||पश्चिमे सागरादित्यात्स्थितं धनुश्चतुष्टये ॥
पापघ्नं सर्वजन्तूनां दर्शनात्स्पर्शनादपि
pūrve yuge samākhyātaṃ nāma nandīśvareti ca ||
yatra taptaṃ tapo ghoraṃ nandināmnā gaṇena me
||3||पूर्वे युगे समाख्यातं नाम नन्दीश्वरेति च ॥
यत्र तप्तं तपो घोरं नन्दिनाम्ना गणेन मे
pratiṣṭhāpya mahāliṃgaṃ nityaṃ pūjāpareṇa ca ||
tatra japto mahāmantro mṛtyuñjaya iti śrutaḥ
||4||प्रतिष्ठाप्य महालिंगं नित्यं पूजापरेण च ॥
तत्र जप्तो महामन्त्रो मृत्युञ्जय इति श्रुतः
koṭīnāṃ niyutaṃ devi tatastuṣṭo maheśvaraḥ ||
dadau gaṇeśatāṃ tasya muktiṃ sāmīpyagāṃ tathā
||5||कोटीनां नियुतं देवि ततस्तुष्टो महेश्वरः ॥
ददौ गणेशतां तस्य मुक्तिं सामीप्यगां तथा
mṛtyuñjayena mantreṇa tasya tuṣṭo yato haraḥ ||
tena mṛtyuñjayeśeti khyātaṃ liṃgaṃ dharātale
||6||मृत्युञ्जयेन मन्त्रेण तस्य तुष्टो यतो हरः ॥
तेन मृत्युञ्जयेशेति ख्यातं लिंगं धरातले
yastaṃ pūjayate bhaktyā paśyedvā bhāvitātmavān ||
nāśayettasya pāpāni saptajanmārjitānyapi
||7||यस्तं पूजयते भक्त्या पश्येद्वा भावितात्मवान् ॥
नाशयेत्तस्य पापानि सप्तजन्मार्जितान्यपि
snāpayetpayasā liṃgaṃ dadhnā ghṛtayutena ca ||
madhunekṣurasenaiva kuṃkumena vilepayet
||8||स्नापयेत्पयसा लिंगं दध्ना घृतयुतेन च ॥
मधुनेक्षुरसेनैव कुंकुमेन विलेपयेत्
karpūrośīra miśreṇa mṛganābhirasena ca ||
candanena sugandhena puṣpaiḥ saṃpūjayettataḥ
||9||कर्पूरोशीर मिश्रेण मृगनाभिरसेन च ॥
चन्दनेन सुगन्धेन पुष्पैः संपूजयेत्ततः
dadyāddhūpaṃ puro devi tato devasya cāgurum ||
vastraiḥ saṃpūjya vividhairātmavittānusārataḥ
||10||दद्याद्धूपं पुरो देवि ततो देवस्य चागुरुम् ॥
वस्त्रैः संपूज्य विविधैरात्मवित्तानुसारतः
naivedyaṃ paramānnaṃ ca dattvā dīpasamanvitam ||
aṣṭāṃgaṃ praṇipātaṃ ca tataḥ kāryaṃ ca bhaktitaḥ
||11||नैवेद्यं परमान्नं च दत्त्वा दीपसमन्वितम् ॥
अष्टांगं प्रणिपातं च ततः कार्यं च भक्तितः
hemadānaṃ pradātavyaṃ brāhmaṇe vedapārage
||12||हेमदानं प्रदातव्यं ब्राह्मणे वेदपारगे
evaṃ yātrā bhavettasya śāstroktā nātra saṃśayaḥ ||
evaṃ kṛtvā naro devi labhate janmanaḥ phalam
||13||एवं यात्रा भवेत्तस्य शास्त्रोक्ता नात्र संशयः ॥
एवं कृत्वा नरो देवि लभते जन्मनः फलम्
iti saṃkṣepataḥ proktaṃ mṛtyuñjayamahodayam ||
pāpaghnaṃ sarvajaṃtūnāṃ sarvakāmaphalapradam
||14||इति संक्षेपतः प्रोक्तं मृत्युञ्जयमहोदयम् ॥
पापघ्नं सर्वजंतूनां सर्वकामफलप्रदम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmya ekādaśarudramāhātmye mṛtyuñjayamāhātmyavarṇanaṃnāma pañcanavatitamo'dhyāyaḥ || 95 ||