pāṃḍavakūpamāhātmyavarṇanam
īśvara uvāca
tato gacchenmahādevi kūpaṃ trailokyapūjitam ||
paścime tasya tīrthasya pāṃḍavānāṃ mahātmanām
||1||ततो गच्छेन्महादेवि कूपं त्रैलोक्यपूजितम् ॥
पश्चिमे तस्य तीर्थस्य पांडवानां महात्मनाम्
yadā'raṇyamanuprāptāḥ pāṃḍavāḥ pṛthivītale ||
bhramamāṇā mahādevi prabhāsaṃ kṣetramāgatāḥ
||2||यदाऽरण्यमनुप्राप्ताः पांडवाः पृथिवीतले ॥
भ्रममाणा महादेवि प्रभासं क्षेत्रमागताः
tataste nyavasaṃstatra kiṃcitkālaṃ samāhitāḥ ||
gatvā kṣetraṃ mahāpuṇyaṃ tataḥ kṛṣṇā'bravīdidam
||3||ततस्ते न्यवसंस्तत्र किंचित्कालं समाहिताः ॥
गत्वा क्षेत्रं महापुण्यं ततः कृष्णाऽब्रवीदिदम्
brāhmaṇānāṃ sahasrāṇi bhuṃjate bhavatāṃ gṛhe ||
dūre jalāśrayaścaiva na tāvaṃtaśca kiṃkarāḥ
||4||ब्राह्मणानां सहस्राणि भुंजते भवतां गृहे ॥
दूरे जलाश्रयश्चैव न तावंतश्च किंकराः
tasmājjalāśrayaḥ kāryaṃ āśramasya samīpataḥ ||
yatra snānaṃ kariṣyāmi yuṣmākaṃ saṃprasādataḥ
||5||तस्माज्जलाश्रयः कार्यं आश्रमस्य समीपतः ॥
यत्र स्नानं करिष्यामि युष्माकं संप्रसादतः
tatastu pāṃḍavāḥ sarve sahitāste varānane ||
akhanaṃstatra te kūpaṃ draupadīvākyapreritāḥ
||6||ततस्तु पांडवाः सर्वे सहितास्ते वरानने ॥
अखनंस्तत्र ते कूपं द्रौपदीवाक्यप्रेरिताः
athājagāma tatraiva bhagavāndevakīsutaḥ ||
śrutvā samāgatānpārthāndvārāvatyāḥ sabāṃdhavaḥ
||7||अथाजगाम तत्रैव भगवान्देवकीसुतः ॥
श्रुत्वा समागतान्पार्थान्द्वारावत्याः सबांधवः
pradyumnena ca sāṃbena gadena niṣadhena ca ||
yuyudhānena rāmeṇa cārudeṣṇena dhīmatā
||8||प्रद्युम्नेन च सांबेन गदेन निषधेन च ॥
युयुधानेन रामेण चारुदेष्णेन धीमता
anyaiḥ parivṛtaḥ śūrairyādavairyuddha durmadaiḥ ||
te sametya yathānyāyaṃ samastā yadupuṃgavāḥ
||9||अन्यैः परिवृतः शूरैर्यादवैर्युद्ध दुर्मदैः ॥
ते समेत्य यथान्यायं समस्ता यदुपुंगवाः
tataḥ kathāvasāne ca kasmiṃścitkāraṇāṃtare ||
vāsudevaḥ pāṃḍusutamidaṃ vacanamabravīt
||10||ततः कथावसाने च कस्मिंश्चित्कारणांतरे ॥
वासुदेवः पांडुसुतमिदं वचनमब्रवीत्
yudhiṣṭhira mahābāho kiṃ te kāmakaromyaham ||
rājyaṃ dhānyaṃ dhanaṃ cāpi athavā ripunāśanam
||11||युधिष्ठिर महाबाहो किं ते कामकरोम्यहम् ॥
राज्यं धान्यं धनं चापि अथवा रिपुनाशनम्
yudhiṣṭhira uvāca
śaktastvaṃ yādavaśreṣṭha sarvakarmasvasaṃśayaḥ ||
pratijñātaṃ tvayā pūrvaṃ varṣairdvādaśabhiḥ priyam
||12||शक्तस्त्वं यादवश्रेष्ठ सर्वकर्मस्वसंशयः ॥
प्रतिज्ञातं त्वया पूर्वं वर्षैर्द्वादशभिः प्रियम्
tannāsti triṣu lokeṣu yanna siddhyati bhūtale ||
tvayi tuṣṭe jagannātha sarvadevanamaskṛte
||13||तन्नास्ति त्रिषु लोकेषु यन्न सिद्ध्यति भूतले ॥
त्वयि तुष्टे जगन्नाथ सर्वदेवनमस्कृते
avaśyaṃ yadi tuṣṭo'si mama sarvajagatpate ||
atra sāṃnidhyamāgaccha kūpe nityaṃ janārdana
||14||अवश्यं यदि तुष्टोऽसि मम सर्वजगत्पते ॥
अत्र सांनिध्यमागच्छ कूपे नित्यं जनार्दन
atrāgatya naro yastu bhaktyā snānaṃ samācaret ||
sa yātu vaiṣṇavaṃ sthānaṃ prasādāttava keśava
||15||अत्रागत्य नरो यस्तु भक्त्या स्नानं समाचरेत् ॥
स यातु वैष्णवं स्थानं प्रसादात्तव केशव
īśvara uvāca
evaṃ bhaviṣyatītyuktvā tadā'mantrya yudhiṣṭhiram ||
prayayau dvārakāṃ kṛṣṇaḥ sarvalokanamaskṛtaḥ
||16||एवं भविष्यतीत्युक्त्वा तदाऽमन्त्र्य युधिष्ठिरम् ॥
प्रययौ द्वारकां कृष्णः सर्वलोकनमस्कृतः
tasmiñchrāddhaṃ naraḥ kṛtvā vājimedhaphalaṃ labhet ||
prasādāddevadevasya viṣṇoramitatejasaḥ
||17||तस्मिञ्छ्राद्धं नरः कृत्वा वाजिमेधफलं लभेत् ॥
प्रसादाद्देवदेवस्य विष्णोरमिततेजसः
tadardhaṃ tarpaṇenaiva snānātpādamavāpnuyāt ||
tasmātsarvaprayatnena tatra śrāddhaṃ samācaret
||18||तदर्धं तर्पणेनैव स्नानात्पादमवाप्नुयात् ॥
तस्मात्सर्वप्रयत्नेन तत्र श्राद्धं समाचरेत्
jyeṣṭhasya paurṇamāsyāṃ yaḥ snānaṃ śrāddhaṃ kariṣyati ||
sāvitrīṃ caiva saṃpūjya sa yāsyati paramaṃ padam
||19||ज्येष्ठस्य पौर्णमास्यां यः स्नानं श्राद्धं करिष्यति ॥
सावित्रीं चैव संपूज्य स यास्यति परमं पदम्
godānaṃ tatra deyaṃ tu samyagyātrāphalepsubhiḥ
||20||गोदानं तत्र देयं तु सम्यग्यात्राफलेप्सुभिः
iti śrīskāṃde mahā purāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsakṣetramāhātmye pāṃḍavakūpamāhātmyavarṇanaṃnāma dvātriṃśaduttaradviśatatamo'dhyāyaḥ || 232 ||