bhairaveśvaramāhātmyavarṇanam
īśvara uvāca
tato gacchenmahādevi bhairaveśvaramuttamam ||
tasyaiva vahnikoṇasthaṃ dhanuṣāṃdaśake sthitam
||1||ततो गच्छेन्महादेवि भैरवेश्वरमुत्तमम् ॥
तस्यैव वह्निकोणस्थं धनुषांदशके स्थितम्
sarvakāmapradaṃ devi dāridryaughavināśanam ||
pūrvaṃ caṇḍeśvaraṃnāma khyātaṃ kṛtayuge priye
||2||सर्वकामप्रदं देवि दारिद्र्यौघविनाशनम् ॥
पूर्वं चण्डेश्वरंनाम ख्यातं कृतयुगे प्रिये
caṇḍonāma gaṇo devi tena cārādhitaṃ purā ||
divyābdānāṃ sahasraṃ tu tena caṇḍeśvaraṃ smṛtam
||3||चण्डोनाम गणो देवि तेन चाराधितं पुरा ॥
दिव्याब्दानां सहस्रं तु तेन चण्डेश्वरं स्मृतम्
taṃ dṛṣṭvā devadeveśaṃ spṛṣṭvā ca susamāhitaḥ ||
mucyate sakalātpāpādājanmamaraṇāṃtikāt
||4||तं दृष्ट्वा देवदेवेशं स्पृष्ट्वा च सुसमाहितः ॥
मुच्यते सकलात्पापादाजन्ममरणांतिकात्
tatra kṛṣṇacaturdaśyāṃ māse bhādrapade priye ||
upavāsa paro bhūtvā yaḥ karoti prajāgaram ||
sa yāti paramaṃ sthānaṃ yatra devo maheśvaraḥ
||5||तत्र कृष्णचतुर्दश्यां मासे भाद्रपदे प्रिये ॥
उपवास परो भूत्वा यः करोति प्रजागरम् ॥
स याति परमं स्थानं यत्र देवो महेश्वरः
vācikaṃ mānasaṃ pāpaṃ karmaṇā yadupārjitam ||
tatsarvaṃ nāśamāyāti tasya liṃgasya darśanāt
||6||वाचिकं मानसं पापं कर्मणा यदुपार्जितम् ॥
तत्सर्वं नाशमायाति तस्य लिंगस्य दर्शनात्
tilā hiraṇyaṃ vastrāṇi tatra deyaṃ manīṣiṇe ||
sarvakilviṣanāśārthaṃ samyagyātrāphalepsunā
||7||तिला हिरण्यं वस्त्राणि तत्र देयं मनीषिणे ॥
सर्वकिल्विषनाशार्थं सम्यग्यात्राफलेप्सुना
bhairavākāramāsthāya kalpānte sa haredyataḥ ||
viśvaṃ samagraṃ deveśi tenāsau bhairavaḥ smṛtaḥ
||8||भैरवाकारमास्थाय कल्पान्ते स हरेद्यतः ॥
विश्वं समग्रं देवेशि तेनासौ भैरवः स्मृतः
asminkalpe mahādevi prabhāsakṣetramāsthitaḥ ||
babhūva bhairavo rudraḥ kalpānte liṃgamūrtimān
||9||अस्मिन्कल्पे महादेवि प्रभासक्षेत्रमास्थितः ॥
बभूव भैरवो रुद्रः कल्पान्ते लिंगमूर्तिमान्
evaṃ saṃkṣepataḥ proktaṃ māhātmyaṃ bhairaveśvaram ||
yacchrutvā mucyate jantuḥ pātakādatibhairavāt
||10||एवं संक्षेपतः प्रोक्तं माहात्म्यं भैरवेश्वरम् ॥
यच्छ्रुत्वा मुच्यते जन्तुः पातकादतिभैरवात्
iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmya ekādaśarudramāhātmye bhairaveśvaramāhātmya varṇanaṃnāma caturṇavatitamo'dhyāyaḥ || 94 ||