saṃnihityāmāhātmyavarṇanam
devyuvāca
tatra saṃnihitā proktā yā tvayā vṛṣabhadhvaja ||
kathaṃ deva samāyātā kurukṣetrānmahānadī ||
kiṃ prabhāvā tu sā proktā phalaṃ snānādikena kim
||1||तत्र संनिहिता प्रोक्ता या त्वया वृषभध्वज ॥
कथं देव समायाता कुरुक्षेत्रान्महानदी ॥
किं प्रभावा तु सा प्रोक्ता फलं स्नानादिकेन किम्
īśvara uvāca
śṛṇu devi pravakṣyāmi yatra saṃnihitā śubhā ||
pāpaghnī sarvajaṃtūnāṃ darśanātsparśanādapi
||2||शृणु देवि प्रवक्ष्यामि यत्र संनिहिता शुभा ॥
पापघ्नी सर्वजंतूनां दर्शनात्स्पर्शनादपि
ādinārāyaṇāddevi paścime dhanuṣāṃ traye ||
saṃsthitā sā mahādevī saridrūpā mahānadī
||3||आदिनारायणाद्देवि पश्चिमे धनुषां त्रये ॥
संस्थिता सा महादेवी सरिद्रूपा महानदी
kathayāmi samāsena tadutpattiṃ śṛṇu priye ||
jarāsaṃdhabhayāddevi viṣṇuḥ parijanaiḥ saha
||4||कथयामि समासेन तदुत्पत्तिं शृणु प्रिये ॥
जरासंधभयाद्देवि विष्णुः परिजनैः सह
gṛhītvā yādavānsarvānbālavṛddhavaṇigjanān ||
sa śūnyāṃ mathurāṃ kṛtvā prabhāsaṃ samupāgataḥ
||5||गृहीत्वा यादवान्सर्वान्बालवृद्धवणिग्जनान् ॥
स शून्यां मथुरां कृत्वा प्रभासं समुपागतः
samudraṃ prārthayāmāsa sthānaṃ saṃvāsahetave ||
etasminneva kāle tu devadevo divākaraḥ
||6||समुद्रं प्रार्थयामास स्थानं संवासहेतवे ॥
एतस्मिन्नेव काले तु देवदेवो दिवाकरः
saṃgrasto rāhuṇā devi parvakāle hyupasthite ||
taṃ dṛṣṭvā yādavāḥ sarve viṣādaṃ paramaṃ gatāḥ
||7||संग्रस्तो राहुणा देवि पर्वकाले ह्युपस्थिते ॥
तं दृष्ट्वा यादवाः सर्वे विषादं परमं गताः
aprāptāḥ saṃnihityāyāṃ tānuvāca janārddanaḥ ||
mā viṣādaṃ yaduśreṣṭhā vrajadhvaṃ mayi saṃsthite
||8||अप्राप्ताः संनिहित्यायां तानुवाच जनार्द्दनः ॥
मा विषादं यदुश्रेष्ठा व्रजध्वं मयि संस्थिते
dṛśyatāṃ matprabhāvo'dya dharmā rthamiha bhūtale ||
ānayiṣyāmyahaṃ samyakpuṇyaṃ sāṃnihitaṃ saraḥ
||9||दृश्यतां मत्प्रभावोऽद्य धर्मा र्थमिह भूतले ॥
आनयिष्याम्यहं सम्यक्पुण्यं सांनिहितं सरः
evamuktvā sa bhagavānsamādhistho babhūva ha ||
evaṃ saṃdhyāyatastasya viṣṇoramitatejasaḥ
||10||एवमुक्त्वा स भगवान्समाधिस्थो बभूव ह ॥
एवं संध्यायतस्तस्य विष्णोरमिततेजसः
prādurbhūtā tatastasya vāridhārā'grataḥ śubhā ||
bibhedya dharaṇīpṛṣṭhaṃ snānārthaṃ cāsuradviṣaḥ
||11||प्रादुर्भूता ततस्तस्य वारिधाराऽग्रतः शुभा ॥
बिभेद्य धरणीपृष्ठं स्नानार्थं चासुरद्विषः
tata ste yādavāḥ sarve rāmasāṃbapurogamāḥ ||
cakruḥ snānaṃ mahādevi rāhugraste divākare
||12||तत स्ते यादवाः सर्वे रामसांबपुरोगमाः ॥
चक्रुः स्नानं महादेवि राहुग्रस्ते दिवाकरे
prāptapuṇyā babhūvuste saṃnihityāsamudbhavam ||
kurukṣetrasya yātrāyāḥ prāpya samyakphalaṃ hi te
||13||प्राप्तपुण्या बभूवुस्ते संनिहित्यासमुद्भवम् ॥
कुरुक्षेत्रस्य यात्रायाः प्राप्य सम्यक्फलं हि ते
evaṃ tatsamanuprāptaṃ puṇyaṃ sānnihitaṃ saraḥ ||
tatra snātvā mahādevi rāhugraste divākare ||
agniṣṭomasya yajñasya phalaṃ prāpnotyaśeṣataḥ
||14||एवं तत्समनुप्राप्तं पुण्यं सान्निहितं सरः ॥
तत्र स्नात्वा महादेवि राहुग्रस्ते दिवाकरे ॥
अग्निष्टोमस्य यज्ञस्य फलं प्राप्नोत्यशेषतः
yastatra bhojayedvipraṃ ṣaḍrasaṃ vidhipūrvakam ||
ekena bhojitenaiva koṭirbhavati bhojitā
||15||यस्तत्र भोजयेद्विप्रं षड्रसं विधिपूर्वकम् ॥
एकेन भोजितेनैव कोटिर्भवति भोजिता
yastatra kārayeddhomaṃ saṃnihityāsamīpataḥ ||
ekaikāhutidānena koṭihomaphalaṃ labhet
||16||यस्तत्र कारयेद्धोमं संनिहित्यासमीपतः ॥
एकैकाहुतिदानेन कोटिहोमफलं लभेत्
mantrajāpyaṃ tu kurute tatra sthāne sthito yadi ||
ekaikamaṃtrajāpyena koṭijāpyaphalaṃ labhet
||17||मन्त्रजाप्यं तु कुरुते तत्र स्थाने स्थितो यदि ॥
एकैकमंत्रजाप्येन कोटिजाप्यफलं लभेत्
suvarṇadānaṃ dātavyaṃ tatra yātrāphalepsubhiḥ ||
snātvā saṃpūjanīyaśca ādidevo janārddanaḥ
||18||सुवर्णदानं दातव्यं तत्र यात्राफलेप्सुभिः ॥
स्नात्वा संपूजनीयश्च आदिदेवो जनार्द्दनः
iti vai kathitaṃ samyakphalaṃ sāṃnihitaṃ tava ||
śrutaṃ pāpaharaṃ nṛṇāṃ samyakchraddhāvatāṃ priye
||19||इति वै कथितं सम्यक्फलं सांनिहितं तव ॥
श्रुतं पापहरं नृणां सम्यक्छ्रद्धावतां प्रिये
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye saṃnihityāmāhātmyavarṇanaṃnāma paṃcāśītitamo'dhyāyaḥ || 85 ||