tato gacchenmahādevi caṇḍīśaṃ devamuttamam
īśvara uvāca
tato gacchenmahādevi caṇḍīśaṃ devamuttamam ||
someśādīśadigbhāge dhanuṣāṃ saptake sthitam
||1||ततो गच्छेन्महादेवि चण्डीशं देवमुत्तमम् ॥
सोमेशादीशदिग्भागे धनुषां सप्तके स्थितम्
daṇḍapāṇestu bhavanāddakṣiṇe nātidūragam ||
caṃḍyā pratiṣṭhitaṃ pūrvaṃ caṇḍenārādhitaṃ tataḥ
||2||दण्डपाणेस्तु भवनाद्दक्षिणे नातिदूरगम् ॥
चंड्या प्रतिष्ठितं पूर्वं चण्डेनाराधितं ततः
gaṇena mama deveśi tatkṛtvā duṣkaraṃ tapaḥ ||
tena caṇḍeśvaraṃ liṃgaṃ prakhyātaṃ dharaṇītale
||3||गणेन मम देवेशि तत्कृत्वा दुष्करं तपः ॥
तेन चण्डेश्वरं लिंगं प्रख्यातं धरणीतले
snāpayetpayasā pūrvaṃ dadhnā ghṛtayutena ca ||
madhunekṣurasenaiva kuṃkumena vilepayet
||4||स्नापयेत्पयसा पूर्वं दध्ना घृतयुतेन च ॥
मधुनेक्षुरसेनैव कुंकुमेन विलेपयेत्
karpūrośīramiśreṇa mṛganābhirasena ca ||
candanena sugandhena puṣpaiḥ saṃpūjayettataḥ
||5||कर्पूरोशीरमिश्रेण मृगनाभिरसेन च ॥
चन्दनेन सुगन्धेन पुष्पैः संपूजयेत्ततः
dagdhvā dhūpaṃ puro devi tato devasya cāgurum ||
vastraiḥ saṃpūjayetpaścādātmavittānusārataḥ
||6||दग्ध्वा धूपं पुरो देवि ततो देवस्य चागुरुम् ॥
वस्त्रैः संपूजयेत्पश्चादात्मवित्तानुसारतः
naivedyaṃ paramānnaṃ ca dattvā dīpasama nvitam ||
tato dadyāddvijātibhyo yathāśaktyā tu dakṣiṇām
||7||नैवेद्यं परमान्नं च दत्त्वा दीपसम न्वितम् ॥
ततो दद्याद्द्विजातिभ्यो यथाशक्त्या तु दक्षिणाम्
dakṣiṇāṃ diśamāsthāya yatkiṃcittatra dīyate ||
caṇḍīśasya varārohe tatsarvaṃ cākṣayaṃ bhavet
||8||दक्षिणां दिशमास्थाय यत्किंचित्तत्र दीयते ॥
चण्डीशस्य वरारोहे तत्सर्वं चाक्षयं भवेत्
yaḥ śrāddhaṃ kurute tatra caṇḍīśasya tu dakṣiṇe ||
ākalpaṃ tṛptimāyāṃti pitarastasya bhāmini
||9||यः श्राद्धं कुरुते तत्र चण्डीशस्य तु दक्षिणे ॥
आकल्पं तृप्तिमायांति पितरस्तस्य भामिनि
ayane cottare prāpte yaḥ kuryādghṛta kambalam ||
na sa bhūyo'tra saṃsāre janma prāpnoti dāruṇam
||10||अयने चोत्तरे प्राप्ते यः कुर्याद्घृत कम्बलम् ॥
न स भूयोऽत्र संसारे जन्म प्राप्नोति दारुणम्
evaṃ kṛtvā naro bhaktyā yātrāṃ devasya śūlinaḥ ||
nirmālyātikramodbhūtairajñānādbhakṣaṇodbhavaiḥ ||
pāpaiḥ pramucyate jaṃtustathā'nyaiḥ karmasaṃbhavaiḥ
||11||एवं कृत्वा नरो भक्त्या यात्रां देवस्य शूलिनः ॥
निर्माल्यातिक्रमोद्भूतैरज्ञानाद्भक्षणोद्भवैः ॥
पापैः प्रमुच्यते जंतुस्तथाऽन्यैः कर्मसंभवैः
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathameprabhāsakṣetramāhātmye caṇḍīśamāhātmyavarṇanaṃnāmadvicatvāriṃśo'dhyāyaḥ || 42 ||