purāṇapustakadānaphalavarṇanam
ṛṣaya ūcuḥ
kathāyā lakṣaṇaṃ brūhi guṇadoṣānsavistarān ||
ārṣeyapauruṣeyāṇāṃ kāvyacihnaparīkṣaṇam ||
kathaṃ jñeyaṃ mahābuddhe śrotumicchāmahe vayam
||1||कथाया लक्षणं ब्रूहि गुणदोषान्सविस्तरान् ॥
आर्षेयपौरुषेयाणां काव्यचिह्नपरीक्षणम् ॥
कथं ज्ञेयं महाबुद्धे श्रोतुमिच्छामहे वयम्
sūta uvāca
atha saṃkṣepato vakṣye purāṇānāmanukramam ||
lakṣaṇaṃ caiva saṃkhyāṃ ca uktabhedāṃstathaiva ca
||2||अथ संक्षेपतो वक्ष्ये पुराणानामनुक्रमम् ॥
लक्षणं चैव संख्यां च उक्तभेदांस्तथैव च
purā tapaścacārogramamarāṇāṃ pitāmahaḥ ||
āvirbhūtāstato vedāḥ saṣaḍaṃgapadakramāḥ
||3||पुरा तपश्चचारोग्रममराणां पितामहः ॥
आविर्भूतास्ततो वेदाः सषडंगपदक्रमाः
tataḥ purāṇamakhilaṃ sarvaśāstramayaṃ dhruvam ||
nityaśabdamayaṃ puṇyaṃ śata koṭipravistaram
||4||ततः पुराणमखिलं सर्वशास्त्रमयं ध्रुवम् ॥
नित्यशब्दमयं पुण्यं शत कोटिप्रविस्तरम्
nirgataṃ brahmaṇo vaktrādbrāhmaṃ vaiṣṇavameva ca ||
śaivaṃ bhāgavataṃ caiva bhaviṣyaṃ nāradīyakam
||5||निर्गतं ब्रह्मणो वक्त्राद्ब्राह्मं वैष्णवमेव च ॥
शैवं भागवतं चैव भविष्यं नारदीयकम्
mārkaṇḍeyamathāgneyaṃ brahmavaivartameva ca ||
laiṅgaṃ tathā ca vārāhaṃ skāṃdaṃ vāmanameva ca
||6||मार्कण्डेयमथाग्नेयं ब्रह्मवैवर्तमेव च ॥
लैङ्गं तथा च वाराहं स्कांदं वामनमेव च
kaurmyaṃ mātsyaṃ gāruḍaṃ ca vāyavīyamanantaram ||
aṣṭādaśaṃ samuddiṣṭaṃ sarvapātakanāśanam
||7||कौर्म्यं मात्स्यं गारुडं च वायवीयमनन्तरम् ॥
अष्टादशं समुद्दिष्टं सर्वपातकनाशनम्
ekameva purā hyāsīdbrahmāṇḍaṃ śatakoṭidhā
||8||एकमेव पुरा ह्यासीद्ब्रह्माण्डं शतकोटिधा
tato'ṣṭādaśadhā kṛtvā vedavyāso yugeyuge ||
prakhyāpayati loke'sminsākṣānnārāyaṇāṃśajaḥ
||9||ततोऽष्टादशधा कृत्वा वेदव्यासो युगेयुगे ॥
प्रख्यापयति लोकेऽस्मिन्साक्षान्नारायणांशजः
anyānyupapurāṇāni muninā kathitāni tu ||
tāni vaḥ kathayiṣyāmi saṃkṣepādavadhāryatām
||10||अन्यान्युपपुराणानि मुनिना कथितानि तु ॥
तानि वः कथयिष्यामि संक्षेपादवधार्यताम्
ādyaṃ sanatkumāroktaṃ nārasiṃhamataḥ param ||
tṛtīyaṃ skāndamuddiṣṭaṃ kumāreṇānubhāṣitam
||11||आद्यं सनत्कुमारोक्तं नारसिंहमतः परम् ॥
तृतीयं स्कान्दमुद्दिष्टं कुमारेणानुभाषितम्
caturthaṃ śivadharmākhyaṃ sākṣānnandīśabhāṣitam ||
durvāsasoktamāścaryyaṃ nāradoktamataḥ param
||12||चतुर्थं शिवधर्माख्यं साक्षान्नन्दीशभाषितम् ॥
दुर्वाससोक्तमाश्चर्य्यं नारदोक्तमतः परम्
kāpilaṃ mānavaṃ caiva tathaivośanaseritam ||
brahmāṇḍaṃ vāruṇaṃ cānyatkālikāhvayameva ca
||13||कापिलं मानवं चैव तथैवोशनसेरितम् ॥
ब्रह्माण्डं वारुणं चान्यत्कालिकाह्वयमेव च
māheśvaraṃ tathā sāṃbaṃ sauraṃ sarvārthasaṃcayam ||
parāśaroktaṃ paramaṃ mārīcaṃ bhārgavāhvayam
||14||माहेश्वरं तथा सांबं सौरं सर्वार्थसंचयम् ॥
पराशरोक्तं परमं मारीचं भार्गवाह्वयम्
etānyupapurāṇāni kathitāni dvijottamāḥ
||15||एतान्युपपुराणानि कथितानि द्विजोत्तमाः
ṛṣaya ūcuḥ
purāṇasaṃkhyāmācakṣva sūta vistaraśaḥ kramāt ||
dānadharmamaśeṣajña yathāvadanupūrvaśaḥ
||16||पुराणसंख्यामाचक्ष्व सूत विस्तरशः क्रमात् ॥
दानधर्ममशेषज्ञ यथावदनुपूर्वशः
sūta uvāca
idameva purāṇe'sminpurāṇapuruṣastadā ||
yaduktavānsa viśvātmā manave tannibodhata
||17||इदमेव पुराणेऽस्मिन्पुराणपुरुषस्तदा ॥
यदुक्तवान्स विश्वात्मा मनवे तन्निबोधत
purāṇaṃ sarvaśāstrāṇāṃ brahmāṇḍaṃ prathamaṃ smṛtam ||
anantaraṃ ca vaktrebhyo vedāstasya vinirgatāḥ
||18||पुराणं सर्वशास्त्राणां ब्रह्माण्डं प्रथमं स्मृतम् ॥
अनन्तरं च वक्त्रेभ्यो वेदास्तस्य विनिर्गताः
purāṇamekamevāsīttasminkalpāntaretathā ||
trivargasādhanaṃ puṇyaṃ śatakoṭipravistaram
||19||पुराणमेकमेवासीत्तस्मिन्कल्पान्तरेतथा ॥
त्रिवर्गसाधनं पुण्यं शतकोटिप्रविस्तरम्
vinirdagdheṣu lokeṣu kṛṣṇenānantarūpiṇā ||
sāṅgāṃśca caturo vedānpurāṇanyāyavistaram
||20||विनिर्दग्धेषु लोकेषु कृष्णेनानन्तरूपिणा ॥
साङ्गांश्च चतुरो वेदान्पुराणन्यायविस्तरम्
mīmāṃsāṃ dharmaśāstraṃ ca parigṛhyātmasātkṛtam ||
matsyarūpeṇa ca punaḥ kalpādāvudakārṇave
||21||मीमांसां धर्मशास्त्रं च परिगृह्यात्मसात्कृतम् ॥
मत्स्यरूपेण च पुनः कल्पादावुदकार्णवे
aśeṣameva kathitaṃ brahmaṇe divyacakṣuṣe ||
brahmā jagāda ca munīṃstrikālajñānadarśanaḥ
||22||अशेषमेव कथितं ब्रह्मणे दिव्यचक्षुषे ॥
ब्रह्मा जगाद च मुनींस्त्रिकालज्ञानदर्शनः
pravṛttiḥ sarvaśāstrāṇāṃ purāṇasyābhavattataḥ
||23||प्रवृत्तिः सर्वशास्त्राणां पुराणस्याभवत्ततः
tataḥ kālakrameṇāsau vyāsarūpadharo hariḥ ||
aṣṭādaśapurāṇāni saṃkṣepsyati yugeyuge
||24||ततः कालक्रमेणासौ व्यासरूपधरो हरिः ॥
अष्टादशपुराणानि संक्षेप्स्यति युगेयुगे
caturlakṣapramāṇāni dvāparedvāpare sadā ||
tadāṣṭādaśadhā kṛṣṇā bhūrloke'sminprabhāṣate
||25||चतुर्लक्षप्रमाणानि द्वापरेद्वापरे सदा ॥
तदाष्टादशधा कृष्णा भूर्लोकेऽस्मिन्प्रभाषते
adyā'pi devaloke tu śatakoṭipravistaram ||
tadartho'tra caturlakṣaḥ saṃkṣepeṇa niveśitaḥ
||26||अद्याऽपि देवलोके तु शतकोटिप्रविस्तरम् ॥
तदर्थोऽत्र चतुर्लक्षः संक्षेपेण निवेशितः
purāṇāni daśāṣṭau ca sāṃprataṃ tadihocyate ||
nāmatastāni vakṣyāmi saṃkhyāṃ ca munisattamāḥ
||27||पुराणानि दशाष्टौ च सांप्रतं तदिहोच्यते ॥
नामतस्तानि वक्ष्यामि संख्यां च मुनिसत्तमाः
brahmaṇā'bhihitaṃ pūrvaṃ yāvanmātraṃ marīcaye ||
brāhmaṃ taddaśasāhasraṃ purāṇaṃ tadihocyate
||28||ब्रह्मणाऽभिहितं पूर्वं यावन्मात्रं मरीचये ॥
ब्राह्मं तद्दशसाहस्रं पुराणं तदिहोच्यते
likhitvā tacca yo dadyājjaladhenusamanvitam ||
vaiśākhyāṃ paurṇamāsyāṃ ca brahmaloke mahīyate
||29||लिखित्वा तच्च यो दद्याज्जलधेनुसमन्वितम् ॥
वैशाख्यां पौर्णमास्यां च ब्रह्मलोके महीयते
etadeva yadā padmamabhūddhairaṇmayaṃ jagat ||
tadvṛttāṃtāśrayāṃtaṃ tatpādmamityucyate budhaiḥ
||30||एतदेव यदा पद्ममभूद्धैरण्मयं जगत् ॥
तद्वृत्तांताश्रयांतं तत्पाद्ममित्युच्यते बुधैः
pādmaṃ tatpañcapañcāśatsahasrāṇīha paṭhyate ||
tatpurāṇaṃ ca yo dadyātsuvarṇakamalānvitam ||
jyeṣṭhe māsi tilairyuktaṃ so'śvamedhaphalaṃ labhet
||31||पाद्मं तत्पञ्चपञ्चाशत्सहस्राणीह पठ्यते ॥
तत्पुराणं च यो दद्यात्सुवर्णकमलान्वितम् ॥
ज्येष्ठे मासि तिलैर्युक्तं सोऽश्वमेधफलं लभेत्
vārāhakalpavṛttāntamadhikṛtya parātparaḥ ||
yatrāha dharmānakhilāṃstaduktaṃ vaiṣṇavaṃ viduḥ
||32||वाराहकल्पवृत्तान्तमधिकृत्य परात्परः ॥
यत्राह धर्मानखिलांस्तदुक्तं वैष्णवं विदुः
caritairañcitaṃ viṣṇostalloke vaiṣṇavaṃ viduḥ ||
trayoviṃśatisāhasraṃ purāṇaṃ tatprakīrtitam
||33||चरितैरञ्चितं विष्णोस्तल्लोके वैष्णवं विदुः ॥
त्रयोविंशतिसाहस्रं पुराणं तत्प्रकीर्तितम्
tadāṣāḍhe ca yo dadyādghṛtadhenusamanvitam ||
paurṇamāsyāṃ viśuddhāyāṃ saṃ padaṃ yāti vaiṣṇavam
||34||तदाषाढे च यो दद्याद्घृतधेनुसमन्वितम् ॥
पौर्णमास्यां विशुद्धायां सं पदं याति वैष्णवम्
śrutakalpaprasaṅgena dharmānvāyurathābravīt ||
yatra tadvāyavīyaṃ syādrudramāhātmyasaṃyutam
||35||श्रुतकल्पप्रसङ्गेन धर्मान्वायुरथाब्रवीत् ॥
यत्र तद्वायवीयं स्याद्रुद्रमाहात्म्यसंयुतम्
caturviṃśatisāhasraṃ nānā vṛttāntasaṃyutam ||
dharmārthakāmamokṣaiśca sādhuvṛttasamanvitam
||36||चतुर्विंशतिसाहस्रं नाना वृत्तान्तसंयुतम् ॥
धर्मार्थकाममोक्षैश्च साधुवृत्तसमन्वितम्
śrāvaṇyāṃ śrāvaṇe māsi guḍadhenusamanvitam ||
yo dadyāddadhisaṃyuktaṃ brāhmaṇāya kuṭumbine ||
śivaloke sa pūtātmā kalpamekaṃ vasennaraḥ
||37||श्रावण्यां श्रावणे मासि गुडधेनुसमन्वितम् ॥
यो दद्याद्दधिसंयुक्तं ब्राह्मणाय कुटुम्बिने ॥
शिवलोके स पूतात्मा कल्पमेकं वसेन्नरः
punaḥ saṃjāyate martyo brāhmaṇo vedavittamaḥ ||
vedavidyārthatattvajño vyākhyātattvārthavittamaḥ
||38||पुनः संजायते मर्त्यो ब्राह्मणो वेदवित्तमः ॥
वेदविद्यार्थतत्त्वज्ञो व्याख्यातत्त्वार्थवित्तमः
yatrādhikṛtya gāyatrīṃ varṇyate dharmavistaraḥ ||
vṛtrāsuravadhopetaṃ tadbhāgavatamucyate
||39||यत्राधिकृत्य गायत्रीं वर्ण्यते धर्मविस्तरः ॥
वृत्रासुरवधोपेतं तद्भागवतमुच्यते
sārasvatasya kalpasya madhye ye syurnarāmarāḥ ||
tadvṛttāntodbhavaṃ puṇyaṃ puṇyodvāhasamanvitam
||40||सारस्वतस्य कल्पस्य मध्ये ये स्युर्नरामराः ॥
तद्वृत्तान्तोद्भवं पुण्यं पुण्योद्वाहसमन्वितम्
likhitvā tacca yo dadyāddhemasiṃhasamanvitam ||
paurṇamāsyāṃ prauṣṭhapadyāṃ sa yāti paramāṃ gatim
||41||लिखित्वा तच्च यो दद्याद्धेमसिंहसमन्वितम् ॥
पौर्णमास्यां प्रौष्ठपद्यां स याति परमां गतिम्
aṣṭādaśasahasrāṇi purāṇaṃ tatprakīrtitam
||42||अष्टादशसहस्राणि पुराणं तत्प्रकीर्तितम्
yatrāha nārado dharmānbṛhatkalpāśrayāṃstviha ||
pañcaviṃśatsahasrāṇi nāradīyaṃ taducyate
||43||यत्राह नारदो धर्मान्बृहत्कल्पाश्रयांस्त्विह ॥
पञ्चविंशत्सहस्राणि नारदीयं तदुच्यते
tadiṣe pañcadaśyāṃ tu yo dadyāddhenusaṃyutam ||
uttamāṃ siddhimāpnoti iha loke paratra ca ||
sarvānkāmānavāpnoti nātra kāryā vicāraṇā
||44||तदिषे पञ्चदश्यां तु यो दद्याद्धेनुसंयुतम् ॥
उत्तमां सिद्धिमाप्नोति इह लोके परत्र च ॥
सर्वान्कामानवाप्नोति नात्र कार्या विचारणा
yatrādhikṛtya śakunīndharmādharmavicāraṇam ||
purāṇaṃ navasāhasraṃ mārkaṇḍeyaṃ taducyate
||45||यत्राधिकृत्य शकुनीन्धर्माधर्मविचारणम् ॥
पुराणं नवसाहस्रं मार्कण्डेयं तदुच्यते
parilikhya ca yo dadyātsauvarṇakarisaṃyutam ||
kārtikyāṃ pauṇḍarīkasya yajñasya phalabhāgbhavet
||46||परिलिख्य च यो दद्यात्सौवर्णकरिसंयुतम् ॥
कार्तिक्यां पौण्डरीकस्य यज्ञस्य फलभाग्भवेत्
yattadīśānakalpasya vṛttāntamadhikṛtya ca ||
vaśiṣṭhāyā'gninā proktamāgneyaṃ tatpracakṣate
||47||यत्तदीशानकल्पस्य वृत्तान्तमधिकृत्य च ॥
वशिष्ठायाऽग्निना प्रोक्तमाग्नेयं तत्प्रचक्षते
likhitvā tacca yo dadyāddhemapadmasamanvitam ||
mārgaśīrṣe vidhānena tiladhenuyutaṃ tathā ||
tacca ṣoḍaśasāhasraṃ sarvakratuphalapradam
||48||लिखित्वा तच्च यो दद्याद्धेमपद्मसमन्वितम् ॥
मार्गशीर्षे विधानेन तिलधेनुयुतं तथा ॥
तच्च षोडशसाहस्रं सर्वक्रतुफलप्रदम्
yatrādhikṛtya māhātmyamādityasya caturmukhaḥ ||
aghorakalpavṛttāntaprasaṃgena jagatpatiḥ ||
manave kathayāmāsa bhūtagrāmasya lakṣaṇam
||49||यत्राधिकृत्य माहात्म्यमादित्यस्य चतुर्मुखः ॥
अघोरकल्पवृत्तान्तप्रसंगेन जगत्पतिः ॥
मनवे कथयामास भूतग्रामस्य लक्षणम्
caturdaśasahasrāṇi tathā pañcaśatāni ca ||
bhaviṣyacaritaprāyaṃ bhaviṣyaṃ tadihocyate
||50||चतुर्दशसहस्राणि तथा पञ्चशतानि च ॥
भविष्यचरितप्रायं भविष्यं तदिहोच्यते
tatpauṣamāsi yo dadyātpaurṇamāsyāṃ vimatsaraḥ ||
guḍakumbhasamāyuktamagniṣṭomaphalaṃ labhet
||51||तत्पौषमासि यो दद्यात्पौर्णमास्यां विमत्सरः ॥
गुडकुम्भसमायुक्तमग्निष्टोमफलं लभेत्
rathaṃtarasya kalpasya vṛttāntamadhikṛtya ca ||
sāvarṇinā nāradāya kṛṣṇamāhātmyasaṃyutam ||
proktaṃ brahmavarāhasya caritaṃ varṇyate'tra ca
||52||रथंतरस्य कल्पस्य वृत्तान्तमधिकृत्य च ॥
सावर्णिना नारदाय कृष्णमाहात्म्यसंयुतम् ॥
प्रोक्तं ब्रह्मवराहस्य चरितं वर्ण्यतेऽत्र च
tadaṣṭādaśasāhasraṃ brahmavaivartamucyate ||
purāṇaṃ brahmavaivartaṃ yo dadyādbrāhmaṇottame ||
māghamāse paurṇamāsyāṃ brahmaloke mahīyate
||53||तदष्टादशसाहस्रं ब्रह्मवैवर्तमुच्यते ॥
पुराणं ब्रह्मवैवर्तं यो दद्याद्ब्राह्मणोत्तमे ॥
माघमासे पौर्णमास्यां ब्रह्मलोके महीयते
yatrāgniliṅgamadhyasthaḥ prāha devo maheśvaraḥ ||
dharmārthakāmamokṣārthānāgneyamadhikṛtya ca
||54||यत्राग्निलिङ्गमध्यस्थः प्राह देवो महेश्वरः ॥
धर्मार्थकाममोक्षार्थानाग्नेयमधिकृत्य च
kalpaṃ tallaiṅgamityuktaṃ purāṇaṃ brahmaṇā svayam
||55||कल्पं तल्लैङ्गमित्युक्तं पुराणं ब्रह्मणा स्वयम्
tadekādaśasāhasraṃ phālgunyāṃ yaḥ prayacchati ||
tiladhenusamāyuktaṃ sa yāti śivasātmyatām
||56||तदेकादशसाहस्रं फाल्गुन्यां यः प्रयच्छति ॥
तिलधेनुसमायुक्तं स याति शिवसात्म्यताम्
mahāvarāhasya punarmāhātmyamadhikṛtya ca ||
viṣṇunā'bhihitaṃ kṣoṇyai tadvārāhamihocyate
||57||महावराहस्य पुनर्माहात्म्यमधिकृत्य च ॥
विष्णुनाऽभिहितं क्षोण्यै तद्वाराहमिहोच्यते
mānavasya prasaṃgena dhanyasya munisattamāḥ ||
caturviṃśatsahasrāṇi tatpurāṇamihocyate
||58||मानवस्य प्रसंगेन धन्यस्य मुनिसत्तमाः ॥
चतुर्विंशत्सहस्राणि तत्पुराणमिहोच्यते
kāñcanaṃ garuḍaṃ kṛtvā tiladhenusamanvitam ||
paurṇamāsyāmatho dadyādbrāhmaṇāya kuṭumbine ||
vārāhasyaprasādena padamāpnoti vaiṣṇavam
||59||काञ्चनं गरुडं कृत्वा तिलधेनुसमन्वितम् ॥
पौर्णमास्यामथो दद्याद्ब्राह्मणाय कुटुम्बिने ॥
वाराहस्यप्रसादेन पदमाप्नोति वैष्णवम्
yatra māheśvarāndharmānadhikṛtya ca ṣaṇmukham ||
kalpe tatpuruṣe vṛtte caritairupabṛṃhitam
||6||यत्र माहेश्वरान्धर्मानधिकृत्य च षण्मुखम् ॥
कल्पे तत्पुरुषे वृत्ते चरितैरुपबृंहितम्
skāṃdaṃ nāma purāṇaṃ tadekāśīti nigadyate ||
sahasrāṇi śataṃ caikamiti martyeṣu paṭhyate
||61||स्कांदं नाम पुराणं तदेकाशीति निगद्यते ॥
सहस्राणि शतं चैकमिति मर्त्येषु पठ्यते
parilekhya ca yo dadyāddhemaśūlasamanvitam ||
śaivaṃ sa padamāpnoti makaropagame raveḥ
||62||परिलेख्य च यो दद्याद्धेमशूलसमन्वितम् ॥
शैवं स पदमाप्नोति मकरोपगमे रवेः
trivikramasya māhātmyamadhikṛtya caturmukhaḥ ||
trivargamabhyadhāttattu vāmanaṃ parikīrtitam
||63||त्रिविक्रमस्य माहात्म्यमधिकृत्य चतुर्मुखः ॥
त्रिवर्गमभ्यधात्तत्तु वामनं परिकीर्तितम्
purāṇaṃ daśasāhasraṃ kaurmakalpānugaṃ śivam
||64||पुराणं दशसाहस्रं कौर्मकल्पानुगं शिवम्
yaḥ śaradviṣuve dadyāddhemavastrasamanvitam ||
kṣaumāvṛtaṃ yutaṃ dhenvā sa padaṃ yāti vaiṣṇavam
||65||यः शरद्विषुवे दद्याद्धेमवस्त्रसमन्वितम् ॥
क्षौमावृतं युतं धेन्वा स पदं याति वैष्णवम्
yacca dharmārthakāmānāṃ mokṣasya ca rasātale ||
māhātmyaṃ kathayāmāsa kūrmarūpī janārdanaḥ
||66||यच्च धर्मार्थकामानां मोक्षस्य च रसातले ॥
माहात्म्यं कथयामास कूर्मरूपी जनार्दनः
indradyumnaprasaṃgena ṛṣīṇāṃ śakrasannidhau ||
saptadaśasahasrāṇi lakṣmīkalpānuṣaṅgikam
||67||इन्द्रद्युम्नप्रसंगेन ऋषीणां शक्रसन्निधौ ॥
सप्तदशसहस्राणि लक्ष्मीकल्पानुषङ्गिकम्
yo dadyādayane kaurmaṃ hemakūrmasamanvitam ||
gosahasrapradānasya sa phalaṃ prāpnuyānnaraḥ
||68||यो दद्यादयने कौर्मं हेमकूर्मसमन्वितम् ॥
गोसहस्रप्रदानस्य स फलं प्राप्नुयान्नरः
śrutīnāṃ yatra kalpādau pravṛttyarthaṃ janārdanaḥ ||
matsyarūpī ca manave narasiṃhopavarṇanam
||69||श्रुतीनां यत्र कल्पादौ प्रवृत्त्यर्थं जनार्दनः ॥
मत्स्यरूपी च मनवे नरसिंहोपवर्णनम्
adhikṛtyābravītsaptakalpavṛttaṃ munivratāḥ ||
tanmātsyamiti jānīdhvaṃ sahasrāṇi catudarśa
||70||अधिकृत्याब्रवीत्सप्तकल्पवृत्तं मुनिव्रताः ॥
तन्मात्स्यमिति जानीध्वं सहस्राणि चतुदर्श
viṣuve haimamatsyena dhenvā kṣaumayugānvitam ||
yo dadyātpṛthivī tena dattā bhavati cākhilā
||71||विषुवे हैममत्स्येन धेन्वा क्षौमयुगान्वितम् ॥
यो दद्यात्पृथिवी तेन दत्ता भवति चाखिला
yadā vā garuḍe kalpe viśvāṇḍādgaruḍo'bhavat ||
adhikṛtyābravītkṛṣṇo gāruḍaṃ tadihocyate
||72||यदा वा गरुडे कल्पे विश्वाण्डाद्गरुडोऽभवत् ॥
अधिकृत्याब्रवीत्कृष्णो गारुडं तदिहोच्यते
tadaṣṭādaśa caikaṃ ca sahasrāṇīha paṭhyate ||
svarṇahaṃsasamāyuktaṃ yo dadyādayane pare ||
sa siddhiṃ labhate mukhyāṃ śivaloke ca saṃsthitim
||73||तदष्टादश चैकं च सहस्राणीह पठ्यते ॥
स्वर्णहंससमायुक्तं यो दद्यादयने परे ॥
स सिद्धिं लभते मुख्यां शिवलोके च संस्थितिम्
brahmā brahmāṇḍamāhātmyamadhikṛtyābravītpunaḥ ||
tacca dvādaśasāhasraṃ brahmāṇḍaṃ dviśatādhikam
||74||ब्रह्मा ब्रह्माण्डमाहात्म्यमधिकृत्याब्रवीत्पुनः ॥
तच्च द्वादशसाहस्रं ब्रह्माण्डं द्विशताधिकम्
bhaviṣyāṇāṃ ca kalpānāṃ śrūyate yatra vistaraḥ ||
tadbrahmāṇḍaṃ purāṇaṃ tu brahmaṇā samudāhṛtam
||79||भविष्याणां च कल्पानां श्रूयते यत्र विस्तरः ॥
तद्ब्रह्माण्डं पुराणं तु ब्रह्मणा समुदाहृतम्
yo dadyāttu vyatīpāta ūrṇāyugasamanvitam ||
rājasūyasahasrasya phalamāpnoti mānavaḥ
||76||यो दद्यात्तु व्यतीपात ऊर्णायुगसमन्वितम् ॥
राजसूयसहस्रस्य फलमाप्नोति मानवः
hemadhenvāyutaṃ tacca brahmalokaphalapradam ||
caturlakṣamidaṃ proktaṃ vyāsenādbhutakarmaṇā
||77||हेमधेन्वायुतं तच्च ब्रह्मलोकफलप्रदम् ॥
चतुर्लक्षमिदं प्रोक्तं व्यासेनाद्भुतकर्मणा
idaṃ lokahitārthāya saṃkṣiptaṃ dvāpare dvijāḥ
||78||इदं लोकहितार्थाय संक्षिप्तं द्वापरे द्विजाः
idamadyāpi deveṣu śatakoṭipravistaram ||
upabhedānpravakṣyāmi loke ye saṃpratiṣṭhitāḥ
||79||इदमद्यापि देवेषु शतकोटिप्रविस्तरम् ॥
उपभेदान्प्रवक्ष्यामि लोके ये संप्रतिष्ठिताः
pādme purāṇe yatproktaṃ nārasiṃhopavarṇanam ||
taccāṣṭādaśasāhasraṃ nārasiṃhamihocyate
||80||पाद्मे पुराणे यत्प्रोक्तं नारसिंहोपवर्णनम् ॥
तच्चाष्टादशसाहस्रं नारसिंहमिहोच्यते
nandine yatra māhātmyaṃ kārtikeyena varṇitam ||
loke nandipurāṇaṃ vai khyātametaddvijottamāḥ
||81||नन्दिने यत्र माहात्म्यं कार्तिकेयेन वर्णितम् ॥
लोके नन्दिपुराणं वै ख्यातमेतद्द्विजोत्तमाः
yatra sāmbaṃ puraskṛtya bhaviṣyati kathānakam ||
procyate tatpunarloke sāṃbameva munivratāḥ
||82||यत्र साम्बं पुरस्कृत्य भविष्यति कथानकम् ॥
प्रोच्यते तत्पुनर्लोके सांबमेव मुनिव्रताः
evamādityasaṃjñaṃ tu tatraiva paripaṭhyate ||
aṣṭādaśabhyastu pṛthakpurāṇaṃ yacca dṛśyate ||
vijānīdhvaṃ dvijaśreṣṭhāstadetebhyo vinirgatam
||83||एवमादित्यसंज्ञं तु तत्रैव परिपठ्यते ॥
अष्टादशभ्यस्तु पृथक्पुराणं यच्च दृश्यते ॥
विजानीध्वं द्विजश्रेष्ठास्तदेतेभ्यो विनिर्गतम्
pañcāṅgāni purāṇasya cākhyānamitaratsmṛtam ||
sargaśca pratisargaśca vaṃśo manvantarāṇi ca ||
vaṃśānuvaṃśacaritaṃ purāṇaṃ pañcalakṣaṇam
||84||पञ्चाङ्गानि पुराणस्य चाख्यानमितरत्स्मृतम् ॥
सर्गश्च प्रतिसर्गश्च वंशो मन्वन्तराणि च ॥
वंशानुवंशचरितं पुराणं पञ्चलक्षणम्
brahmaviṣṇvarkarudrāṇāṃ māhātmyaṃ bhuvanasya ca ||
saṃhāraśca pradṛśyeta purāṇaṃ pañcalakṣaṇam
||85||ब्रह्मविष्ण्वर्करुद्राणां माहात्म्यं भुवनस्य च ॥
संहारश्च प्रदृश्येत पुराणं पञ्चलक्षणम्
dharmaścārthaśca kāmaśca mokṣaśca parikīrtyate ||
sarveṣvapi purāṇeṣu tadvirūḍhe ca yatphalam
||86||धर्मश्चार्थश्च कामश्च मोक्षश्च परिकीर्त्यते ॥
सर्वेष्वपि पुराणेषु तद्विरूढे च यत्फलम्
sātvikeṣu ca kalpeṣu māhātmyamadhikaṃ hareḥ ||
rājaseṣu ca māhātmyamadhikaṃ brahmaṇo viduḥ
||87||सात्विकेषु च कल्पेषु माहात्म्यमधिकं हरेः ॥
राजसेषु च माहात्म्यमधिकं ब्रह्मणो विदुः
tadvadagre ca māhātmyaṃ tāmaseṣu śivasya hi ||
saṃkīrṇe ca sarasvatyāḥ pitṝṇāṃ ca nigadyate
||88||तद्वदग्रे च माहात्म्यं तामसेषु शिवस्य हि ॥
संकीर्णे च सरस्वत्याः पितॄणां च निगद्यते
caturbhirbhagavānviṣṇurdvābhyāṃ brahmā tathā raviḥ ||
aṣṭādaśapurāṇeṣu śeṣeṣu bhagavāñchivaḥ
||89||चतुर्भिर्भगवान्विष्णुर्द्वाभ्यां ब्रह्मा तथा रविः ॥
अष्टादशपुराणेषु शेषेषु भगवाञ्छिवः
vedavanniścalaṃ manye purāṇaṃ vai dvijottamāḥ ||
vedāḥ pratiṣṭhitāḥ sarve purāṇe nātra saṃśayaḥ
||90||वेदवन्निश्चलं मन्ये पुराणं वै द्विजोत्तमाः ॥
वेदाः प्रतिष्ठिताः सर्वे पुराणे नात्र संशयः
bibhetyalpaśrutādvedo māmayaṃ cālayiṣyati ||
itihāsapurāṇaistu niścalo'yaṃ kṛtaḥ purā
||91||बिभेत्यल्पश्रुताद्वेदो मामयं चालयिष्यति ॥
इतिहासपुराणैस्तु निश्चलोऽयं कृतः पुरा
yanna dṛṣṭaṃ hi vedeṣu na dṛṣṭaṃ smṛtiṣu dvijāḥ ||
ubhayoryatra dṛṣṭaṃ ca tatpurāṇeṣu gīyate
||92||यन्न दृष्टं हि वेदेषु न दृष्टं स्मृतिषु द्विजाः ॥
उभयोर्यत्र दृष्टं च तत्पुराणेषु गीयते
yo veda caturo vedānsāṃgopaniṣado dvijaḥ ||
purāṇaṃ naiva jānāti na ca sa syādvicakṣaṇaḥ
||93||यो वेद चतुरो वेदान्सांगोपनिषदो द्विजः ॥
पुराणं नैव जानाति न च स स्याद्विचक्षणः
aṣṭādaśapurāṇāni kṛtvā satyavatīsutaḥ ||
bhāratākhyānamakarodvedārthairupabṛṃhitam
||94||अष्टादशपुराणानि कृत्वा सत्यवतीसुतः ॥
भारताख्यानमकरोद्वेदार्थैरुपबृंहितम्
lakṣeṇaikena tatproktaṃ dvāparānte mahātmanā ||
vālmīkinā ca yatproktaṃ rāmopākhyānamuttamam
||95||लक्षेणैकेन तत्प्रोक्तं द्वापरान्ते महात्मना ॥
वाल्मीकिना च यत्प्रोक्तं रामोपाख्यानमुत्तमम्
brahmaṇā vihitaṃ yacca śatakoṭipravistaram ||
āha tannāradāyaiva tena vālmīkaye punaḥ
||96||ब्रह्मणा विहितं यच्च शतकोटिप्रविस्तरम् ॥
आह तन्नारदायैव तेन वाल्मीकये पुनः
vālmīkinā ca loke tu dharmakāmārthasādhakam
||97||वाल्मीकिना च लोके तु धर्मकामार्थसाधकम्
evaṃ sapādāḥ pañcaite lakṣāḥ puṇyāḥ prakīrtitāḥ ||
purātanasya kalpasya purāṇe tu vidurbudhāḥ
||98||एवं सपादाः पञ्चैते लक्षाः पुण्याः प्रकीर्तिताः ॥
पुरातनस्य कल्पस्य पुराणे तु विदुर्बुधाः
itihāsapurāṇāni bhidyante kāla gauravāt ||
skāndaṃ tathā ca brahmāṇḍaṃ purāṇaṃ laiṅgameva ca
||99||इतिहासपुराणानि भिद्यन्ते काल गौरवात् ॥
स्कान्दं तथा च ब्रह्माण्डं पुराणं लैङ्गमेव च
vārāhakalpe viprendrāsteṣāṃ bhedaḥ pravartate ||
aṣṭādaśaprakāreṇa brahmāṇḍaṃ bhinnameva hi
||100||वाराहकल्पे विप्रेन्द्रास्तेषां भेदः प्रवर्तते ॥
अष्टादशप्रकारेण ब्रह्माण्डं भिन्नमेव हि
aṣṭādaśapurāṇāni tena jātāni bhūtale ||
laiṅgamekādaśavidhaṃ prabhinnaṃ dvāpare śubham
||101||अष्टादशपुराणानि तेन जातानि भूतले ॥
लैङ्गमेकादशविधं प्रभिन्नं द्वापरे शुभम्
skāndaṃ tu saptadhā bhinnaṃ veda vyāsenadhīmatā ||
ekāśītisahasrāṇi śataṃ caikaṃ tu saṃkhyayā
||102||स्कान्दं तु सप्तधा भिन्नं वेद व्यासेनधीमता ॥
एकाशीतिसहस्राणि शतं चैकं तु संख्यया
tasyā''dyo yo vibhāgastu skandamāhātmyasaṃyutaḥ ||
māheśvaraḥ samākhyāto dvitīyo vaiṣṇavaḥ smṛtaḥ
||103||तस्याऽऽद्यो यो विभागस्तु स्कन्दमाहात्म्यसंयुतः ॥
माहेश्वरः समाख्यातो द्वितीयो वैष्णवः स्मृतः
tṛtīyo brahmaṇaḥ proktaḥ sṛṣṭisaṃkṣepasūcakaḥ ||
kāśīmāhātmyasaṃyuktaścaturthaḥ paripaṭhyate
||104||तृतीयो ब्रह्मणः प्रोक्तः सृष्टिसंक्षेपसूचकः ॥
काशीमाहात्म्यसंयुक्तश्चतुर्थः परिपठ्यते
revāyāḥ pañcamo bhāgaḥ sojjayinyāḥ prakīrtitaḥ ||
ṣaṣṭhaḥ kalpo nāgaraśca tīrthamāhātmyasūcakaḥ
||105||रेवायाः पञ्चमो भागः सोज्जयिन्याः प्रकीर्तितः ॥
षष्ठः कल्पो नागरश्च तीर्थमाहात्म्यसूचकः
saptamo yo vibhāgo'yaṃ smṛtaḥ prābhāsiko dvijāḥ ||
sarve dvādaśasāhasrā vibhāgāḥ saṃprakīrtitāḥ
||106||सप्तमो यो विभागोऽयं स्मृतः प्राभासिको द्विजाः ॥
सर्वे द्वादशसाहस्रा विभागाः संप्रकीर्तिताः
asminprābhāsikaḥ sarvo varṇyate kṣetravistaraḥ ||
tīrthānāṃ caiva māhātmyaṃ māhātmyaṃ śaṃkarasya ca
||107||अस्मिन्प्राभासिकः सर्वो वर्ण्यते क्षेत्रविस्तरः ॥
तीर्थानां चैव माहात्म्यं माहात्म्यं शंकरस्य च
anyeṣāṃ caiva devānāṃ māhātmyaṃ ca prakīrtyate ||
iti bhedaḥ purāṇānāṃ saṃkṣepātkathito dvijāḥ
||108||अन्येषां चैव देवानां माहात्म्यं च प्रकीर्त्यते ॥
इति भेदः पुराणानां संक्षेपात्कथितो द्विजाः
imamaṣṭādaśānāṃ tu purāṇānāmanukramam ||
yaḥ paṭheddhavyakavyeṣu sa yāti bhavanaṃ hareḥ
||109||इममष्टादशानां तु पुराणानामनुक्रमम् ॥
यः पठेद्धव्यकव्येषु स याति भवनं हरेः
idaṃ pavitraṃ hi yaśonidhānamidaṃ pitṝṇāmapi vallabhaṃ ca ||
idaṃ ca deveṣvamṛtāya nityamidaṃ mahāpātakahṛcca puṃsām
||11||इदं पवित्रं हि यशोनिधानमिदं पितॄणामपि वल्लभं च ॥
इदं च देवेष्वमृताय नित्यमिदं महापातकहृच्च पुंसाम्
iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye sasaṃkhyākāṣṭādaśamahāpurāṇopapurāṇavarṇanapūrvaka purāṇapustakadānaphalavarṇanaṃ nāma dvitīyo'dhyāyaḥ || 2 ||