tato gacchenmahādevi liṃgaṃ śukrapratiṣṭhitam
īśvara uvāca
tato gacchenmahādevi liṃgaṃ śukrapratiṣṭhitam ||
sarvapāpaharaṃ devi vibhūtīśvarapaścime
||1||ततो गच्छेन्महादेवि लिंगं शुक्रप्रतिष्ठितम् ॥
सर्वपापहरं देवि विभूतीश्वरपश्चिमे
nātidūre sthitaṃ tatra svayaṃ śukreṇa nirmitam ||
yatra saṃjīvanīṃ prāpto vidyāṃ rudraprabhāvataḥ
||2||नातिदूरे स्थितं तत्र स्वयं शुक्रेण निर्मितम् ॥
यत्र संजीवनीं प्राप्तो विद्यां रुद्रप्रभावतः
saṃtapya tu mahāghoraṃ tapovarṣasahasrakam ||
saṃprasādya virūpākṣaṃ yo'vāpa grahatāṃ sudhīḥ
||3||संतप्य तु महाघोरं तपोवर्षसहस्रकम् ॥
संप्रसाद्य विरूपाक्षं योऽवाप ग्रहतां सुधीः
grastena śaṃbhunā yena devakāryārthasiddhaye ||
tatrodaragatenaiva tapastaptaṃ suduṣkaram
||4||ग्रस्तेन शंभुना येन देवकार्यार्थसिद्धये ॥
तत्रोदरगतेनैव तपस्तप्तं सुदुष्करम्
varṣāṇāmayutaṃ sāgraṃ tuṣṭiṃ nīto maheśvaraḥ ||
niṣkāsitastataḥ śīghraṃ śukra mārgeṇa śaṃbhunā
||5||वर्षाणामयुतं साग्रं तुष्टिं नीतो महेश्वरः ॥
निष्कासितस्ततः शीघ्रं शुक्र मार्गेण शंभुना
tataḥ śukreti nāmābhūdbhārgavasya mahātmanaḥ ||
tadārādhayate liṃgaṃ yaḥ kṛtvā niścalaṃ manaḥ
||6||ततः शुक्रेति नामाभूद्भार्गवस्य महात्मनः ॥
तदाराधयते लिंगं यः कृत्वा निश्चलं मनः
mṛtyuṃjayaṃ japellakṣaṃ sa samīhitamāpnuyāt
||7||मृत्युंजयं जपेल्लक्षं स समीहितमाप्नुयात्
taṃ dṛṣṭvā tvathavā spṛṣṭvā janmādimaraṇāntakāt ||
mucyate pātakānmṛtyoḥ prasādāttasya bhāmini
||8||तं दृष्ट्वा त्वथवा स्पृष्ट्वा जन्मादिमरणान्तकात् ॥
मुच्यते पातकान्मृत्योः प्रसादात्तस्य भामिनि
mṛtasaṃjīvanārthaṃ yadaiśvaryamaṇimādikam ||
prāpnuyānnātra saṃdeho yasya bhaktiḥ suniścalā
||9||मृतसंजीवनार्थं यदैश्वर्यमणिमादिकम् ॥
प्राप्नुयान्नात्र संदेहो यस्य भक्तिः सुनिश्चला
paṃcāmṛtena saṃsnāpya devaṃ śukapratiṣṭhitam ||
sugandhapuṣpaiḥ saṃpūjya śaukrīṃ pīḍāṃ sa nāpnuyāt
||10||पंचामृतेन संस्नाप्य देवं शुकप्रतिष्ठितम् ॥
सुगन्धपुष्पैः संपूज्य शौक्रीं पीडां स नाप्नुयात्
iti sarvaṃ samāsena māhātmyaṃ śukradaivatam ||
kathitaṃ tava suśroṇi śrutaṃ pāpabhayāpaham
||11||इति सर्वं समासेन माहात्म्यं शुक्रदैवतम् ॥
कथितं तव सुश्रोणि श्रुतं पापभयापहम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śukreśvaramāhātmyavarṇanaṃnāmāṣṭacatvāriṃśodhyāyaḥ || 48 ||