tato gacchenmahādevi mahāprabhāsamuttamam
īśvara uvāca
tato gacchenmahādevi mahāprabhāsamuttamam ||
jalaprabhāsato yāmye yamamārgavighātakam
||1||ततो गच्छेन्महादेवि महाप्रभासमुत्तमम् ॥
जलप्रभासतो याम्ये यममार्गविघातकम्
śṛṇu tasyaiva māhātmyaṃ yathā jātaṃ dharātale
||2||शृणु तस्यैव माहात्म्यं यथा जातं धरातले
pūrvaṃ tretāyuge devi sparśaliṃgaṃ tu tatsmṛtam ||
divyaṃ tejomayaṃ nṛṇāṃ sparśanānmuktidāyakam
||3||पूर्वं त्रेतायुगे देवि स्पर्शलिंगं तु तत्स्मृतम् ॥
दिव्यं तेजोमयं नृणां स्पर्शनान्मुक्तिदायकम्
atha kāle ca kasmiṃścidvajriṇācchāditaṃ priye ||
indreṇāgatya vasudhāṃ bhayākrāṃtena sundari
||4||अथ काले च कस्मिंश्चिद्वज्रिणाच्छादितं प्रिये ॥
इन्द्रेणागत्य वसुधां भयाक्रांतेन सुन्दरि
uṣmā tadudbhavo devi nirgacchannavarodhitaḥ ||
daśakoṭipravistīrṇaṃ jvālāgraṃ liṃgarūpadhṛk
||5||उष्मा तदुद्भवो देवि निर्गच्छन्नवरोधितः ॥
दशकोटिप्रविस्तीर्णं ज्वालाग्रं लिंगरूपधृक्
prabhāsakṣetramāsthāya bhittvā''virbhāvamāsthitam ||
vajreṇa ruṃdhite devi bhittvā caiva vasuṃdharām
||6||प्रभासक्षेत्रमास्थाय भित्त्वाऽऽविर्भावमास्थितम् ॥
वज्रेण रुंधिते देवि भित्त्वा चैव वसुंधराम्
dhūmasaṃghaiḥ sametaṃ tu vyāpayāmāsa tajjagat ||
tatastrailokyamakhilaṃ jvālābhirvyākulīkṛtam
||7||धूमसंघैः समेतं तु व्यापयामास तज्जगत् ॥
ततस्त्रैलोक्यमखिलं ज्वालाभिर्व्याकुलीकृतम्
tataḥ suragaṇāḥ sarva ṛṣayo vedapāragāḥ ||
astuvanvividhaiḥ sūktairvedoktaiḥ śaśiśekharam
||8||ततः सुरगणाः सर्व ऋषयो वेदपारगाः ॥
अस्तुवन्विविधैः सूक्तैर्वेदोक्तैः शशिशेखरम्
saṃharasva suraśreṣṭha tejaḥ svadahanātmakam ||
trai lokyaṃ vyākulībhūtamevaṃ sarvaṃ carācaram ||
na yāvatpralayaṃ yāti tāvadrakṣa sureśvara
||9||संहरस्व सुरश्रेष्ठ तेजः स्वदहनात्मकम् ॥
त्रै लोक्यं व्याकुलीभूतमेवं सर्वं चराचरम् ॥
न यावत्प्रलयं याति तावद्रक्ष सुरेश्वर
īśvara uvāca
evamābhāṣamāṇeṣu tridiveṣu sureśvari ||
tattejaḥ pañcadhāviṣṭaṃ vyāpyāśeṣaṃ jagattrayam
||10||एवमाभाषमाणेषु त्रिदिवेषु सुरेश्वरि ॥
तत्तेजः पञ्चधाविष्टं व्याप्याशेषं जगत्त्रयम्
pañcaprabhāsarūpeṇa bhittvā tatra vasundharām ||
yena mārgeṇa niṣkrāntaṃ tanmārge ca mahanmahaḥ
||11||पञ्चप्रभासरूपेण भित्त्वा तत्र वसुन्धराम् ॥
येन मार्गेण निष्क्रान्तं तन्मार्गे च महन्महः
tatra taiḥ sthāpitaṃ dvāraṃ supradeśe'śmajaṃ priye ||
pihite'tha ca raṃdhre'smindhūmo nāśamupeyivān
||12||तत्र तैः स्थापितं द्वारं सुप्रदेशेऽश्मजं प्रिये ॥
पिहितेऽथ च रंध्रेऽस्मिन्धूमो नाशमुपेयिवान्
svasthāścaivābhavam̐llokāstejastatraiva saṃsthitam ||
evaṃ mayā preritāste liṃgaṃ tatra samādadhuḥ
||13||स्वस्थाश्चैवाभवँल्लोकास्तेजस्तत्रैव संस्थितम् ॥
एवं मया प्रेरितास्ते लिंगं तत्र समादधुः
tanmahastatra deveśi viśrāmamakarottadā ||
tato mahāprabhāseti kīrtyate devadānavaiḥ
||14||तन्महस्तत्र देवेशि विश्राममकरोत्तदा ॥
ततो महाप्रभासेति कीर्त्यते देवदानवैः
yastaṃ pūjayate bhaktyā liṃgaṃ puṣpaiḥ pṛthagvidhaiḥ ||
sa yāti paramaṃ sthānaṃ jarāmaraṇavarjitam
||15||यस्तं पूजयते भक्त्या लिंगं पुष्पैः पृथग्विधैः ॥
स याति परमं स्थानं जरामरणवर्जितम्
dṛṣṭena tena deveśi mucyate pātakairnaraḥ ||
labhate vāñchitānkāmānmanasā cepsitānpriye
||16||दृष्टेन तेन देवेशि मुच्यते पातकैर्नरः ॥
लभते वाञ्छितान्कामान्मनसा चेप्सितान्प्रिये
hiraṇyaṃ tatra dātavyaṃ brāhmaṇe śaṃsitavrate ||
godānaṃ vidhivattatra deyaṃ caiva dvijanmane
||17||हिरण्यं तत्र दातव्यं ब्राह्मणे शंसितव्रते ॥
गोदानं विधिवत्तत्र देयं चैव द्विजन्मने
evaṃ kṛtvā mahādevi labhate janmanaḥ phalam ||
rājasūyāśvamedhānāṃ prāpnuyātphalamūrjitam
||18||एवं कृत्वा महादेवि लभते जन्मनः फलम् ॥
राजसूयाश्वमेधानां प्राप्नुयात्फलमूर्जितम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye pañcamaprabhāsakṣetramāhātmyavarṇanaṃnāmāṣṭānavatyuttaraśatatamo'dhyāyaḥ || 198 ||