śākalyeśvaramāhātmyavarṇanam
īśvara uvāca
tato gacchenmahādevi śākalyeśvaramuttamam ||
daityasūdanavāyavye dhanuṣāṃ triṃśatā sthitam
||1||ततो गच्छेन्महादेवि शाकल्येश्वरमुत्तमम् ॥
दैत्यसूदनवायव्ये धनुषां त्रिंशता स्थितम्
śākalyena mahādevi pūjitaṃ sarvakāmadam ||
śākalyonāma rājarṣiryatra taptvā mahattapaḥ
||2||शाकल्येन महादेवि पूजितं सर्वकामदम् ॥
शाकल्योनाम राजर्षिर्यत्र तप्त्वा महत्तपः
samārādhya mahādevaṃ pratyakṣīkṛtavānbhavam ||
liṃge'vatārayāmāsa prasannaṃ taṃ maheśvaram
||3||समाराध्य महादेवं प्रत्यक्षीकृतवान्भवम् ॥
लिंगेऽवतारयामास प्रसन्नं तं महेश्वरम्
tasmindṛṣṭe varārohe saptajanmakṛtaṃ nṛṇām ||
pāpaṃ praṇaśyate śīghraṃ tamaḥ sūryodaye yathā
||4||तस्मिन्दृष्टे वरारोहे सप्तजन्मकृतं नृणाम् ॥
पापं प्रणश्यते शीघ्रं तमः सूर्योदये यथा
tatrāṣṭamyāṃ caturddaśyāṃ snāpayetpayasā śivam ||
pūjayecca vidhānena gandhapuṣpādibhiḥ kramāt
||5||तत्राष्टम्यां चतुर्द्दश्यां स्नापयेत्पयसा शिवम् ॥
पूजयेच्च विधानेन गन्धपुष्पादिभिः क्रमात्
hiraṇyaṃ tatra dātavyaṃ samyagyātrāphalepsubhiḥ ||
catvāri tasya nāmāni kathyamānāni me śṛṇu
||6||हिरण्यं तत्र दातव्यं सम्यग्यात्राफलेप्सुभिः ॥
चत्वारि तस्य नामानि कथ्यमानानि मे शृणु
ādau kṛtayuge devi kīrtito bhairaveśvaraḥ ||
tataḥ sāvarṇimanunā samyagārādhitaḥ priye
||7||आदौ कृतयुगे देवि कीर्तितो भैरवेश्वरः ॥
ततः सावर्णिमनुना सम्यगाराधितः प्रिये
sāvarṇikeśvaraṃ nāma tretāyāṃ tasya saṃjñitam ||
tatastu dvāpare devi gālavena mahātmanā ||
samyagārādhitastatra liṃgarūpīvṛṣadhvajaḥ
||8||सावर्णिकेश्वरं नाम त्रेतायां तस्य संज्ञितम् ॥
ततस्तु द्वापरे देवि गालवेन महात्मना ॥
सम्यगाराधितस्तत्र लिंगरूपीवृषध्वजः
tṛtīyaṃ tasya devasya gālaveśvarasaṃjñitam ||
kalau yuge tu saṃprāpte śākalyonāma vai muniḥ
||9||तृतीयं तस्य देवस्य गालवेश्वरसंज्ञितम् ॥
कलौ युगे तु संप्राप्ते शाकल्योनाम वै मुनिः
yatra siddhimanuprāpta aiśvaryaṃ cāṇimādikam ||
śākalyeśvaranāmeti tataḥ khyātaṃ turīyakam
||10||यत्र सिद्धिमनुप्राप्त ऐश्वर्यं चाणिमादिकम् ॥
शाकल्येश्वरनामेति ततः ख्यातं तुरीयकम्
evaṃ cāturyugaṃ nāma tasya liṃgasya kīrtitam ||
pāpaghnaṃ puṇyadaṃ nṝṇāṃ kīrttitaṃ sarvakāmadam
||11||एवं चातुर्युगं नाम तस्य लिंगस्य कीर्तितम् ॥
पापघ्नं पुण्यदं नॄणां कीर्त्तितं सर्वकामदम्
tasyaiva devadevasya kṣetrotpattiṃ śṛṇu priye
||12||तस्यैव देवदेवस्य क्षेत्रोत्पत्तिं शृणु प्रिये
aṣṭādaśadhanurdevi samaṃtātparimaṇḍalam ||
mahāpāpaharaṃ devi tatra kṣetranivāsinām
||13||अष्टादशधनुर्देवि समंतात्परिमण्डलम् ॥
महापापहरं देवि तत्र क्षेत्रनिवासिनाम्
kṛmikīṭapataṃgānāṃ tiraścāmapi mokṣadam ||
yatra kūpāditoyeṣu jalaṃ sārasvataṃ smṛtam
||14||कृमिकीटपतंगानां तिरश्चामपि मोक्षदम् ॥
यत्र कूपादितोयेषु जलं सारस्वतं स्मृतम्
yatra tatra naraḥ snātvā svargaloke mahīyate ||
aśvamedhasahasrasya vājapeyaśatasya ca
||15||यत्र तत्र नरः स्नात्वा स्वर्गलोके महीयते ॥
अश्वमेधसहस्रस्य वाजपेयशतस्य च
tatphalaṃ samavāpnoti tasya liṃgasya darśanāt ||
somaparvaṇi saṃprāpte yastatra śucirātmavān
||16||तत्फलं समवाप्नोति तस्य लिंगस्य दर्शनात् ॥
सोमपर्वणि संप्राप्ते यस्तत्र शुचिरात्मवान्
aghoraṃ ca japetsamyagājyahomasamanvitam ||
talliṃgasya samīpastho yāvanmāsāvadhiḥ priye
||17||अघोरं च जपेत्सम्यगाज्यहोमसमन्वितम् ॥
तल्लिंगस्य समीपस्थो यावन्मासावधिः प्रिये
mahāpātakayukto'pi yukto vā'pyupapātakaiḥ ||
sa sarvāṃ labhate siddhimuttamāṃ varavarṇini
||18||महापातकयुक्तोऽपि युक्तो वाऽप्युपपातकैः ॥
स सर्वां लभते सिद्धिमुत्तमां वरवर्णिनि
kāmikaṃ tatsmṛtaṃ liṃgaṃ sarvakāmaphalapradam ||
aghora vaktraṃ devasya tatrasthaṃ bhairavaṃ mahat
||19||कामिकं तत्स्मृतं लिंगं सर्वकामफलप्रदम् ॥
अघोर वक्त्रं देवस्य तत्रस्थं भैरवं महत्
bhairaveśvaranāmeti pūrvaṃ khyātamabhūdbhuvi ||
asminyuge tu saṃprāpte śākalyeśvaranāmakam
||20||भैरवेश्वरनामेति पूर्वं ख्यातमभूद्भुवि ॥
अस्मिन्युगे तु संप्राप्ते शाकल्येश्वरनामकम्
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śākalyeśvaramāhātmyavarṇanaṃnāma catuḥsaptatitamo'dhyāyaḥ || 74 ||