karṇotpalātīrthamāhātmyavarṇanam
ṛṣaya ūcuḥ
yā sā karṇotpalānāma tvayāsmākaṃ prakīrtitā ||
kiñcijjalāśrayaṃ prāpya tapastapati saṃsthitā ||
tasyāḥ sarvaṃ samācakṣva yathā tapasi sā sthitā
||1||या सा कर्णोत्पलानाम त्वयास्माकं प्रकीर्तिता ॥
किञ्चिज्जलाश्रयं प्राप्य तपस्तपति संस्थिता ॥
तस्याः सर्वं समाचक्ष्व यथा तपसि सा स्थिता
sūta uvāca
gaurīpādakṛtasthānā śraddhayā parayā yutā ||
tāvattuṣṭiṃ gatā devī girijā śaṃkarapriyā
||2||गौरीपादकृतस्थाना श्रद्धया परया युता ॥
तावत्तुष्टिं गता देवी गिरिजा शंकरप्रिया
tataḥ provāca te putri tuṣṭāhaṃ vāṃchitaṃ vada ||
yena yacchāmyasaṃdigdhaṃ yadyapi syātsudurlabham
||3||ततः प्रोवाच ते पुत्रि तुष्टाहं वांछितं वद ॥
येन यच्छाम्यसंदिग्धं यद्यपि स्यात्सुदुर्लभम्
karṇotpalovāca
mama patyuḥ kṛte devi mama tātaḥ suduḥkhitaḥ ||
rājyādbhraṣṭaḥ sukhāccāpi kuṭuṃbena vivarjitaḥ ||
tataścaiva tapastepe vairāgyaṃ paramaṃ gataḥ ||
ahaṃ vārddhakyamāpannā kaumārye'pi ca saṃsthitā
||5||मम पत्युः कृते देवि मम तातः सुदुःखितः ॥
राज्याद्भ्रष्टः सुखाच्चापि कुटुंबेन विवर्जितः ॥
ततश्चैव तपस्तेपे वैराग्यं परमं गतः ॥
अहं वार्द्धक्यमापन्ना कौमार्येऽपि च संस्थिता
tasmādbhavatu me bharttā kaścidrūpotkaṭaḥ smṛtaḥ ||
sarveṣāṃ devamartyānāṃ tvatprasādātsureśvari
||6||तस्माद्भवतु मे भर्त्ता कश्चिद्रूपोत्कटः स्मृतः ॥
सर्वेषां देवमर्त्यानां त्वत्प्रसादात्सुरेश्वरि
tathā syātparamaṃ rūpaṃ tāruṇyaṃ tvatprasādataḥ ||
yathāsya jāyate saukhyaṃ tāpasasyāpi me pituḥ
||7||तथा स्यात्परमं रूपं तारुण्यं त्वत्प्रसादतः ॥
यथास्य जायते सौख्यं तापसस्यापि मे पितुः
devyuvāca
māghamāsatṛtīyāyāṃ śanaiścaradine śubhe ||
nakṣatre vasudaivatye rūpaṃ dhyātvātha yauvanam
||8||माघमासतृतीयायां शनैश्चरदिने शुभे ॥
नक्षत्रे वसुदैवत्ये रूपं ध्यात्वाथ यौवनम्
tvayā snānaṃ prakartavyaṃ supuṇye'tra jalāśaye ||
tato divya vapurbhūtvā yauvanena samanvitā|
bhaviṣyasi na saṃdehaḥ satyametanmayoditam
||9||त्वया स्नानं प्रकर्तव्यं सुपुण्येऽत्र जलाशये ॥
ततो दिव्य वपुर्भूत्वा यौवनेन समन्विता।
भविष्यसि न संदेहः सत्यमेतन्मयोदितम्
anyāpi yā mahābhāge nārī snānaṃ kariṣyati ||
tasminnahani sāpyevaṃ rūpayuktā bhaviṣyati ||
sūta uvāca ||
evamuktvātha sā devī gatā cādarśanaṃ tataḥ ||
sāpi cānveṣayāmāsa tṛtīyāṃ śaninā saha
||11||अन्यापि या महाभागे नारी स्नानं करिष्यति ॥
तस्मिन्नहनि साप्येवं रूपयुक्ता भविष्यति ॥
सूत उवाच ॥
एवमुक्त्वाथ सा देवी गता चादर्शनं ततः ॥
सापि चान्वेषयामास तृतीयां शनिना सह
vasudevātmakenaiva nakṣatreṇa prayatnataḥ ||
dhyāyamānā ca tāṃ devīṃ sarvakāmapradāyinīm
||12||वसुदेवात्मकेनैव नक्षत्रेण प्रयत्नतः ॥
ध्यायमाना च तां देवीं सर्वकामप्रदायिनीम्
tataḥ katipayāhasya jātā sā yogasaṃyutā ||
tṛtīyā yā yathoktā ca tayā devyā purā dvijāḥ
||13||ततः कतिपयाहस्य जाता सा योगसंयुता ॥
तृतीया या यथोक्ता च तया देव्या पुरा द्विजाः
tataḥ sā rūpasaubhāgyaṃ yauvanaṃ vāṃchitaṃ patim ||
dhyāyamānā jale tasminnarddharātre viveśa ca
||14||ततः सा रूपसौभाग्यं यौवनं वांछितं पतिम् ॥
ध्यायमाना जले तस्मिन्नर्द्धरात्रे विवेश च
tato divyavapurbhūtvā yauvanena samanvitā ||
niṣkrāṃtā salilāttasmājjanavismayakāriṇī
||15||ततो दिव्यवपुर्भूत्वा यौवनेन समन्विता ॥
निष्क्रांता सलिलात्तस्माज्जनविस्मयकारिणी
etasminnaṃtare prāpto gaurīvākyaprabodhitaḥ ||
tadarthaṃ bhagavānkāmaḥ patnyarthaṃ prītisaṃyutaḥ ||
abravīcca mahābhāge kāmohaṃ svayamāgataḥ
||16||एतस्मिन्नंतरे प्राप्तो गौरीवाक्यप्रबोधितः ॥
तदर्थं भगवान्कामः पत्न्यर्थं प्रीतिसंयुतः ॥
अब्रवीच्च महाभागे कामोहं स्वयमागतः
pārvatyādeśitā bhāryā tasmānme bhava mā ciram
||17||पार्वत्यादेशिता भार्या तस्मान्मे भव मा चिरम्
yasmātprītyā samāyātastavāṃtikamahaṃ śubhe ||
tasmātprītiriti khyātā mama bhāryā bhaviṣyasi
||18||यस्मात्प्रीत्या समायातस्तवांतिकमहं शुभे ॥
तस्मात्प्रीतिरिति ख्याता मम भार्या भविष्यसि
karṇotpalovāca
yadyevaṃ smara mattātaṃ taṃ gatvā prārthaya svayam ||
svacchaṃdā syādyataḥ kanyā na kathaṃcitpravartitā
||19||यद्येवं स्मर मत्तातं तं गत्वा प्रार्थय स्वयम् ॥
स्वच्छंदा स्याद्यतः कन्या न कथंचित्प्रवर्तिता
ya eṣa dṛśyate ramyaḥ prāsādo nāti dūrataḥ ||
asyāṃte tiṣṭhate'smākaṃ tātastapasi saṃsthitaḥ
||20||य एष दृश्यते रम्यः प्रासादो नाति दूरतः ॥
अस्यांते तिष्ठतेऽस्माकं तातस्तपसि संस्थितः
atrāhaṃ pūrvato gatvā tasya tiṣṭhāmi cāṃtike ||
bhavānāgatya paścācca prārthayiṣyati māṃ tataḥ
||21||अत्राहं पूर्वतो गत्वा तस्य तिष्ठामि चांतिके ॥
भवानागत्य पश्चाच्च प्रार्थयिष्यति मां ततः
bāḍhamityeva kāmokte gatā sā tatsamīpataḥ ||
praṇipatya tataḥ prāha diṣṭyā tāta mayā punaḥ
||22||बाढमित्येव कामोक्ते गता सा तत्समीपतः ॥
प्रणिपत्य ततः प्राह दिष्ट्या तात मया पुनः
saṃprāptaṃ yauvanaṃ kāṃtaṃ samārādhya harapriyām ||
tasmātkuru vivāhaṃ me hṛtsthaṃ sukhamavāpnuhi
||23||संप्राप्तं यौवनं कांतं समाराध्य हरप्रियाम् ॥
तस्मात्कुरु विवाहं मे हृत्स्थं सुखमवाप्नुहि
madarthe preṣito bharttā tayā devyā'tisundaraḥ ||
puṣpa cāpaḥ svayaṃ prāptaḥ so'pi tāta tavāṃtikam
||24||मदर्थे प्रेषितो भर्त्ता तया देव्याऽतिसुन्दरः ॥
पुष्प चापः स्वयं प्राप्तः सोऽपि तात तवांतिकम्
atha tāṃ sa samālokya svāṃ sutāṃ yauvanānvitām ||
harṣeṇa mahatā yuktāṃ kāṃtayuktāṃ viśeṣataḥ ||
abravīdadya me putri saṃjātaṃ tapasaḥ phalam
||25||अथ तां स समालोक्य स्वां सुतां यौवनान्विताम् ॥
हर्षेण महता युक्तां कांतयुक्तां विशेषतः ॥
अब्रवीदद्य मे पुत्रि संजातं तपसः फलम्
jīvitasya ca kalyāṇi yatvaṃ prāptā navaṃ vayaḥ ||
bhartāraṃ ca tathābhīṣṭaṃ devyā dattaṃ manobhavam
||26||जीवितस्य च कल्याणि यत्वं प्राप्ता नवं वयः ॥
भर्तारं च तथाभीष्टं देव्या दत्तं मनोभवम्
etasminnaṃtare kāmastasyāṃtikamupādravat ||
abravīddehi me bhūpa svāṃ kanyāṃ cāruhāsinīm
||27||एतस्मिन्नंतरे कामस्तस्यांतिकमुपाद्रवत् ॥
अब्रवीद्देहि मे भूप स्वां कन्यां चारुहासिनीम्
asyā arthe'hamādiṣṭaḥ svayaṃ gauryā nṛpottama ||
kāmadeva iti khyātastrailokyaṃ yena mohitam
||28||अस्या अर्थेऽहमादिष्टः स्वयं गौर्या नृपोत्तम ॥
कामदेव इति ख्यातस्त्रैलोक्यं येन मोहितम्
tatastāmarpayāmāsa tāṃ kanyāṃ sa mahīpatiḥ ||
kṛtvāgniṃ sākṣiṇaṃ vākyādbrāhmaṇānāṃ dvijottamāḥ
||29||ततस्तामर्पयामास तां कन्यां स महीपतिः ॥
कृत्वाग्निं साक्षिणं वाक्याद्ब्राह्मणानां द्विजोत्तमाः
sā cāsya cābhavatprītisthānaṃ yasmātsulocanā ||
rateranaṃtarā tasmātprītināmā'bhavacchubhā
||30||सा चास्य चाभवत्प्रीतिस्थानं यस्मात्सुलोचना ॥
रतेरनंतरा तस्मात्प्रीतिनामाऽभवच्छुभा
evaṃ tayā tapastaptaṃ tasmāttatra jalāśaye ||
tannāmnā khyātimāyātaṃ samaste'tra mahītale
||31||एवं तया तपस्तप्तं तस्मात्तत्र जलाशये ॥
तन्नाम्ना ख्यातिमायातं समस्तेऽत्र महीतले
sakalaṃ māghamāsaṃ ca yā strī snānaṃ samācaret ||
pumānvā prātarutthāya sa prayāgaphalaṃ labhet
||32||सकलं माघमासं च या स्त्री स्नानं समाचरेत् ॥
पुमान्वा प्रातरुत्थाय स प्रयागफलं लभेत्
rūpavāñjāyate dakṣaḥ sadā janmani janmani ||
na viyogamavāpnoti kadātridbāṃdhavaiḥ saha
||33||रूपवाञ्जायते दक्षः सदा जन्मनि जन्मनि ॥
न वियोगमवाप्नोति कदात्रिद्बांधवैः सह
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye karṇotpalātīrthamāhātmyavarṇanaṃ nāma saptaviṃśatyuttaraśatatamo'dhyāyaḥ || 127 ||