tīrthotpattimāhātmyavarṇanam
sūta uvāca
evaṃ kratuḥ sa saṃjātaḥ pañcarātraṃ dvijottamāḥ ||
hāṭakeśvaraje kṣetre sarvakāma samṛddhimān
||1||एवं क्रतुः स संजातः पञ्चरात्रं द्विजोत्तमाः ॥
हाटकेश्वरजे क्षेत्रे सर्वकाम समृद्धिमान्
viprāṃśca bhikṣukāṃścaiva dīnāṃdhāṃśca viśeṣataḥ ||
samāptau tasya yajñasya saṃtarpya sakalāṃstataḥ ||
ṛtvijo dakṣiṇābhistānyathoktāndvijasattamān
||2||विप्रांश्च भिक्षुकांश्चैव दीनांधांश्च विशेषतः ॥
समाप्तौ तस्य यज्ञस्य संतर्प्य सकलांस्ततः ॥
ऋत्विजो दक्षिणाभिस्तान्यथोक्तान्द्विजसत्तमान्
tataḥ sa cānayāmāsa nāgarānbrāhmaṇottamān ||
cātuścaraṇasaṃpannāñchrutismṛti samanvitān
||3||ततः स चानयामास नागरान्ब्राह्मणोत्तमान् ॥
चातुश्चरणसंपन्नाञ्छ्रुतिस्मृति समन्वितान्
kṛtāṃjalipuṭo bhūtvā tatastānprāha sādaram ||
yadbhūmau tu mayā tīrthaṃ puṣkaraṃ saṃniveśitam
||4||कृतांजलिपुटो भूत्वा ततस्तान्प्राह सादरम् ॥
यद्भूमौ तु मया तीर्थं पुष्करं संनिवेशितम्
kalikālasya bhītena dvitīyaṃ brāhmaṇottamāḥ ||
yena no nāśamabhyeti mlecchairapi samāśritam
||5||कलिकालस्य भीतेन द्वितीयं ब्राह्मणोत्तमाः ॥
येन नो नाशमभ्येति म्लेच्छैरपि समाश्रितम्
hāṭakeśvaradevasya prabhāvena mahātmanaḥ ||
kalikāle ca samprāpte tīrthānyāyatanāni ca
||6||हाटकेश्वरदेवस्य प्रभावेन महात्मनः ॥
कलिकाले च सम्प्राप्ते तीर्थान्यायतनानि च
mlecchaiḥ spṛṣṭānyasaṃdigdhaṃ prayāgādīni kṛtsnaśaḥ ||
yajñastu vihitastena bhayāyaṃ tatkṛtena ca
||7||म्लेच्छैः स्पृष्टान्यसंदिग्धं प्रयागादीनि कृत्स्नशः ॥
यज्ञस्तु विहितस्तेन भयायं तत्कृतेन च
tasmādvadatha kiṃ dānaṃ yuṣmadbhūmeśca niṣkraye ||
prayacchāmi ca yajñasya yena me syātphalaṃ dvijāḥ
||8||तस्माद्वदथ किं दानं युष्मद्भूमेश्च निष्क्रये ॥
प्रयच्छामि च यज्ञस्य येन मे स्यात्फलं द्विजाः
brāhmaṇā ūcuḥ
yadi yacchasi cāsmākaṃ dakṣiṇāṃ yajñasaṃbhavām ||
tadasmākaṃ svavāsena sthānaṃ naya pavitratām
||9||यदि यच्छसि चास्माकं दक्षिणां यज्ञसंभवाम् ॥
तदस्माकं स्ववासेन स्थानं नय पवित्रताम्
yadetadbhavatā cātra puṣkaraṃ tīrthamuttamam ||
sthāpitaṃ tasya no brūhi māhātmyaṃ surasattama ||
yena snānādikāḥ sarvāḥ kriyāḥ kurmaḥ pitāmaha
||10||यदेतद्भवता चात्र पुष्करं तीर्थमुत्तमम् ॥
स्थापितं तस्य नो ब्रूहि माहात्म्यं सुरसत्तम ॥
येन स्नानादिकाः सर्वाः क्रियाः कुर्मः पितामह
brahmovāca
etattīrthaṃ mayā sṛṣṭamaṃtarikṣasthitaṃ sadā ||
kiṃ na śrutaṃ purāṇeṣu bhavadbhirdvijasattamāḥ
||11||एतत्तीर्थं मया सृष्टमंतरिक्षस्थितं सदा ॥
किं न श्रुतं पुराणेषु भवद्भिर्द्विजसत्तमाः
pṛthivyāṃ naimiṣaṃ tīrthamantarikṣe ca puṣkaram ||
trailokye tu kurukṣetraṃ viśeṣeṇa vyavasthitam
||12||पृथिव्यां नैमिषं तीर्थमन्तरिक्षे च पुष्करम् ॥
त्रैलोक्ये तु कुरुक्षेत्रं विशेषेण व्यवस्थितम्
tadyuṣmākaṃ hitārthāya paṃcarātraṃ dharātale ||
āgamiṣyatyasaṃdigdhaṃ mama vākyapraṇoditam
||13||तद्युष्माकं हितार्थाय पंचरात्रं धरातले ॥
आगमिष्यत्यसंदिग्धं मम वाक्यप्रणोदितम्
kārtikyāṃ śuklapakṣe tu hyekādaśyāṃ dine sthite ||
yāvatpaṃcadaśī tāvattithiḥ pāpapraṇāśinī
||14||कार्तिक्यां शुक्लपक्षे तु ह्येकादश्यां दिने स्थिते ॥
यावत्पंचदशी तावत्तिथिः पापप्रणाशिनी
paṃcarātrasya madhye tu yaḥ snānaṃ ca kariṣyati ||
śrāddhaṃ vā śraddhayā yuktastasya syādakṣayaṃ hi tat
||15||पंचरात्रस्य मध्ये तु यः स्नानं च करिष्यति ॥
श्राद्धं वा श्रद्धया युक्तस्तस्य स्यादक्षयं हि तत्
aha tu paṃcarātraṃ tadbrahmalokādupetya ca ||
saṃśrayaṃ tu kariṣyāmi tīrthe'traiva dvijottamāḥ
||16||अह तु पंचरात्रं तद्ब्रह्मलोकादुपेत्य च ॥
संश्रयं तु करिष्यामि तीर्थेऽत्रैव द्विजोत्तमाः
brāhmaṇā ūcuḥ
tava mūrtiṃ kariṣyāmaḥ sthāne'tra prapitāmaha ||
tasyāṃ saṃkramaṇaṃ nityaṃ tasmātkāryaṃ tvayāvibho
||17||तव मूर्तिं करिष्यामः स्थानेऽत्र प्रपितामह ॥
तस्यां संक्रमणं नित्यं तस्मात्कार्यं त्वयाविभो
tīrthaṃ caiva sadāpya'tra samāgacchatu cāṃbarāt ||
lokānāṃ pāpanāśāya tathā tvaṃ kartumarhasi
||18||तीर्थं चैव सदाप्यऽत्र समागच्छतु चांबरात् ॥
लोकानां पापनाशाय तथा त्वं कर्तुमर्हसि
eṣā no dakṣiṇā deva yajñasyaiva samudbhavā
||19||एषा नो दक्षिणा देव यज्ञस्यैव समुद्भवा
evaṃ kṛte suraśreṣṭha saphalaḥ syātkratustava ||
pratijñā ca tathā satyā tasmāddānāya nirmitā
||20||एवं कृते सुरश्रेष्ठ सफलः स्यात्क्रतुस्तव ॥
प्रतिज्ञा च तथा सत्या तस्माद्दानाय निर्मिता
śrībrahmovāca
mantrāhūtaṃ tataḥ śreṣṭhaṃ nabhomārgāddvijottamāḥ ||
hāṭakeśvaraje kṣetre puṣkaraṃ cāgamiṣyati
||21||मन्त्राहूतं ततः श्रेष्ठं नभोमार्गाद्द्विजोत्तमाः ॥
हाटकेश्वरजे क्षेत्रे पुष्करं चागमिष्यति
aghamarṣaṃ japaṃścaiva yaḥ kariṣyati toyagaḥ ||
mama mūrteḥ puraḥ sthitvā pailamantrapuraḥsaram
||22||अघमर्षं जपंश्चैव यः करिष्यति तोयगः ॥
मम मूर्तेः पुरः स्थित्वा पैलमन्त्रपुरःसरम्
japiṣyati dvijaśreṣṭhāḥ savanānāṃ catuṣṭayam ||
brahmalokātsamāgatya praśroṣyā mi ca taddvijāḥ
||23||जपिष्यति द्विजश्रेष्ठाः सवनानां चतुष्टयम् ॥
ब्रह्मलोकात्समागत्य प्रश्रोष्या मि च तद्द्विजाः
sūta uvāca
atha te nāgarāḥ sarve puṣpadānaprapūrvakam ||
anujñāṃ pradadustuṣṭā yajñaphalasamāptaye
||24||अथ ते नागराः सर्वे पुष्पदानप्रपूर्वकम् ॥
अनुज्ञां प्रददुस्तुष्टा यज्ञफलसमाप्तये
etasminnaṃtare prāptaḥ pulastyo'dhvaryusattamaḥ ||
yatra sthāne sthito brahmā nāgaraiḥ parivāritaḥ
||25||एतस्मिन्नंतरे प्राप्तः पुलस्त्योऽध्वर्युसत्तमः ॥
यत्र स्थाने स्थितो ब्रह्मा नागरैः परिवारितः
abravīcca samāptaste yataḥ saṃpūrṇadakṣiṇaḥ ||
prāyaścittairvirahito yathā nānyasya kasyacit
||26||अब्रवीच्च समाप्तस्ते यतः संपूर्णदक्षिणः ॥
प्रायश्चित्तैर्विरहितो यथा नान्यस्य कस्यचित्
ataḥ paraṃ karmaśeṣaṃ kiṃcidasti pitāmaha ||
vāruṇeṣṭirjapaścaiva tatkariṣyāmi sāṃpratam
||27||अतः परं कर्मशेषं किंचिदस्ति पितामह ॥
वारुणेष्टिर्जपश्चैव तत्करिष्यामि सांप्रतम्
tathā cā'vabhṛthasnānaṃ prakartavyaṃ tvayā saha ||
tasmāduttiṣṭha gacchāmo yatra toyavyavasthitam
||28||तथा चाऽवभृथस्नानं प्रकर्तव्यं त्वया सह ॥
तस्मादुत्तिष्ठ गच्छामो यत्र तोयव्यवस्थितम्
yeneṣṭivāruṇīṃ tatra kurmo viprairyathocitaiḥ ||
caturbhirbrahmapūrvaiśca mayā cāgnīdhrahotṛbhiḥ
||29||येनेष्टिवारुणीं तत्र कुर्मो विप्रैर्यथोचितैः ॥
चतुर्भिर्ब्रह्मपूर्वैश्च मया चाग्नीध्रहोतृभिः
yathāvahnau tathā toye mantravattadbhavaṃśubham ||
hūyate saṃvidhānenayajñapātraiḥ sama nvitam
||30||यथावह्नौ तथा तोये मन्त्रवत्तद्भवंशुभम् ॥
हूयते संविधानेनयज्ञपात्रैः सम न्वितम्
varuṇasya pratuṣṭyarthaṃ snānaṃ kāryaṃ tvayaiva ca ||
ṛtvigbhiḥ sahitenaiva sarvāriṣṭapraśāṃtaye
||31||वरुणस्य प्रतुष्ट्यर्थं स्नानं कार्यं त्वयैव च ॥
ऋत्विग्भिः सहितेनैव सर्वारिष्टप्रशांतये
yastatra samaye snānaṃ kariṣyati tvayā saha ||
anyo'pi mānavaḥ kaścidvipāpmā sa bhaviṣyati
||32||यस्तत्र समये स्नानं करिष्यति त्वया सह ॥
अन्योऽपि मानवः कश्चिद्विपाप्मा स भविष्यति
yānīha saṃti tīrthāni trailokye sacarācare ||
vāruṇīmiṣṭimāsādya tāni yāṃti ca saṃnidhau
||33||यानीह संति तीर्थानि त्रैलोक्ये सचराचरे ॥
वारुणीमिष्टिमासाद्य तानि यांति च संनिधौ
tasmātsarvaprayatnena dīkṣitena samanvitam ||
tatra snānaṃ prakartavyaṃ jalamadhye tu sārthibhiḥ ||
brāhmaṇaiḥ kṣatriyairvaiśyaiḥ sarvairava bhṛthotsave
||34||तस्मात्सर्वप्रयत्नेन दीक्षितेन समन्वितम् ॥
तत्र स्नानं प्रकर्तव्यं जलमध्ये तु सार्थिभिः ॥
ब्राह्मणैः क्षत्रियैर्वैश्यैः सर्वैरव भृथोत्सवे
tasmādvisarjayādyaitānbrāhmaṇāṃstāvadeva ca ||
ete'pi ca kariṣyaṃti snānaṃ tatra tvayā saha
||35||तस्माद्विसर्जयाद्यैतान्ब्राह्मणांस्तावदेव च ॥
एतेऽपि च करिष्यंति स्नानं तत्र त्वया सह
sūta uvāca
tacchrutvā prasthito brahmā jyeṣṭhakuṇḍataṭaṃ śubham ||
gāyatryā sahito hṛṣṭaḥ kṛtakṛtyatvamāgataḥ
||36||तच्छ्रुत्वा प्रस्थितो ब्रह्मा ज्येष्ठकुण्डतटं शुभम् ॥
गायत्र्या सहितो हृष्टः कृतकृत्यत्वमागतः
atha tadvacanaṃ śrutvā surāḥ sarve tathā dvijāḥ ||
pulastyaśca śubhārthāya snānārthaṃ prasthitāstadā ||
brahmaṇā sahitā hṛṣṭāḥ putradārasamanvitāḥ
||37||अथ तद्वचनं श्रुत्वा सुराः सर्वे तथा द्विजाः ॥
पुलस्त्यश्च शुभार्थाय स्नानार्थं प्रस्थितास्तदा ॥
ब्रह्मणा सहिता हृष्टाः पुत्रदारसमन्विताः
atha saṃkīrṇatā jātā samaṃtājjyeṣṭhapuṣkare ||
snānārthamāgatairlokairūrdhvabāhubhireva ca
||38||अथ संकीर्णता जाता समंताज्ज्येष्ठपुष्करे ॥
स्नानार्थमागतैर्लोकैरूर्ध्वबाहुभिरेव च
na tatra lakṣyate brahmā na tatkarma ca vāruṇam ||
kriyamāṇairdvijaistatra vyāpte bhūmi tale'khile
||39||न तत्र लक्ष्यते ब्रह्मा न तत्कर्म च वारुणम् ॥
क्रियमाणैर्द्विजैस्तत्र व्याप्ते भूमि तलेऽखिले
athāṃte karmaṇastasya brahmā prāha śatakratum ||
hitārthaṃ sarvalokasya vinayāvanataṃ sthitam
||40||अथांते कर्मणस्तस्य ब्रह्मा प्राह शतक्रतुम् ॥
हितार्थं सर्वलोकस्य विनयावनतं स्थितम्
na māṃ jñāsyati dūrasthā janāḥ snānārthamāgatāḥ ||
majjamānaṃ jale puṇye sammarde'smiñjalodbhave
||41||न मां ज्ञास्यति दूरस्था जनाः स्नानार्थमागताः ॥
मज्जमानं जले पुण्ये सम्मर्देऽस्मिञ्जलोद्भवे
tasmānnāgaṃ samāruhya nijaṃ vṛtraniṣūdana ||
eṇasya kṛṣṇasārasya vaṃśāṃte carma nyasya ca
||42||तस्मान्नागं समारुह्य निजं वृत्रनिषूदन ॥
एणस्य कृष्णसारस्य वंशांते चर्म न्यस्य च
tatastatsnānavelāyāṃ kṣeptavyaṃ salile tvayā ||
yena lokaḥ samasto'yaṃ vetti kālaṃ tu snānajam
||43||ततस्तत्स्नानवेलायां क्षेप्तव्यं सलिले त्वया ॥
येन लोकः समस्तोऽयं वेत्ति कालं तु स्नानजम्
snānaṃ ca kurute śreyaḥ saṃprāpnoti yathoditam ||
dūrastho'pi suvṛddho'pi bālo'pi ca samāgataḥ ||
snānajaṃ labhate śreyaḥ saṃdṛṣṭe'pi yathoditam
||44||स्नानं च कुरुते श्रेयः संप्राप्नोति यथोदितम् ॥
दूरस्थोऽपि सुवृद्धोऽपि बालोऽपि च समागतः ॥
स्नानजं लभते श्रेयः संदृष्टेऽपि यथोदितम्
sūta uvāca
bāḍhamityeva saṃprocya satvaraṃ prayayau hariḥ
||45||बाढमित्येव संप्रोच्य सत्वरं प्रययौ हरिः
tato nāgaṃ samāruhya dhṛtvā vaṃśaṃ kare nije ||
mṛgacarmāgrasaṃyuktaṃ toyamadhye vyavasthitaḥ
||46||ततो नागं समारुह्य धृत्वा वंशं करे निजे ॥
मृगचर्माग्रसंयुक्तं तोयमध्ये व्यवस्थितः
etatkarmāvasāne sa snātukāme pitāmahe ||
taccarma prākṣipattoye svayameva śatakratuḥ
||47||एतत्कर्मावसाने स स्नातुकामे पितामहे ॥
तच्चर्म प्राक्षिपत्तोये स्वयमेव शतक्रतुः
etasminnantare devāḥ sarve gandharvaguhyakāḥ ||
mānuṣāśca viśeṣeṇa snātāstatra samāhitāḥ
||48||एतस्मिन्नन्तरे देवाः सर्वे गन्धर्वगुह्यकाः ॥
मानुषाश्च विशेषेण स्नातास्तत्र समाहिताः
etasminnantare brahmā śakraṃ provāca sādaram ||
kṛtasnānaṃ suraiḥ sārdhaṃ vinayāvanataṃ sthitam
||49||एतस्मिन्नन्तरे ब्रह्मा शक्रं प्रोवाच सादरम् ॥
कृतस्नानं सुरैः सार्धं विनयावनतं स्थितम्
sahasrākṣaṃ tvayā kaṣṭaṃ manmakhe vipulaṃ kṛtam ||
ānītā ca tathā patnī gāyatrī ca sumadhyamā
||50||सहस्राक्षं त्वया कष्टं मन्मखे विपुलं कृतम् ॥
आनीता च तथा पत्नी गायत्री च सुमध्यमा
tasmādvaraya bhadraṃ te yaṃ varaṃ manasi sthitam ||
sarvaṃ te'haṃ pradāsyāmi yadyapi syātsudurlabham
||51||तस्माद्वरय भद्रं ते यं वरं मनसि स्थितम् ॥
सर्वं तेऽहं प्रदास्यामि यद्यपि स्यात्सुदुर्लभम्
indra uvāca
yadi tuṣṭo'si me deva yadi deyo varo mama ||
yadi tvāṃ prārthayāmyadya bhūyāttu tādṛśaṃ vibho
||52||यदि तुष्टोऽसि मे देव यदि देयो वरो मम ॥
यदि त्वां प्रार्थयाम्यद्य भूयात्तु तादृशं विभो
varṣevarṣe tu yaḥ kuryātsaṃprāpte'smindine śubhe ||
mṛgacarma samādāya vaṃśāgre yo mahīpatiḥ
||53||वर्षेवर्षे तु यः कुर्यात्संप्राप्तेऽस्मिन्दिने शुभे ॥
मृगचर्म समादाय वंशाग्रे यो महीपतिः
nāgapravaramāruhya svayameva pitāmaha ||
yathā'haṃ prakṣipettoye sa syātpāpavivarjitaḥ
||54||नागप्रवरमारुह्य स्वयमेव पितामह ॥
यथाऽहं प्रक्षिपेत्तोये स स्यात्पापविवर्जितः
ajeyaḥ sarvaśatrūṇāṃ sarvavyasanavarjitaḥ ||
ye kariṣyaṃti ca snānamanena mṛgacarmaṇā
||55||अजेयः सर्वशत्रूणां सर्वव्यसनवर्जितः ॥
ये करिष्यंति च स्नानमनेन मृगचर्मणा
sārdhamanye'pi ye lokā api pāpasamanvitāḥ ||
teṣāṃ varṣakṛtaṃ pāpaṃ tvatprasādātpraṇaśyatu
||56||सार्धमन्येऽपि ये लोका अपि पापसमन्विताः ॥
तेषां वर्षकृतं पापं त्वत्प्रसादात्प्रणश्यतु
brahmovāca
etatsarvaṃ sahasrākṣa tava vākyamasaṃśayam ||
bhaviṣyati na saṃdehaḥ sarvametanmayoditam
||57||एतत्सर्वं सहस्राक्ष तव वाक्यमसंशयम् ॥
भविष्यति न संदेहः सर्वमेतन्मयोदितम्
yo rājā śraddhayā yukto deśasyāsya samudbhavaḥ ||
ānartasya gajārūḍho mṛgacarma kṣipiṣyati
||58||यो राजा श्रद्धया युक्तो देशस्यास्य समुद्भवः ॥
आनर्तस्य गजारूढो मृगचर्म क्षिपिष्यति
atra kuṇḍe madīye tu māṃ saṃpūjya taṭasthitam ||
sarvalokahitārthāya saṃprāpte pratipaddine
||59||अत्र कुण्डे मदीये तु मां संपूज्य तटस्थितम् ॥
सर्वलोकहितार्थाय संप्राप्ते प्रतिपद्दिने
samāpte kutape kāle vijayī sa bhaviṣyati ||
kārtikyāṃ ca vyatītāyāṃ dvitīye'hni vyavasthite
||60||समाप्ते कुतपे काले विजयी स भविष्यति ॥
कार्तिक्यां च व्यतीतायां द्वितीयेऽह्नि व्यवस्थिते
tathā tatkālamāsādya ye kariṣyaṃti mānavāḥ ||
snānaṃ tacca dine'traiva varṣapāpavivarjitāḥ ||
ādhivyādhivimuktāśca te bhaviṣyaṃtyasaṃśayam
||61||तथा तत्कालमासाद्य ये करिष्यंति मानवाः ॥
स्नानं तच्च दिनेऽत्रैव वर्षपापविवर्जिताः ॥
आधिव्याधिविमुक्ताश्च ते भविष्यंत्यसंशयम्
sūta uvāca
etasminnaṃtare prāpto yakṣmākhyo dāruṇo gadaḥ ||
acikitsyo'pi devānāṃ tathā dhanvaṃtarerapi
||62||एतस्मिन्नंतरे प्राप्तो यक्ष्माख्यो दारुणो गदः ॥
अचिकित्स्योऽपि देवानां तथा धन्वंतरेरपि
nīlāṃbaradharaḥ kṣāmo dīno daṇḍasamāśritaḥ ||
kṣutkurvañchleṣmaṇā tāvatkṛcchrātsaṃdhārayanpadam
||63||नीलांबरधरः क्षामो दीनो दण्डसमाश्रितः ॥
क्षुत्कुर्वञ्छ्लेष्मणा तावत्कृच्छ्रात्संधारयन्पदम्
tataśca praṇato bhūtvā vākyametaduvāca saḥ
||64||ततश्च प्रणतो भूत्वा वाक्यमेतदुवाच सः
yakṣmovāca
tava yajñamahaṃ śrutvā dūrādeva pitāmaha ||
kṣutkṣāmakaṃṭhaścāyātaḥ samāptāvadya kṛcchrataḥ
||65||तव यज्ञमहं श्रुत्वा दूरादेव पितामह ॥
क्षुत्क्षामकंठश्चायातः समाप्तावद्य कृच्छ्रतः
dakṣeṇāhaṃ purā sṛṣṭaścaṃdrārthaṃ kupitena ca ||
rohiṇīṃ sevamānasya saṃtyaktānyāsutasya ca
||66||दक्षेणाहं पुरा सृष्टश्चंद्रार्थं कुपितेन च ॥
रोहिणीं सेवमानस्य संत्यक्तान्यासुतस्य च
tato māheśvarādeśāttena tuṣṭena tasya ca ||
pakṣamekaṃ kṛtaṃ mahyaṃ tasyāsvādanakarmaṇi
||67||ततो माहेश्वरादेशात्तेन तुष्टेन तस्य च ॥
पक्षमेकं कृतं मह्यं तस्यास्वादनकर्मणि
anyapakṣe na kiṃcicca yena tṛptiḥ prajāyate ||
yajñasyaiva tu sarvasya tarpayitvā dvijottamam
||68||अन्यपक्षे न किंचिच्च येन तृप्तिः प्रजायते ॥
यज्ञस्यैव तु सर्वस्य तर्पयित्वा द्विजोत्तमम्
tatastadvacanaṃ grāhyaṃ tarpito'hamasaṃśayam ||
paurṇamāsyāṃ tato deva yasya yajñasya kṛtsnaśaḥ
||69||ततस्तद्वचनं ग्राह्यं तर्पितोऽहमसंशयम् ॥
पौर्णमास्यां ततो देव यस्य यज्ञस्य कृत्स्नशः
yasya no brāhmaṇo brūte yajñasyāṃte pratarpitaḥ ||
tarpito'smīti tattasya vṛthā syādyajñajaṃ phalam ||
yadi koṭiguṇaṃ dattamapi śraddhāsamanvitam
||70||यस्य नो ब्राह्मणो ब्रूते यज्ञस्यांते प्रतर्पितः ॥
तर्पितोऽस्मीति तत्तस्य वृथा स्याद्यज्ञजं फलम् ॥
यदि कोटिगुणं दत्तमपि श्रद्धासमन्वितम्
etacchrutvā tvayā deva paṭhyamānaṃ śrutāviha ||
tasmātsamyaksthite yajñe brāhmaṇaṃ tarpayeta vai
||71||एतच्छ्रुत्वा त्वया देव पठ्यमानं श्रुताविह ॥
तस्मात्सम्यक्स्थिते यज्ञे ब्राह्मणं तर्पयेत वै
pratyakṣaṃ me yathā tṛptirannenaiva prajāyate ||
tvatprasādātsuraśreṣṭha tathā nītirvidhīyatām
||72||प्रत्यक्षं मे यथा तृप्तिरन्नेनैव प्रजायते ॥
त्वत्प्रसादात्सुरश्रेष्ठ तथा नीतिर्विधीयताम्
sūta uvāca
tacchrutvā padmajastasya pathyaṃpathyaṃ vaco'khilam ||
śrutiṃ pramāṇatāṃ nītvā tato vacanamabravīt
||73||तच्छ्रुत्वा पद्मजस्तस्य पथ्यंपथ्यं वचोऽखिलम् ॥
श्रुतिं प्रमाणतां नीत्वा ततो वचनमब्रवीत्
adyaprabhṛti vai viprāḥ sāgnayaḥ syurdharātale ||
taiḥ sarvairvaiśvadevāṃte balirdeyastathākhilaḥ
||74||अद्यप्रभृति वै विप्राः साग्नयः स्युर्धरातले ॥
तैः सर्वैर्वैश्वदेवांते बलिर्देयस्तथाखिलः
dattvā'nyebhyotha devebhyastava tṛptirbhaviṣyati ||
tava pakṣe dvitīye tu satyametanmayoditam
||75||दत्त्वाऽन्येभ्योथ देवेभ्यस्तव तृप्तिर्भविष्यति ॥
तव पक्षे द्वितीये तु सत्यमेतन्मयोदितम्
ye viprāstu baliṃ dadyurvaiśvadevāṃta āgate ||
na teṣāmanvaye cāpi tvayā sevyo'tra kaścana
||76||ये विप्रास्तु बलिं दद्युर्वैश्वदेवांत आगते ॥
न तेषामन्वये चापि त्वया सेव्योऽत्र कश्चन
yakṣmovāca
tīrthe'smiṃstāvake deva sadāhaṃ tapasi sthitaḥ ||
tiṣṭhāmi yadi vādeśastāvako jāyate mama
||77||तीर्थेऽस्मिंस्तावके देव सदाहं तपसि स्थितः ॥
तिष्ठामि यदि वादेशस्तावको जायते मम
brahmovāca
yadyevaṃ kuru cānyatra tvamāśramapadaṃ nijam ||
saṃprāpya bhūmideśe ca kañcidyadabhirocate ||
arthayitvā dvijānetānyathā yajñakṛte mayā
||78||यद्येवं कुरु चान्यत्र त्वमाश्रमपदं निजम् ॥
संप्राप्य भूमिदेशे च कञ्चिद्यदभिरोचते ॥
अर्थयित्वा द्विजानेतान्यथा यज्ञकृते मया
sūta uvāca
tacchrutvā prārthayāmāsa camatkārapurodbhavān ||
tebhyaḥ prāpya tato bhūmiṃ cakārāthāśramaṃ nijam
||79||तच्छ्रुत्वा प्रार्थयामास चमत्कारपुरोद्भवान् ॥
तेभ्यः प्राप्य ततो भूमिं चकाराथाश्रमं निजम्
tatra yaḥ kurute snānaṃ pratipaddivase sthite ||
sūryavāreṇa mucyeta yakṣmaṇā sevito'pi vā
||80||तत्र यः कुरुते स्नानं प्रतिपद्दिवसे स्थिते ॥
सूर्यवारेण मुच्येत यक्ष्मणा सेवितोऽपि वा
adyāpi dṛśyate cātra pratyayastasya saṃbhave ||
sarveṣāmāhitāgnīnāṃ nāgarāṇāṃ viśeṣataḥ ||
kali kāle'pi saṃprāpte na yakṣmā saṃprajāyate
||81||अद्यापि दृश्यते चात्र प्रत्ययस्तस्य संभवे ॥
सर्वेषामाहिताग्नीनां नागराणां विशेषतः ॥
कलि कालेऽपि संप्राप्ते न यक्ष्मा संप्रजायते
tathā catuṣpadānāṃ ca teṣāṃ gṛhanivāsinām ||
na tasya bheṣajāni syurna maṃtrā na cikitsakāḥ
||82||तथा चतुष्पदानां च तेषां गृहनिवासिनाम् ॥
न तस्य भेषजानि स्युर्न मंत्रा न चिकित्सकाः
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye brahmayajñāvabhṛthayakṣma tīrthotpattimāhātmyavarṇanaṃnāma navatyuttaraśatatamo'dhyāyaḥ || 190 ||